Elşən Qafarov: “Nazirlik öz əməkdaşlarının sertifikasiyadan və attestasiyadan keçməsində qətiyyən maraqlı deyil”
Bir neçə ildir ki, ölkədə təhsil işçilərinin sertifikasiyasının keçirilməsi prosesi gedir. Musiqi və incəsənət təmayüllü məktəblərdən tutmuş orta ümumtəhsil məktəblərinin müəllimlərinə qədər bütün pedoqoji işçilər sertifikasiyaya cəlb olunurlar.
Sertifikasiyadan keçmənin də məcburi xarakter daşıdığını hər kəs bilir. Məsələ burasındadır ki, müəllimləri sertifikasiyaya cəlb edənlərin, onlardan imtahan götürənlərin özləri bu prosesdən kənarda qalır, yəni onlar özləri sertifikasiyaya cəlb olunmurlar.
Müəllimlər sertifikasiyaya cəlb edilirlərsə, bu halda Elm və Təhsil Nazirliyinin öz əməkdaşları sertifikasiyadan və ya attestasiyadan niyə keçirilmir?
“Ölkə təhsilində elə bir xaotik vəziyyət var ki...”
Təhsil eksperti Elşən Qafarov “Bakı-Xəbər”ə bildirdi ki, bu olduqca maraqlı sualdır. “Elm və Təhsil Nazirliyinin struktur bölmələrində vəzifələrin tam əksəriyyəti dövlət qulluğu statusuna düşən vəzifələrdir. Nazirlik ölkədə yeganə dövlət qurumudur ki, dövlət qulluğuna vakansiya çıxarmır. Deyə bilmərəm Elm və Təhsil Nazirliyi hansı qaydalarla, hansı prinsiplərlə idarə olunur, amma onu deyə bilərəm ki, ölkə qanunvericiliyi bu nazirliyin strukturlarında yerimir. Bir çox hallarda haqlı iradlar gəlir ki, Elm və Təhsil Nazirliyində işləyən əməkdaşlar hansı kreteriyalara görə seçilir. Biz açıq şəkildə görürük ki, ölkənin şərabçılıq zavodlarından, çay fabriklərindən, şəkər zavodundan, ayrı-ayrı şirkətlərdən təhsillə ümumiyyətlə bağlı olmayan şəxslər birbaşa Elm və Təhsil Nazirliyində funksional vəzifələrə gətirilir. Bu da, təbii ki, haqlı narazılıqlar doğurur. Digər bir tərəfdən isə, təhsil sahəsində təhsili, anlayışı, səriştəsi, təcrübəsi olmayan şəxslərin funksional vəzifələrə təyin olunması və onların məlumatlı olmadıqları bir sahə üzrə qərarlar verməsi nəticə etibarı ilə təhsildə xaotik vəziyyət yaradır”.
E.Qafarovun fikrincə, bu gün təhsilin elə bir pilləsi yoxdur ki, orda ciddi problemlərimiz olmasın. İdarəetmədə, nəzarət sistemində, təhsilin təşkilində və sairdə ciddi problemlər olduğunu vurğulayan ekspert qeyd etdi ki, nəticədə biz təhsil sistemini yaxşı vəziyyətdə görmürük. “Reallıq ondan ibarətdir ki, Elm və Təhsil Nazirliyi il boyu imtahanlar keçirir, layihələr və təlimlər reallaşdırır. Əslində ölkə Prezidentinin 24 iyul 2023-cü il tarixli fərmanı ilə təsdiq olunmuş Elm və Təhsil Nazirliyinin əsasnaməsində nazirliyin vəzifələrində imtahan, təlimlər və layihələr həyata keçirmək yoxdur. Elm və Təhsil Nazirliyinin vəzifələri ölkədə bütün təhsil müəssisələrinə elmi-metodiki dəstək göstərməkdir, dövlətin təhsil siyasətini həyata keçirməkdir. Amma biz bunu görmürük, gördüyümüz isə, dediyim kimi, imtahanlar, layihələr və təlimlərdir. Səbəb də məhz nazirliyin idarə edilməsində, funksional idarəetmə orqanlarında vəzifələrdə təhsillə bağlı olmayan insanların olmasıdır. Təbii ki, əksər hallarda özlərinin istədikləri kadrları həmin vəzifələrə təyin etmək üçün Emin Əmirullayevə yaxın olmaq lazımdır. Ya tələbə yoldaşı, ya tanış olmaq, ya da keçmiş QHT dövründən əməkdaş olmaq tələb olunur. Yaxud təlimçilər olmalıdır. Vakansiyaların gizlədilməsi də məlumdur. Əgər bir nazir öz təyin etdiyi işçiləri dövlət qulluğunun tələblərini pozmaqla işə qəbul edirsə, əlbəttə o, heç vaxt işçilərin attestasiyasında maraqlı olmaz. Nazirlik öz əməkdaşlarının sertifikasiyadan və attestasiyadan keçməsində qətiyyən maraqlı deyil. Ölkə təhsilində elə bir xaotik vəziyyət var ki, Emin Əmirullayev və onun yaxın ətrafı Elm və Təhsil Nazirliyindən getməyincə nazirliyin işi ilə bağlı müsbət fikir söyləyə bilmərik. Çünki Emin Əmrullayev ölkə başçısının ona göstərdiyi etimaddan, çox təəssüf ki, sui-istifadə edərək şəxsi əlaqələri zəminində vəzifələrə təyinatlar verir. Eyni zamanda da şəxsi münasibətdə olduğu həmin insanların attestasiyadan keçməyəcəyini özü də yaxşı bilir. Nəticə etibarı ilə attestasiyada maraqlı deyil. Attestasiyada onda maraqlı olardı ki, Emin Əmurullayev işini şəffaf qurmuş olardı. Biz bunu görmürük”-deyə E.Qafarov vurğuladı.
Əli TURABOV
