Elşad Həsənov: “Proses belə davam edərsə, Fransa müstəmləkələrində etirazlar alovlanacaq”
Fransada şagirdlər təhsil şəraitinin yaxşılaşdırılması tələbi ilə bazar ertəsi günü də etiraz aksiyalarını davam etdirərək onlarla liseyin girişlərini bağlayıblar. Hakimiyyət orqanları gün ərzində Parisdə keçiriləcək nümayişə bir neçə min məktəbli və tələbənin qatılacağını gözləyirdi.
Həmkarlar ittifaqlarının bazar ertəsi yaydığı birgə bəyanatda bildirilir: “İndi hökumətə təzyiqi davam etdirməklə səfərbərliyi gücləndirməyin vaxtıdır”.
Tələbə assosiasiyasının rəhbəri Riyad Rani də etirazların davam etdirilməsinə çağırıb. Onun sözlərinə görə, aksiya iştirakçıları yalnız öz maraqlarını deyil, həm də müəllimlərin əmək şəraitinin yaxşılaşdırılmasını tələb edirlər. Həmkarlar ittifaqları noyabrın 17-də ölkə üzrə yeni ümummilli tətil və nümayişlərin keçirilməsinə çağırıblar. Hakimiyyət orqanlarının məlumatına görə, ötən cümə axşamı Fransanın müxtəlif şəhərlərində həyat xərclərinin artmasına qarşı keçirilən aksiyalarda təxminən 575 min nəfər iştirak edib. Həmkarlar ittifaqları isə nümayişçilərin sayının 1,5 milyona çatdığını bildiriblər.
Göründüyü kimi, Fransa bir birinə qarışıb və noyabrın 17-nə ümummilli etiraz aksiyası təyin edilib. Ancaq maraqlıdır, Fransanın müstəmləkələri bu fürsətdən niyə bəhrələnmirlər? Əslində bunun üçün yaxşı fürsət düşüb, nə etmək lazımdır?
Sözügedən məsələyə aydınlıq gətirən siyasi ekspert Elşad Həsənov baki-xeber.com-a açıqlamasında bildirdi ki, 2017-ci ildə Makron prezident olandan sonra Fransada bir neçə dəfə güclü etiraz aksiyaları keçirilib: “Ölkədə işçilərin əmək şəraitinin yaxşılaşdırılması və digər sosial tələblərlə bağlı çoxsaylı aksiyalar keçirilib. Ancaq məsələ ondadır ki, Yaxın Şərqdə baş verənlər, Ukraynada gedən müharibə dünya iqtisadiyyatına ciddi təsir edir. O cümlədən, bütün bunlar Fransa iqtisadiyyatına ciddi mənfi təsir göstərir. Məsələ ondadır ki, digər Avropa ölkələri ilə müqayisədə Fransada iqtisadi-sosial problemlər daha kəskindir. O səbəbdən Fransada ixtisasların miqyası daha böyükdür. Xüsusən təhsil sahəsində olan getdikcə daha qabarıq formada özünü göstərir. Məlum olur ki, Fransanın təhsilində problemlər çox dərindir. O baxımdan hesab edirəm ki, noyabrın 17-nə təyin edilən ümummilli tətil Fransada çox ciddi bir hadisə kimi yadda qalacaq. Fransa müstəmləkələrinə gəldikdə isə, bu, proseslərin gedişindən asılı olacaq. Proses belə davam edərsə, Fransa müstəmləkələrində etirazlar alovlanacaq. Özü də geridönməz forma alacaq. Dənizaşırı ölkələrdə narazılıqları basdırmaq mümkün olmayacaq. Həmdə yaxşı olardı ki, bu yöndə onlara dəstək verilsin”.
Vidadi ORDAHALLI
