Müasir müharibələrdə ən son texnologiyalar, pilotsuz uçuş aparatları və yüksək dəqiqlikli silahlar həlledici rol oynasa da, hər bir döyüşün və bütövlükdə qələbənin taleyini müəyyən edən əsas amil insan faktorudur. Zəfərimizi müəyyən edən Azərbaycan əsgərinin mərdliyi, vətənsevərliyi və fədakarlığıdır.
Azərbaycan əsgərinin mərdliyi və vətənsevərliyi olmasaydı texnika özlüyündə qələbəni təmin edə bilərdimi?
Ekspertlər hesab edirlər ki, qələbəni texnika deyil, onu idarə edən insanın iradəsi təmin edir və bu baxımdan, Azərbaycan əsgərinin mərdliyi, qəhrəmanlığı və Vətən sevgisi olmasaydı, müasir hərbi texnika özlüyündə qələbəni təmin edə bilməzdi.
Texnika müharibənin gedişində mühüm üstünlük yarada, döyüş imkanlarını genişləndirə bilər. Lakin heç bir silah, heç bir hərbi vasitə Vətən uğrunda döyüşən əsgərin iradəsini, cəsarətini, fədakarlığını və mənəvi gücünü əvəz edə bilməz.
Azərbaycanın Vətən müharibəsində qazandığı tarixi Zəfər bir daha sübut etdi ki, müasir müharibələrdə texnoloji üstünlük nə qədər əhəmiyyətli olsa da, qələbənin əsas dayaqlarından biri insan amilidir. Torpağın azadlığı uğrunda canından keçməyə hazır olan, ölümün gözünə dik baxan, milli qürurunu və Vətən sevgisini hər şeydən üstün tutan əsgər qələbənin canlı qüvvəsidir.
Texnika döyüşün imkanlarını müəyyənləşdirir, əsgərin iradəsi isə həmin imkanları qələbəyə çevirir. Azərbaycan əsgərinin qəhrəmanlığı, Ali Baş Komandanın rəhbərliyi, xalqın birliyi və milli həmrəylik Zəfərimizin mühüm amilləri oldu.
Vətən müharibəsinin tarixi dərsi budur ki, silahın gücü ilə insanın mənəvi gücü birləşəndə, Vətən sevgisi ilə hərbi peşəkarlıq vəhdət təşkil edəndə qarşıya qoyulan ən çətin məqsədlərə belə nail olmaq mümkündür.
Ən müasir raket və ya dron belə torpağı fiziki olaraq işğaldan azad edə bilməz. Şuşa kimi alınmaz qalanı işğaldan azad edən sıldırım qayalara əlbəyaxa döyüşlərlə, canı-qanı bahasına dırmaşan və orada bayraq sancan məhz Azərbaycan əsgərinin iradəsi və cəsarəti idi.
Ən mürəkkəb və intellektual silah sistemlərini idarə edən, onlardan strateji hədəflərə qarşı dəqiqliklə istifadə edən yenə də vətənini sevən, yüksək peşəkarlığa malik Azərbaycan zabiti və əsgəridir.
Texnika sadəcə bir vasitədir. Əgər o vasitəni idarə edən insanda yüksək döyüş ruhu, torpaq sevgisi və qələbə əzmi olmasa, ən bahalı silahlar belə səmərəsiz qalar. Azərbaycan əsgəri ölümün gözünə dik baxaraq, vətən naminə şəhadəti gözə alaraq döyüşürdü.
Akif Nağı:"Nə qədər müasir və yüksək texnologiyalı silahlar, nə qədər güclü hərbi texnika və silah-sursat olsa da..."
Azad Vətən Partiyasının sədri, tarix üzrə fəlsəfə doktoru, dosent Akif Nağı baki-xeber.com-a bildirdi ki, bütün dövrlərdə müharibələrin taleyini müəyyən edən əsas amillərdən biri insan ruhu, vətənpərvərlik və qəhrəmanlıq olub. "Nə qədər müasir və yüksək texnologiyalı silahlar, nə qədər güclü hərbi texnika və silah-sursat olsa da, onları idarə edən insanların vətənpərvərlik ruhu, döyüş əzmi və qələbəyə inamı yoxdursa, həmin texnikanın imkanlarından tam istifadə etmək mümkün deyil.
Ona görə də, ilk növbədə, Azərbaycan əsgərinin yüksək mənəvi-psixoloji hazırlığı, Vətənə bağlılığı, mübarizə əzmi və qəhrəmanlığı qələbənin ən mühüm şərtlərindən biri idi. Hərbi texnika və silahlar müharibənin gedişinə ciddi təsir göstərir, lakin onların effektivliyini təmin edən əsas qüvvə insandır".
A.Nağı vurğuladı ki, Azərbaycanın torpaqlarının işğaldan azad edilməsi uğrunda apardığı müharibə bu həqiqəti bir daha əyani şəkildə nümayiş etdirdi. "Şəhidlərimizin göstərdiyi misilsiz qəhrəmanlıq, əsgərlərimizin döyüş meydanında nümayiş etdirdiyi fədakarlıq xalqımızın milli ruhunun, vətənpərvərlik duyğusunun nə qədər güclü olduğunu ortaya qoydu. Vətən uğrunda şəhid olmağı belə şərəf və ucalıq hesab edən insanların mənəvi gücü Azərbaycanın qələbəsində mühüm rol oynadı.
Müharibə zamanı insanların orduya könüllü şəkildə qoşulmaq istəyi, səfərbərlik məntəqələrinə müraciət etməsi, döyüş meydanında fərdi qəhrəmanlıq nümunələri göstərməsi xalqımızın Vətənə bağlılığının bariz ifadəsi idi. Azərbaycan əsgəri yalnız hərbi tapşırığı yerinə yetirmirdi, o, doğma torpağını, ailəsini, xalqının gələcəyini və milli qürurunu müdafiə edirdi.
Ermənistan ordusunda isə fərarilik və döyüş meydanını tərk etmə halları müharibənin gedişində ciddi problemlərdən biri kimi ortaya çıxmışdı. Bu müqayisə göstərir ki, hərbi qüvvənin yalnız texniki imkanları deyil, onun mənəvi hazırlığı, döyüş əzmi və məqsəd uğrunda mübarizə iradəsi də son dərəcə vacibdir.
Şuşanın azad edilməsi bu baxımdan xüsusi əhəmiyyət daşıyır. Azərbaycan əsgərlərinin mürəkkəb dağlıq şəraitdə, son dərəcə çətin döyüş əməliyyatları zamanı nümayiş etdirdikləri qəhrəmanlıq hərb tariximizin ən parlaq səhifələrindən biridir. Şuşa əməliyyatı göstərdi ki, yüksək döyüş ruhu, cəsarət, peşəkarlıq və qətiyyət birləşdikdə, ən çətin hərbi vəzifələrin öhdəsindən gəlmək mümkündür.
Əlbəttə, qələbənin əldə olunmasında hərbi strategiyanın, taktikanın, müasir silahların, ordunun təşkilatlanmasının və komandanlığın rolu da danılmazdır. Lakin bütün bu amilləri hərəkətə gətirən, onları qələbəyə aparan əsas qüvvə insandır.
Azərbaycanın Vətən müharibəsində əldə etdiyi Zəfər bir daha sübut etdi ki, müharibələrin taleyini yalnız silahlar deyil, həmin silahları idarə edən insanların iradəsi, vətənpərvərliyi, qəhrəmanlığı və qələbə əzmi müəyyən edir"-deyə A.Nağı qeyd etdi.
İradə SARIYEVA
