Düşmən Füzuli rayonunu işğal edəndə və o, öz ailəsi ilə doğma ocağından didərgin salınanda, məcburi köçkün taleyi yaşamağa məhkum olanda cəmi 12 yaşı vardı.
Uşaqlığını əlindən alan bu faciənin ağrılarını, əzablarını 27 il canında, ürəyində gəzdirdi, amma bir gün də olsun Füzuliyə - doğma ocağına qovuşacağından ümidini kəsmədi.
“...düşmən evimizi dağıdıb, yer üzündən silib”
ARB-nin Operatorlar şöbəsinin müdiri Tacəddin Asifoğlu torpaqlarımız işğaldan azad edildikdən sonra Füzuliyə gedib evinə ilk bayraq sancaq sakindir.
T.Asifoğlu bizimlə söhbətində bildirdi ki, 27 ildən sonra ayaq açıb yeridiyi, dil açıb danışdığı, uşaqlığını qoyub gəldiyi, şirin və əziz xatirələrinin yaşadığı evin yerini çətinliklə tapıb, çünki düşmən onların da evini tamamilə darmadağın edib. “Füzuli rayonunda keçmiş Sovet küçəsində yaşayırdıq, sonra küçəmizin adı dəyişdi və 20 Yanvar adlandırıldı. Füzulidən didərgin düşəndə 12 yaşım vardı. Evimiz, məhəlləmiz, rayonumuz, məktəbimiz bir an da olsa yadımdan çıxmırdı, hər gün doğma yerlərə, əziz ocağıma, yurduma qovuşacağım günü həsrətlə, intizarla gözləyirdim. 12 yaşımda çıxdığım evimə 27 il sonra qayıtdım. Evimizin yerini çox çətinliklə tapdım, çünki düşmən evimizi dağıdıb, yer üzündən silib. Qürurlanıram ki, 27 ildən sonra doğulduğum evin həyətini tapıb, ora müqəddəs üçrəngli bayrağımızı sancdım, yurdumda bayrağımızı dalğalandıran ilk sakin oldum. Amma təəssüf ki, düşmən evlərimizi dağıdıb, məhv edib, yer üzündən silib. Bu məni çox ağrıtdı. Evimi yerində görməyəndə çox dərin sarsıntı keçirsəm də, sevinirəm ki, artıq yurdumuz, torpağımız azaddır. Biz bundan sonra yurd yerlərimizdə quruculuq işləri aparacağıq, Füzulini, digər azad edilmiş rayon, kənd və qəsəbələrimizi daha gözəl şəkildə abadlaşdıracağıq, bərpa edəcəyik”.
T.Asifoğlu bildirdi ki, Ali Baş Komandan İlham Əliyevin rəhbərliyilə müzəffər ordumuz, qəhrəman oğullarımız tərəfindən torpaqlarımızın azad edilməsi bizi öz doğma ocaqlarımıza qovuşdurdu. 27 ildən sonra öz ocağına, evinin həyətinə qovuşduğu üçün T.Asifoğlu ölkə başçısı İlham Əliyevə və müzəffər ordumuza minnətdarlıq edir, torpaqlarımızın azadlığı uğrunda şəhid olan qardaşlarımıza isə “ruhları şad olsun, nur içində yatsınlar” deyir…
T.Asifoğlunun timsalında öz ata ocağına, yurduna qovuşan hər bir vətəndaşımıza gözünüz aydın olsun, yurdunuzu yenidən qurun, dirçəldin, ev-eşiyinizi bərpa edib, onlara nəfəs, həyat verin deyirik.
İradə SARIYEVA
