ABŞ Mərkəzi Komandanlığı İranın quru sərhədləri və Xəzər dənizi vasitəsilə silahların, ikili təyinatlı texnologiyaların və sanksiya tətbiq edilmiş digər malların daşınmasının qarşısını almaq məqsədilə "Dəmir Qapı" adlı xüsusi işçi qrupun yaradıldığını elan edib. Şənbə günü bu təşəbbüsü açıqlayan CENTCOM, onu İrana qarşı mövcud dəniz blokadasının genişləndirilməsi kimi təqdim edib. CENTCOM rəsmisi admiral Bred Kuper bildirib ki, "Dəmir Qapı" işçi qrupun yaradılması İrana qarşı tətbiq etdikləri effektiv dəniz blokadasının uğurlu nəticələrinə əsaslanır. Kuperin sözlərinə görə, işçi qrupun digər ABŞ hökumət qurumları ilə əməkdaşlığı "Tehranın terrorizmi maliyyələşdirmək, silah istehsalı müəssisələrini bərpa etmək və hərbi ehtiyatlarını yeniləmək imkanlarını məhdudlaşdırmağa" kömək edəcək. Təxminən 20 mülki və hərbi əməkdaşdan ibarət olacaq yeni işçi qrupu Floridada yerləşəcək. Onun səlahiyyət dairəsinə İranın quru sərhədləri və Xəzər dənizi vasitəsilə qabaqcıl silah sistemlərinin, ikili təyinatlı texnologiyaların, sanksiya altındakı materialların daşınmasının, eləcə də qanunsuz maliyyə axınlarının qarşısının alınması daxildir. CENTCOM işçi qrupun öz missiyasını yerinə yetirmək üçün hansı konkret üsullardan istifadə edəcəyini açıqlamayıb, həmçinin onun səlahiyyətlərinə hərbi əməliyyatların keçirilməsinin daxil olub-olmadığına aydınlıq gətirməyib. Dəniz blokadası ilə üzləşən İran getdikcə daha çox quru ticarət yollarına üz tutur. Xüsusilə, Tehranın ən böyük ticarət tərəfdaşı olan Çin Mərkəzi Asiya vasitəsilə dəmir yolu daşımalarını artırıb. "CBS News" telekanalının məlumatına görə, İran həmçinin Rusiya ilə quru yolları və Xəzər dənizi vasitəsilə əhəmiyyətli ticarət əlaqələri saxlayır; bu marşrut Rusiyanın cənub-qərb bölgəsi ilə İranın şimalı arasında birbaşa əlaqə yaradır. ABŞ rəsmiləri bildirirlər ki, dəniz blokadası artıq İrana təxminən 25 milyard dollar dəyərində neft satmağa mane olub; bu neftin böyük bir hissəsi Asiya bazarlarına göndərilməli idi.
SAMİRƏ
