Samir Adıgözəlli: “Avropa ölkələrindəki səfirliklərimiz də fəalliyətə keçməli və belə bir abidənin sökülməsilə bağlı qəbul edilən məhkəmə qərarını dəstəkləməlidirlər”
Ermənilərin növbəti özbaşınalığına Almaniyada hüquqi qiymət verilib. Qondarma “soyqırım” iddiaları ilə bağlı elan olunan tarix yaxınlaşdıqca, bu özbaşınalıqların həcmi daha da genişlənir. Ermənistan mətbuatının yazdığına görə, bir neçə gün əvvəl heç bir rəsmi icazə alınmadan Köln şəhərində qondarma “soyqırım”ın anılması məqsədilə ucaldılan memorialın sökülməsi ilə bağlı yerli məhkəmə aprelin 19-da qərar qəbul edib.
Ancaq bu saxtakar işin təşəbbüskarı olan bəzi aktivistlər məhkəmənin qərarı ilə razılaşmaq istəmirlər və onlar bu qərardan daha yuxarı məhkəmə instansiyalarına müraciət ünvanlamağa hazırlaşırlar. Ermənistan mətbuatı Almaniya məhkəməsinin qərarını söz, ifadə azadlığına müdaxilə kimi dəyərləndirir. Ermənilərin bu çirkin niyyətinin baş tutmaması üçün Azərbaycan tərəfi hansı addımları atmalıdır?
Dünya Azərbaycanlıları Konqresi icra aparatının rəhbəri Samir Adıgözəlli qəzetimizə bildirdi ki, yaranmış vəziyyətlə bağlı dərin təəssüf hissi keçirir: “Bəlkə biz bu hadisə barədə heç məlumat tutmayaydıq. Gərək Ermənistan mətbuatı yaza ki, biz ayılaq? Köln şəhərində və ümumiyyətlə, Almaniyada kifayət qədər soydaşımız yaşayır. Orada Anadolu türklərinin də sayı çoxdur. Necə olur ki, Kölnün ən görkəmli yerində belə bir saxta abidə ucaldılır, bizim diasporumuzun və ya səfirliyimizin bundan xəbəri olmur? Əslində, biz kecikmişik. Həmin abidənin bünövrəsi töküləndə biz buna kəskin etiraz etməliydik. Çox təəssüf ediəm ki, məhz Almaniyada yaşayan bəzi mühacirlərimiz tez-tez Azərbaycanın Səfirliyi qarşısında etiraz aksiyası keçirməyə cəhd edir. Təsəvvür edirsinizmi, gedib ermənilərə etirazlarını bildirməyə qorxurlar. Buna baxmayaraq, Köln məhkəməsi bizim üzərimizə böyük “haqq” qoymuş olub. Əslində, bizim yerimizə haqqın, ədalətin bərpasına onlar nail olub. Çox təşəkkür edirəm ki, belə qərar çıxarılıb. Ancaq bilirsiniz ki, Almaniyada məhkəmə ierarxiyası çoxpilləlidir. Onların daha yuxarı instansiyalara müraciət etmək fikri var. Bizim diaspor təşkilatlarımız bu istiqamətdə fəallığı artırmalı və məhkəmənin qərarına ictimai dəstək verməlidirlər. Bununla yanaşı, Avropa ölkələrindəki səfirliklərimiz də fəallığı artırmalı və belə bir abidənin sökülməsilə bağlı qəbul edilən məhkəmə qərarını dəstəkləməlidirlər. Almaniyada yaşayan türk diasporunu da bu işə yaxından səfərbər etmək lazımdır. Biz də öz xəttimizlə lazım olan tədbirləri həyata keçirəcəyik. Köln şəhərinin rəhbərliyinə, işə baxacaq yuxarı məhkəmə instansiyalarına məktublar ünvanlayıb bildirməliyik ki, belə bir abidənin ucaldılması üçün heç bir əsas yoxdur. Ermənilərin bu yöndə olan iddiaları saxtakar, təhrif edilmiş faktlara əsaslanır. Bu cür hallar Almaniyanın daxilindəki etnik münasibətləri daha da kəskinləşdirə bilər. Çünki həmin ölkədə milyonlarla türk yaşayır”.
Son məlumatlara görə, Köln şəhərində bir qrup alman və erməni tərəfindən qanunsuz tikilmiş abidə Köln Bələdiyyəsi tərəfindən sökülüb. Məhkəmə də abidənin sökülməməsinə dair bütün etirazları rədd edib.
Məhəmmədəli QƏRİBLİ
