Kamran Seyfullazadə bu dünyaya mənsub olduğu xalqın zəngin mənəviyyatını, əxlaqi dəyərlərini şəxsiyyətində yaşatmaqla həyatda kişi kimi ləyaqətli ömür sürmək, xeyirxah əməlləri hesabına layiqli ad qoymaq üçün gəlmişdi. Belə də oldu. Yəni şirin canını vətənə, torpağa qurban verməklə nəsillərə nümunə ola biləcək şərəfli bir ömür yolu keçdi. Göstərdiyi rəşadət, hünər 21 yaşında onu ölməzliyə qovuşdurdu...
İndi adı minlərlə adamın dilində qürurla çəkilən, doğma yurda sədaqət mücəssəməsi olaraq qəlblərə köç edən Kamran Seyfullazadə Astara şəhərində boya-başa çatmışdı. Vətənpərvər, elinə, torpağına ürəkdən bağlı olan vətənin dağ vüqarlı oğlunu özünü bilən gündən erməni dığalarının Odlar yurdu Azərbaycanın ayrılmaz hissəsi Dağlıq Qarabağda və onun ətrafında apardığı işğalçılıq siyasəti rahat buraxmırdı, hər an düşmənlə üz-üzə gəlib onu əzmək istəyirdi. Məhz buna görə də İkinci Qarabağ üharibəsi başlanan kimi əlinə könüllü silah alıb Vətənin harayına vaxtında özünü yetirən oğullardan biri də Kamran oldu.
O, Füzulinin, Cəbrayılın, Qubadlının, Suqovuşanın, Hadrutun, Şuşanın, Laçının azadlığı uğrunda əsl hünər göstərir. Şuşada əlbəyaxa döyüşdə 30-dan çox erməni dığasını o dünyaya göndərir. Həm də dəfələrlə yaralı əsgərlərə qan verir. Daşaltıda ağır əməliyyat zamanı döyüş yoldaşını xilas etmək üçün gedərkən isə köksü vətən məhəbbətli igid özü də onunla birlikdə halal torpağında şəhidlik zirvəsinə ucalır...
K. Seyfullayev ölümündən sonra Azərbaycan Prezidentinin Sərəncamına əsasən beş -“Vətən uğrunda” , eləcə də Cəbrayılın, Xocavəndin, Füzulinin, Suqovuşanın azad edilməsi uğrunda medallara layiq görülüb .
Bəli, Astaranın mərd oğlu Kamran vətən, torpaq sevgisi ilə ömrünü başa vurdu. Onun qısa, lakin mənalı həyat yolu örnək olaraq qərinələr boyunca böyük ehtiramla xatırlanacaq.
Zəfər ORUCOĞLU
Azərbaycan Jurnalistlər Birliyinin üzvü
