Fransada şagirdlər təhsil şəraitinin yaxşılaşdırılması tələbi ilə bazar ertəsi günü də etiraz aksiyalarını davam etdirərək onlarla liseyin girişlərini bağlayıblar. Bu barədə AFP agentliyi məlumat yayıb.
Ölkənin Təhsil Nazirliyinin məlumatına görə, etiraz aksiyaları təxminən 3700 liseydən 49-nu əhatə edib. Həmin təhsil müəssisələrində 15-18 yaşlı yeniyetmələr təhsil alır.
Hakimiyyət orqanları gün ərzində Parisdə keçiriləcək nümayişə bir neçə min məktəbli və tələbənin qatılacağını gözləyirdi.
Sentyabr ayında başlayan tələbə etirazları son həftələrdə həyat xərclərinin artmasına qarşı daha genişmiqyaslı aksiyalara çevrilib. Bəzi nümayişlər radikal düşüncəli iştirakçıların törətdiyi zorakılıq halları və polisin gücdən həddindən artıq istifadə etməsi ilə bağlı ittihamlarla müşayiət olunub.
Tələbə və müəllim həmkarlar ittifaqlarının bazar ertəsi yaydığı birgə bəyanatda bildirilir: “İndi hökumətə təzyiqi davam etdirməklə səfərbərliyi gücləndirməyin vaxtıdır”.
Tələbə assosiasiyasının rəhbəri Riyad Rani də etirazların davam etdirilməsinə çağırıb. Onun sözlərinə görə, aksiya iştirakçıları yalnız öz maraqlarını deyil, həm də müəllimlərin əmək şəraitinin yaxşılaşdırılmasını tələb edirlər.
Hökumət artıq bir sıra tədbirlər elan edib. Bunlara ali məktəblərə qəbul üçün abituriyentlərin seçimini həyata keçirən onlayn platformanın mərhələli şəkildə dəyişdirilməsi və ən çox maliyyə çətinliyi yaşayan bəzi təhsil müəssisələrinə maddi yardım ayrılması daxildir. Lakin şagird və tələbələr bu addımları yetərli hesab etmirlər.
Həmkarlar ittifaqları arasında da narazılıq davam edir. Onların nümayəndələrindən biri hökumətin inflyasiya nəzərə alınmaqla həyata keçirilən standart indeksasiyaya əlavə olaraq minimum əməkhaqqını 0,6 faiz artırmaq vədini “qırıntı” adlandırıb.
Həmkarlar ittifaqları noyabrın 17-də ölkə üzrə yeni ümummilli tətil və nümayişlərin keçirilməsinə çağırıblar.
Hakimiyyət orqanlarının məlumatına görə, ötən cümə axşamı Fransanın müxtəlif şəhərlərində həyat xərclərinin artmasına qarşı keçirilən aksiyalarda təxminən 575 min nəfər iştirak edib. Həmkarlar ittifaqları isə nümayişçilərin sayının 1,5 milyona çatdığını bildiriblər.
Etirazlar gələn il keçiriləcək prezident seçkilərinə hazırlıq dövrünə təsadüf edir. Həmin seçkilərdə Emmanuel Makronun varisi müəyyənləşməlidir. Bununla yanaşı, hökumət dövlət borcunu azaltmaq zərurəti ilə üzləşib. Bu vəziyyət büdcə xərclərinin artırılması hesabına etirazçıların tələblərinin yerinə yetirilməsi imkanlarını məhdudlaşdırır.
Tahir TAĞIYEV
