“Bakı-Xəbər” qəzetinin baş redaktoru, ictimai-siyasi xadim, siyasi ekspert, Azərbaycan Mətbuat Şurasının İdarə Heyətinin üzvü Aydın Quliyevə həsr edilən “Əfsanə adam” adlı kitab işıq üzü görüb.
Kitabın müəllifi şair-publisist Hikmət Məlikzadədir.
Aydın Quliyevin 65 illik ömür yoluna ayna tutan nəşrdə onun tərcümeyi-halını, müəllifin qələmindən süzülən düşüncələri, görkəmli şəxsiyyətlərin-professor Məhərrəm Qasımlının, “Olaylar” qəzetinin baş redaktoru Yunus Oğuzun, kulturoloq Binnət Hümbətoğlunun, tanınmış hüquqşünas Şəmsəddin Əliyevin, Respublika Xatirə Kitabı Redaksiyasının baş redaktoru Nəzakət Məmmədovanın, tanınmış şair Əbülfət Mədətoğlunun, gürcü əsilli şair-tərcüməçi Giya Paçxataşvilinin, yazıçı-publisist Pünhan Şükürün, professor Məhərrəm Zülfüqarlının, gənc QHT rəhbəri Lamiyə İsazadənin, şair Arif Musanın, “Kredo” qəzetinin baş redaktoru Əli Rza Xələflinin, “Gənclik” nəşriyyatının baş redaktoru Adil Abdullayevin, “Yeni Təfəkkür” qəzetinin baş redaktoru Şəmsiyyə Kərimovanın, jurnalist Sabir Hüseynovun, oxucumuz Fərman Qarabağlının Aydın Quliyev barəsində yazdıqları səmimi yazıları, söylədikləri fikirləri, onu sədaqətli dost, dövlətə və dövlətçiliyə bağlı prinsipial siyasi xadim, yüksək natiqliyə və analtik qabiliyyətə, fərqli, bənzərsiz yanaşmalara malik siyasi ekspert olaraq dəyərləndirməsi çox qiymətlidir. Eləcə də “Bakı-Xəbər”in əməkdaşlarının fikirləri bu kitabda yer alıb. “Əfsanə adam”ı oxumaqla, doğrudan da maraqlı və faydalı, örnək bir həyat hekayəsinə - Aydın Quliyevin ömür yoluna bələd olacaqsınız. Bəzən hamının tanıdığı adamların elə həyat hekayələri, elə uğur dastanları olur ki, nəinki bir, eləcə də bir neçə nəsil ondan qidalanır, qaynaqlanır. Kitabda Aydın Quliyevin ömür yolunu ifadə edən geniş müsahibəsinin yer alması diqqət çəkən məqamlardan biri kimi vurğulanmalıdır. Hikmət Məlikzadənin A.Quliyevə həsr etdiyi “İçdiyin sulardan durusan, adam” poema-portreti də kitaba ayrı bir məziyyət qatır.
“...Biz kitabımıza “Əfsanə adam” adını təsadüfən, ya da adi bir ad olaraq seçmədik, Aydın Quliyevin siyasi arenadakı fəhmi bu adı bizə təlqin etdi...” - kitabın adına aydınlıq gətirən müəllif son sözündə belə yazıb.
Sən Adəm kimisən, Aydın Quliyev, Çöhrən də durudur, sözün də duru. Min zillət çəkmisən dünənə qədər Baxış necə qalıb gözündə duru?
Hikmət Məlikzadənin misralarıdır. Kitabın baş obrazına - Aydın Quliyevə itihaf etdiyi poemadandır. Kitab haqqında çox yazmaq istəmirəm, istəyirəm ki, kitabı özünüz oxuyasınız. Bircə onu demək istəyirəm ki, H.Məlikzadə bu kitaba ürək qoyub.
Bu nəcib iş - “Əfsanə adam” kimi dəyərli bir kitabı yazıb ərsəyə gətirdiyi üçün “Bakı-Xəbər”in kollektivi adından Hikmət Məlikzadəyə təşəkkürümüzü bildiririk!
İradə SARIYEVA
