Əbu-Dabidə Rusiya, ABŞ və Ukrayna arasında münaqişənin həlli ilə bağlı üçtərəfli danışıqların ilk günü başa çatıb. RBC və TASS mənbələrə istinadən xəbər verir ki, görüş dörd saatdan çox davam edib.
Danışıqlar 11 noyabr çərşənbə günü davam edəcək. RBC mənbələrinin məlumatına görə, görüşün ilk günü rus dilində keçirilib.
Rusiya nümayəndə heyətinə Prezidentin köməkçisi Vladimir Medinski rəhbərlik edib. Heyətin tərkibinə xarici işlər nazirlərinin müavinləri Sergey Ryabkov və Mixail Qaluzin, Baş Qərargah Baş İdarəsinin rəisi İqor Kostyukov və Baş Qərargah Baş Əməliyyat İdarəsinin rəis müavini Yuri Jiqarlovski daxildir.
Ukrayna nümayəndə heyətinə Rüstəm Umerov rəhbərlik edirib. Onun iştirakçıları arasında Ukrayna Prezident Administrasiyasının rəhbəri Kirilo Budanov, onun birinci müavini Sergey Kıslıtsya, "Xalqın Xidmətçisi" parlament fraksiyasının rəhbəri David Araxamia və hərbi rəhbərliyin nümayəndələri yer alır.
Danışıqlarda ABŞ-ı Prezidentin xüsusi elçisi Stiv Uitkoff, Donald Trampın kürəkəni Cared Kuşner və ABŞ-ın Avropa Komandanlığının komandanı, eyni zamanda NATO-nun Avropadakı Ali Müttəfiq Komandanı Aleksus Qrinkeviç təmsil edib.
Görüşün əvvəlində Kuşner bildirib ki, son iki ay ərzində Vaşinqton Moskva ilə Kiyev arasında əsas məsələlərdə fikir ayrılıqlarını azaltmağa nail olub. O, əlavə edib ki, Amerika tərəfi razılaşma üçün bir neçə təklif hazırlayıb və uyğun şərtlər daxilində razılığa gəlməyin mümkün olduğuna inanır.
Medinski danışıqların münaqişənin həllində irəliləyişə səbəb olacağına ümid etdiyini bildirib. Umerov öz növbəsində təhlükəsizlik zəmanətlərinin təmin edilməsini Ukraynanın prioritetlərindən biri kimi qeyd edib.
“Axios”un məlumatına görə, danışıqlar iki istiqamətdə təşkil olunur. Qrinkeviçin rəhbərlik etdiyi hərbi işçi qrupu təhlükəsizlik məsələlərini və mümkün atəşkəsin monitorinqi mexanizmlərini müzakirə edir. Siyasi qrup ərazi mübahisələrini həll edir.
Hazırkı raund Rusiya, ABŞ və Ukrayna arasında fevral ayından bəri ilk üçtərəfli görüşdür. Nümayəndə heyətləri əvvəllər 23-24 yanvar və 4-5 fevral tarixlərində Əbu-Dabidə, 17-18 fevral tarixlərində isə Cenevrədə danışıqlar aparmışdılar.
Tahir TAĞIYEV
