Ukraynanın xarici işlər naziri Andrey Sibiqa Rusiyanın “Avropa təhlükəsizlik arxitekturası” ilə bağlı irəli sürdüyü ultimatumun Moskvanın Gürcüstana və Ukraynaya qarşı hərbi müdaxilələrindən əvvəl səsləndirdiyi tələbləri xatırlatdığını bildirib.
Nazir “X” sosial şəbəkəsindəki paylaşımında yazıb ki, 2007-ci ildə Münxen Təhlükəsizlik Konfransında Rusiya Prezidenti Vladimir Putin NATO-nun genişlənməsini təhdid kimi qiymətləndirib. 2008-ci ildə isə Buxarestdə Kreml Gürcüstan və Ukraynanın NATO-ya üzvlük perspektivləri ilə bağlı təhdidlər səsləndirib. Bir neçə ay sonra Rusiya Gürcüstana hücum edib.
Nazirin sözlərinə görə, 2021-ci ildə Moskva NATO-nun genişlənməsinin dayandırılmasını və Alyansın 1997-ci ildəki sərhədlərinə qayıtmasını tələb edib. Bundan bir neçə ay sonra isə Rusiya Ukraynaya qarşı genişmiqyaslı müharibəyə başlayıb.
“İndi eyni ultimatum yeni ad – “Avropa təhlükəsizlik arxitekturası” adı altında yenidən gündəmə gətirilir. Bu, dialoqa dəvət deyil. Tarix göstərir ki, bunun ardınca Rusiyanın təcavüzkar formalarda, o cümlədən birbaşa hərbi təcavüz şəklində yeni eskalasiyası gəlir”, – deyə Sibiqa bildirib.
Ukraynanın xarici işlər naziri vurğulayıb ki, Rusiyanın müəyyən etdiyi qaydalarla hərəkət etmək əvəzinə, Moskva hakimiyyətinə təzyiq artırılmalı, Vladimir Putin sülh səylərinə ciddi yanaşmağa məcbur edilməli və Rusiyanın Ukraynaya qarşı təcavüzünə son qoyulmalıdır.
Qeyd edək ki, Ukrayna Prezidenti Volodimir Zelenski də daha əvvəl Rusiyanın irəli sürdüyü tələblər fonunda Avropanın təhlükəsizlik arxitekturasına yenidən baxılmasının yarada biləcəyi təhlükələr barədə xəbərdarlıq edib.
Tahir TAĞIYEV