İnkişaf etmiş ölkələrdə tətillər yayda yox, qışdadır. Bizdə isə 3 aylıq tətil müddəti var. Tədris müddəti nə qədər çox olsa, o qədər yaxşı olar.
Bu barədə media üçün keçirilən brifinqdə çıxışı zamanı elm və təhsil naziri Emin Əmrullayev deyib. “Uşaqlar indi daha az məktəbə gedir. 10 il hər həftəsonu məktəbə getməklə indiki uşaqlardan 2 il artıq tədris almışam. Tədris ilinin çox və uzun olması şagirdlərin gələcəyi üçün yaxşı olar. Fikrimcə, məktəblərdə sentyabrın 1-dən tədrisin başlaması daha uyğun olardı. Bu, sadəcə istəkdir”-deyə nazir bildirib.
Nazir bununla təhsil müddətinin uzadılmasınımı təklif edir? Tədris sentyabrın 1-də başlayarsa nə vaxt bitəcək? Nazirin bu təklifini necə qarşılamaq olar?
Vüsalə Ağabəyli: “Tədris müddətinin sentyabrın 1-də başlayıb daha erkən yekunlaşması daha məqsədəuyğundur”
Filologiya üzrə fəlsəfə doktoru, dosent Vüsalə Ağabəyli “Bakı-Xəbər”ə şərhində “Bütün təhsil müəssisələrində tədris ili 2004-cü ildən 15 sentyabrda başlanması qərara verildikdən 10 il sonra, yəni 2014-cü ildə tədris müddətinin uzadılaraq 14 iyun tarixində yekunlaşması qərarı verildi və həmin qərar 2015-2016cı tədris ilindən şamil olunmağa başladı. Sonuncu qərar elan olunduğu müddətdə, biz bir qrup təhsil nümayəndələri etirazımızı bildirdik, hətta bununla bağlı geniş toplantı və müraciət təşkil olunması üçün sosial şəbəkələrdə klaviatura arxasında cəsarətli yazanlara müraciət edərək 2015-ci ilin mayında "Event" də yaratmışdım. Təklifimiz isə hələ o vaxtdan tədris ilinin 1 sentyabrda başlaması və mayın 31-ndə yekunlaşması idi. Qeydiyyatdan çoxsaylı təhsil nümayəndələri keçsə də, təəssüf ki, görüşə 2 müəllimdən başqa heç kəs gəlmədi. Burdan aydın oldu ki, əslində, boş deyingənlik edənlərin heç biri təhsili və cəmiyyəti düşünmür. İndi də elədir, təhsil məsələlərini də qeybət söhbətlərinə döndəriblər. Senyabrın 1-15 aralığında olan hava şəraiti, iyunun 1-15 aralığı olan hava şəraiti ilə eyni deyil. İyunda hava daha isti olur. Digər əsas məsələ isə odur ki, sentyabr ayında tələbələr, şagirdlər dərsə gələndə tam enerjili, həvəsli olur, mayın sonlarına doğru isə eyni hal yaşanmır, əksi olur. Nəzərə alaq ki, universitet tələbələri hətta dərs prosesi bitdikdən sonra iyul ayına qədər imtahan prosesində olurlar. Bütün bu səbəblərə görə, tədris müddətinin sentyabrın 1-də başlayıb daha erkən yekunlaşması daha məqsədəuyğundur”-deyə bildirdi.
V.Ağabəyli əlavə etdi ki, əgər tədris ili 1 sentyabrda başlayıb iyunun 15-də bitəcəksə, yəni tədris həftələri normada nəzərdə tutulduğundan artıq olacaqsa, o zaman deməli, dərs saatları da artacaq, yəni müəllimlərə verilən dərs yükləri də artacaq. O hesab edir ki, bu halda isə müəllimin maaşı da mütləq şəkildə artmalıdır.
Kamran Əsədov: “Düşünürəm ki, ən optimal tədris ili 1 sentyabr 30 maydır, bu tədris ilinin tətbiqi daha effektiv olar”
Digər təhsil eksperti Kamran Əsədovun fikrincə də, tədris sentyabrın 1-də başlayarsa və mayın 31-də bitərsə müsbət nəticə verər, amma sentyabrın 1-də başlayıb iyunun 15-də bitərsə bu effektiv olmaz. “1 - 15 sentyabr dərs müddəti ilə 1 - 14 iyun dərs müddətini eyniləşdirmək, hava temperaturu eynidir demək boş və absurd fikirdir. Birincisi ona görə ki, 1 - 15 sentyabrda hava temperaturu yuxarıya doğru qalxmır, əksinə sərinləşir, temperatur daha yaxşı olur ki, bu da dərsə getmək üçün daha əlverişlidir. Amma 1 - 14 iyunda hava daha da istiləşir, temperatur hər gün yuxarıya doğru qalxır və tədris üçün əlverişsiz olur. Bundan başqa, 1 - 15 sentyabr təsirin başlaması üçündür. Yəni şagirdlər dərsə başlayır, enerjilidirlər, həvəslidirlər. 1 - 14 iyun isə tam əksinə, şagirdlər 9 ay, 32-34 həftə ərzində dərsə gəlib yorulublar, əlavə olunan vaxt isə onlara əlavə yükdür. Düşünürəm ki, ən optimal tədris ili 1 sentyabr 30 maydır, bu tədris ilinin tətbiqi daha effektiv olar”-deyə ekspert qeyd edib.
Leyla QARAXANLI
