Yanvarın 18-dən Azərbaycanda koronavirus əlyehinə vaksinasiya başlayıb. Ölkədə tibb işçilərinin koronavirus infeksiyasına qarşı peyvəndlənmə prosesi davam edir. Bakı Sağlamlıq Mərkəzində səhiyyə naziri Oqtay Şirəliyev, TƏBİB sədri Ramin Bayramlı və səhiyyə nazirinin müavini Elsevər Ağayev peyvənd olunub. Daha sonra TƏBİB-in şöbə müdiri Yaqut Qarayeva və səhiyyə nazirliyinin şöbə müdiri Teymur Musayev də vaksinasiya prosesinə qatılıb.
Tibb sahəsini əhatə edən yüksək vəzifəli məmurların peyvənd olunmasına baxmayaraq, sadə əhali arasında koronavirus peyvəndlərinə inam aşağıdır. Bunu sosial şəbəkələrdə aparılan müzakirələrdən də sezmək mümkündür. Bir çox vətəndaşlarımız bildirir ki, hətta pulsuz verilsə belə, vaksin qəbulundan imtina edəcəklər. Əhalimizdə vaksinə olan inamsızlıq nə ilə bağlıdır?
“Sağlamlığa Xidmət” İctimai Birliyinin icracı direktoru Pərvanə Vəliyeva “Bakı-Xəbər”ə açıqlamasında bildirdi ki, kütləvi peyvəndləmədən ehtiyatlanmaq lazım deyil: “Sizin dediyiniz tendensiya yalnız bizim ölkədə deyil, bütün dünyada mövcuddur. Bu yaxınlarda bir hesabatla tanış oldum. ABŞ-da rəyi soruşulan tibb bacılarının 40 faizi peyvənd vurulmasına razı olduqlarını bildirib. Ancaq sadə əhali arasında keçirilən rəy sorğusunun nəticələrindən məlum olub ki, insanların çoxu vaksinə görə tərəddüd edir. Yalnız 5 faiz insan buna könüllü razı olduğunu bildirib. Bunun obyektiv səbəbləri var. Çünki pandemiya dönəmində vaksinlərlə bağlı çoxlu dezinformasiyalar yayıldı. Dedilər ki, pandemiya bir oyundu, bunu kütləvi çipləmyə görə edirlər. Bütün bu informasiyaların insan psixikasına təsiri olub. Azərbaycandan da bu yan keçməyib. Ötən əsrin 90-cı illərində bizdə difteriyaya qarşı kütləvi peyvəndlənməyə start verildi. Eyni yanaşma onda da qoyuldu. Əhalinin əksər təbəqəsi peyvənddən imtina edirdi. Ancaq zaman göstərdi ki, ən doğru yol peyvəndlənmə olub. Çünki həmin xəstəliyin Azərbaycanda kəskin azalması baş verdi. Koronavirus epidemiyası yeni sayılır. Belə qısa müddətdə bu pandemiya ilə bağlı peyvəndin tapılması da sadə insanlarda inamsızlıq yaradır”.
Ekspertin sözlərinə görə, ilkin peyvəndlənməsi nəzərdə tutulan kateqoriyaya aid insanlar prosesdən keçsələr, sadə əhali də buna öyrəşəcək: “Kütləvi panika var. Bunu aşmaq üçün düzgün maarifləndirmə aparılmalıdır. Bəzən bu yöndə reklamlar elə olur ki, əhali arasında anlaşılmazlıq yaranır. Yəni bu istiqamətdə sistemli fəaliyyət ortaya qoyulmalıdır ki, biz qlobal dünya üçün olan bu çağırışdan kənarda qalmayaq”.
Məhəmmədəli QƏRİBLİ
