Şəlalə Cəsur: "İlk dəfədir bu sayda beynəlxalq təşkilat ölkəmizdə bir araya gəlir"
Paytaxtımızda IV Ümumdünya Mədəniyyətlərarası Dialoq Forumu öz işinə başlayıb. "Mədəniyyətlərarası dialoqun inkişafı: İnsan təhlükəsizliyi, sülh və davamlı inkişaf üçün yeni imkanlar" mövzusunda təşkil olunan forum çərçivəsində Azərbaycan tərəfinin təklifi ilə ilk dəfə Beynəlxalq Təşkilatların Yüksək Səviyyəli Toplantısı, Dünya Forumu, Nazirlər Görüşü də keçiriləcək.
Forum çərçivəsində keçiriləcək sessiyalar insan təhlükəsizliyi, davamlı inkişaf, miqrasiya, mədəniyyətlər və dinlərarası dialoq, ekstremizmə qarşı mübarizə, qaçqın və miqrantlara münasibət, gənclərin və təhsilin mədəniyyətlərarası dialoqda rolu, ərzaq təhlükəsizliyi kimi mövzuları əhatə edəcək.
Ümumdünya Mədəniyyətlərarası Dialoq Forumunda Bolqarıstanın vitse-prezidenti, UNESCO, İSESCO, İslam Əməkdaşlıq Təşkilatı, QDİƏT, İRSİKA, Ərəb Maqreb Birliyi, Türkdilli Dövlətlərin Əməkdaşlıq Şurası və TÜRKSOY-un baş katibləri, Malinin prezidenti və birinci xanımı, Efiopiya və Ruandanın birinci xanımları, Türkiyə, Rusiya, Gürcüstan, Qətər, Makedoniya, Misir, Efiopiya, İraq, Cənubi Sudan, Sudan, Mavritaniya, Monteneqro, Seyşel Adaları, Tacikistan və Keniyanın mədəniyyət nazirləri iştirak edir.
Xatırladaq ki, Forum Azərbaycan Prezidenti İlham Əliyev tərəfindən 2008-ci ildə irəli sürülmüş "Bakı prosesi" təşəbbüsü çərçivəsində artıq 4-cü dəfədir təşkil olunur.
Göründüyü kimi, Azərbaycan beynəlxalq tədbirlərin təşkilinə yeni format vermək ənənəsini ortaya qoymuş olur. Bu forum çərçivəsində dəvətli olan beynəlxalq təşkilatların rəhbərlərinin görüşünü keçirmək istəyir. Bundan əvvəl keçirilən Avropa mədəniyyət nazirlərinin görüşünə İslam dünyası ölkələrinin nazirlərini dəvət edib. Daha sonra isə İslam dünyası ölkələri nazirlərinin görüşünə avropalı nazirləri dəvət etdi. Yaradılan bu ənənəni necə qiymətləndirmək olar?
Ekspert Şəlalə Cəsurun sözlərinə görə, Bakıda keçirilən forum bir çox yeni təşəbbüslərilə yadda qalacaq: "Forumun əhatə dairəsi çox genişdir. Xüsusilə də dediyiniz məsələlərlə bağlı yeni formatların təşkili daha vacibdir.
Birinci mühüm təşəbbüs forum çərçivəsində ilk dəfə olaraq Beynəlxalq Təşkilatların Yüksək Səviyyəli Toplantısının keçirilməsidir. Məqsəd Azərbaycanın təşəbbüsü ilə dünyanın siyasi, mədəni, hərbi, iqtisadi, sosial, maliyyə və digər beynəlxalq təşkilatlarını "Mədəniyyətlərarası dialoq, sülh, insan təhlükəsizliyi və davamlı inkişaf" mövzusunda ilk dəfə bir araya gətirərək birgə fəaliyyət mexanizmlərini müəyyənləşdirməkdən ibarətdir. Bununla da ölkəmiz həm mədəniyyətlərarası dialoq mövzusunda beynəlxalq təşkilatlar arasında əməkdaşlıq mühiti yaradır, həm də bu istiqamətdə vasitəçilik potensialını ortaya qoymuş olur. Təqribən 40-dək beynəlxalq təşkilatın yüksək səviyyəli rəsmiləri həm forumda, həm də onun çərçivəsində keçiriləcək bu iclasda iştirak edəcək. İlk dəfədir bu sayda beynəlxalq təşkilat ölkəmizdə bir araya gəlir. Rəsmi Bakının təşkilatçılığı ilə keçirilən toplantılara yeni format vermək ənənəsi ortaya qoyulur".
Məhəmmədəli QƏRİBLİ