Azərbaycanda 2022-ci ildə qəbul və buraxılış imtahanlarında şagirdləri 100-dən aşağı bal toplayan rayonların adları açıqlanıb. Bu barədə Dövlət İmtahan Mərkəzinin “Abituriyent” jurnalının 12-ci nömrəsində məlumat yer alıb.
Qeyd edilir ki, ötən il Siyəzən, Şabran, Ağsu, Xocalı, Beyləqan, Lənkəran, Xaçmaz, Sabirabad, Daşkəsən rayonlarının və Gəncə şəhərinin cari il məzunlarını təmsil edən abituriyentlərin 20 faizdən çoxunun qəbul imtahanlarında topladığı bal 100-dən aşağı olub.
Maraqlıdır, qeyd edilən bölgələrdə məzunlar niyə zəif nəticə göstərib? Xüsusilə Gəncə kimi böyük şəhərdə belə bir problemin yaşanması maraq doğurur.
“Müəllimlərin işə qəbulu zamanı imtahanlardan yüksək nəticə əldə edənlər şəhər yerlərinə yerləşdirilir, daha aşağı bal toplayanlar isə həmişə regionlara, kəndlərə göndərilir”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, Bakı şəhərinin məktəblərində müəllim-şagird nisbəti sabitləşib. Amma regionlarda bu problemin davam etməsi nəticələrə təsirini göstərir: “Regionların sosial-iqtisadi inkişafı Dövlət Proqramı”na uyğun olaraq bu gün doğma Azərbaycanımızın hər yerində, bütün bölgələrində yeni-yeni məktəblər tikilir, onların maddi-texniki bazası gücləndirilir, ən müasir kompüter avadanlıqları ilə və digər ləvazimatlarla təchiz edilir. Yəni kənd məktəblərinin maddi texniki bazası hətta paytaxtın bir çox məktəblərindən yaxşıdır. Azərbaycan təhsili böyük sürətlə Avropa və dünya təhsil sisteminə inteqrasiya olunur. Buna baxmayaraq, bəzi bölgələrin məzunları nəinki yüksək, heç orta səviyyədə belə cavab verə bilməyiblər. Ötən il Siyəzən, Şabran, Ağsu, Xocalı, Beyləqan, Lənkəran, Xaçmaz, Sabirabad, Daşkəsən rayonlarının və Gəncə şəhərinin cari il məzunlarını təmsil edən abituriyentlərin 20 faizdən çoxunun qəbul imtahanlarında topladığı bal 100-dən aşağı olub. Ölkənin ayrı-ayrı bölgələrini təmsil edən abituriyentlərin imtahan fənləri üzrə cavablarının təhlili göstərir ki, fənlər üzrə ən yüksək nəticə, əsasən, birbaşa Elm vəTəhsil Nazirliyinin tabeliyində olan liseylərə və özəl liseylərə məxsusdur. Fənlər üzrə şəhər və rayon təhsil şöbələrinin göstəricilərinin təhlilindən aydın olur ki, kənd rayonlarının bir çox fənlər üzrə göstəriciləri Bakı və Sumqayıt şəhərlərinin göstəricilərini qabaqlayır”.
Ekspertin sözlərinə görə, imtahan nəticələrinin aşağı olması məktəblərdə tədrisin keyfiyyətinin aşağı olduğundan da xəbər verir. İmtahan nəticələri göstərir ki, məktəblər öz funksiyasını yerinə yetirə bilmir: "Tədrisin keyfiyyətinin aşağı olması imtahan nəticələrinə təsir edir. Yeni təhsil proqramlarına ehtiyac var. Orta ümumtəhsil məktəblərini 85 minə yaxın şagird bitirir və biz hər il qəbul və buraxılış imtahanı nəticələrini təhlil edəndə müxtəlif nəticələri görə bilirik. Hər il rayonlar, eyni zamanda Bakı şəhəri üzrə olan məktəblərin məzunları arasında ali məktəblərə qəbul ola bilməyən kifayət qədərdir”.
N.Hüseynov onu da əlavə etdi ki, müəllimlərin işə qəbulu zamanı imtahanlardan yüksək nəticə əldə edənlər şəhər yerlərinə yerləşdirilir, daha aşağı bal toplayanlar isə həmişə regionlara, kəndlərə göndərilir. Ona görə də nəticə göz önündədir. Qeyd edim ki, hazırda da kənd məktəblərində xeyli kadr çatışmazlığı var. Xüsusən də xarici dil, biologiya fənni üzrə kadr çatışmazlığı çoxdur. Bölgələrə müəllimlərin cəlb edilməsi üçün cəlbedici proqramlar yoxdur.
Günel CƏLİLOVA
