Qazi və şəhid ailələrinə psixoloji yardım işinə qardaş ölkənin psixoloqları da qoşuldu, öz psixoloqlarımızdan səs yoxdur...

img

Məlum olduğu kimi, Vətən müharibəsi nəticəsində mənəvi-psixoloji problemlər yaşayan vətəndaşlarımızın psixoterapevtik müalicəsinin təşkili məqsədilə Türkiyədən dəvət olunmuş mütəxəssislər yanvarın 20-də ölkəmizə gəlib.

Fövqəladə Hallar Nazirliyinin saytında gedən məlumata görə, FHN-nin dəvəti ilə gələn peşəkar klinik-psixoloq və psixoterapevtlər Vətən müharibəsi nəticəsində psixi problemlər yaşayan vətəndaşların psixoloji reabilitasiyasının səmərəli təşkilinə yardımçı olacaqlar. Eyni zamanda, qazilərin, şəhid ailəsi üzvlərinin, terror aktlarından fiziki-mənəvi zərər görmüş insanların psixoterapevtik müalicəsinin təşkili məqsədilə həmin mütəxəssislərin Fövqəladə Hallar Nazirliyinin psixoloq-mütəxəssisləri ilə birgə fəaliyyət göstərməsi, həmçinin, təcrübə mübadiləsinin aparılması nəzərdə tutulur.

Vətəndaşlar Fövqəladə Hallar Nazirliyinin “112” “qaynar xətt”inə zəng edərək mütəxəssislərlə görüş vaxtını təyin edib, ödənişsiz şəkildə müvafiq psixoterapevtik yardım ala bilərlər.

Vətən müharibəsi nəticəsində mənəvi-psixoloji problemlər yaşayan vətəndaşlarımızın psixoterapevtik müalicəsinin təşkili məqsədilə Türkiyədən ölkəmizə mütəxəssislərin gəlməsi müsət hadisədir və bu bizə qardaş ölkənin göstərdiyi növbəti dəstəyin nümunəsidir.

Qeyd edək ki, 44 günlük Vətən müharibəsində Türkiyədən böyük bir həkim briqadası, dəstələri gəlmişdi, onlar yaralı hərbçilərimizə kifayət qədər kömək göstərdilər. Əlbəttə, bütün bunlar təqdir olunur, onlara təşəkkür edirik. Bu özlüyündə çox müsbətdir və qardaş ölkənin dəstəyi bizə böyük güc, stimul verir.

Burada diqqətçəkən başqa bir məsələ var. Azərbaycanda kifayət qədər özünü psixoterapevt, psixoloq-həkim elan edən şəxslər var ki, gecə-gündüz reklam olunan bu adamların səsləri eşidilmir.  Halbuki, onlar özlərini bütün resurslarda reklam etməkdən yorulub usanmırlar. Ölkəmizdə bu qədər  psixoterapevt, psixoloq-mütəxəssis var, onlar nə üçün Vətən müharibəsi iştirakçılarına könüllü yardım göstərmirlər?

Ekspertlər deyirlər ki, əslində, Vətən müharibəsi nəticəsində mənəvi-psixoloji problemlər yaşayan vətəndaşlarımıza ilk olaraq ölkəmizdəki bu sahənin mütəxəssisləri dəstək göstərməli, yardım etməlidirlər. Onlar belə adamları axtarıb tapmaq üçün təşəbbüslər göstərməli və bu cür ailələrə hər cür mənəvi-psixoloji dəstək verməlidirlər.

  • Adil Qeybulla: Özlərini psixoloq adlandıran həmin adamları da Vətən müharibəsi nəticəsində mənəvi-psixoloji problemlər yaşayan vətəndaşlarımıza yardım etməyə...

Professor Adil Qeybullanın fikrincə, belə adamlar hər gün özlərini yerli telekanallarda, internet resurslarında, sosial şəbəkələrdə reklam edir, psixoterapevt, psixoloq olduqlarını iddia edirlər, amma Vətən müharibəsi nəticəsində mənəvi-psixoloji problemlər yaşayan vətəndaşlarımıza yardım etməyə təşəbbüs göstərmirlər. “Gecə-gündüz telekanallarda, internetdə özlərini reklam edən kifayət qədər adam var ki, psixoloq, psixoterapevt olduqlarını deyir, sertifikatlarını göstərir. Amma indiyə kimi heç kəs onların harada təhsil aldıqlarını, bu sertifikatları haradan əldə etdiklərini araşdırmayıb. Hesab edirəm ki, özlərini psixoloq adlandıran həmin adamları da

Vətən müharibəsi nəticəsində mənəvi-psixoloji problemlər yaşayan vətəndaşlarımıza yardım etməyə cəlb etmək lazımdır. Çünki belə bir vaxtda heç bir mütəxəssis kənarda qalmamalı, həmin şəxslərə əlindən gələn dəstəyi, mənəvi-psixoloji yardımı göstərməlidir” - deyə mütəxəssis bildirdi.

  • Rafis Bağırov: “Yerli mütəxəssislərə əməkhaqqı verməklə bu prosesə cəlb etmək olar, yoxsa heç kəs bu işə könüllü qoşulmayacaq”

Tanınmış həkim-terapevt Rafis Bağırov bizimlə söhbətində bildirdi ki, məsələyə bir qədər fərqli yanaşmaq lazımdır. Türkiyəli mütəxəssislərin vətəndaşlarımıza göstərdiyi dəstəyi müsbət qiymətləndirən R.Bağırov hesab edir ki, onlarla bərabər bizim mütəxəssislər də prosesdə iştirak etməlidirlər. Psixoterapevtlərimizin, psixoloq-mütəxəssislərimizin Vətən müharibəsi nəticəsində mənəvi-psixoloji problemlər yaşayan vətəndaşlarımıza psixoloji-mənəvi yardıma könüllü təşəbbüs göstərməməsinə gəlincə, R.Bağırovun sözlərinə görə, onları bu işə cəlb etmək və onların əməyini stimullaşdırmaq lazımdır. Bütün hallarda, psixoloji yardım məsələsinin çox ciddi və ağır, eyni zamanda da uzun çəkən proses olduğunu deyən həkim hesab edir ki, bizim bu sahə üzrə mütəxəssislərimizə hər hansı bir çağırış edilərsə, onlar buna heç zaman laqeyd qalmaz. “Türkiyədən Vətən müharibəsi nəticəsində mənəvi-psixoloji problemlər yaşayan vətəndaşlarımıza psixoloji-mənəvi dəstək üçün gələn mütəxəssislərin addımlarını yüksək dəyərləndirirəm. Bu bizə növbəti qardaş dəstəyidir. Bizim mütəxəssislərə gəlincə, bizdə kifayət qədər bu sahədə ixtisaslı kadr var, sadəcə, onları bu prosesə cəlb etmək lazımdır. Mənə elə gəlir ki, dövlət tərəfindən xaricdən dəvət edilən mütəxəssislərə maliyyə vəsaiti ayrılır...

Hesab edirəm ki, yerli mütəxəssislərin də bu işə cəlb edilməsi lazımdır və onların əməyi stimullaşdırılmalıdır. Çünki hər bir xəstə ilə işləmək bir gün, iki gün tələb etmir, buna bəzən aylar kifayət etmir. Biz müharibədən çıxmışıq və müharibənin təsiri ilə psixoloji travma alan insanlarımız çoxdur, onlar arasında hərbçilər, qazilər də, sadə vətəndaşlar da var. Yerli mütəxəssislərin əməyi stimullaşdırılmasa, onlar uzaqbaşı bir neçə dəfə ödənişsiz olaraq xəstəyə baxa bilərlər. Bir insanın psixologiyasını bərpa etmək çətin prosesdir və burada da xəstələr bir deyil, beş deyil, çoxdur.  Bu mütəmadi olaraq müəyyən edilmiş qrafik üzrə qruplar şəklində insanların psixoloji durumunun yaxşılaşdırılması üçün aparılan seanslardır. Özü də çox ağır prosesdir. Ona görə də yerli mütəxəssislərə əməkhaqqı verməklə bu prosesə cəlb etmək olar, yoxsa heç kəs bu işə könüllü qoşulmayacaq. Doğrudur, burada vətənpərvərlik amili də var, o insanlar bizə görə bu problemi qazanıblar, dövlətimizin ərazi bütövlüyü uğrunda sağlamlıqlarından keçiblər. Bütün bunlar faktdır. Amma reallıq ondan ibarətdir ki, bizim mütəxəssislərin bu işə qoşulması üçün onlara maaş verilməlidir ki, onlar öz işlərini canla-başla görsünlər” - deyə R.Bağırov qeyd etdi.

İradə SARIYEVA

Son xəbərlər