Rusiya, ABŞ və Çin liderləri – Vladimir Putin, Donald Tramp və Si Cinpin arasında keçiriləcək üçtərəfli görüşün əvvəlcədən razılaşdırılmış gündəliyi olmayacaq. Financial Times nəşrinin xəbərinə görə, bu, xarici dövlət başçıları ilə müzakirələrdə adətən ciddi şəkildə müəyyən edilmiş formata üstünlük verən Çin lideri üçün "qeyri-adi addım"dır.
Xəbərə görə, Tramp danışıqlar zamanı nüvə silahlarına nəzarət məsələsini qaldırmaq niyyətindədir. Lakin o, hər hansı bir razılaşmanın əldə olunacağını gözləmir; əksinə, məqsədi üç böyük nüvə dövləti arasında dialoqa təkan verməkdir. Lakin liderlərin Ukraynadakı müharibəni müzakirə etmələri ehtimalı azdır, çünki Çin sülh prosesinə birbaşa cəlb olunmaq istəmir. Si Cinpin həm Tramp, həm də Putinlə xüsusi münasibətlərini vurğulamaq istəyir, eyni zamanda 1945-ci ildə keçirilmiş və Çinin dəvət olunmadığı Yalta Konfransı ilə hər hansı müqayisədən qaçmağa çalışır. "Bloomberg" isə qeyd edir ki, Putin və Tramp arasındakı görüş Kiyevdə və Qərb paytaxtlarında "narahatlıq" yarada bilər. Agentliyin məlumatına görə, belə bir görüş Rusiya prezidentinə Ukraynanın iştirakı olmadan sülh sazişinin şərtlərinə təsir etmək imkanı verə bilər. Daha öncə "The Wall Street Journal" (WSJ) qəzetinin istinad etdiyi mənbələr ABŞ və Çin arasında üçtərəfli görüşün formatı və gündəliyi ilə bağlı fikir ayrılıqlarının yarandığını bildirmişdi. Xüsusilə, Pekin iştirakçıların sadəcə əvvəlcədən hazırlanmış bəyanatları oxuması, real müzakirə üçün isə çox az və ya heç bir imkanın olmaması şərtində israr edirdi. Nəşrin məlumatına görə, ABŞ isə üç liderin fikirlərini daha sərbəst şəkildə bölüşə biləcəyi, daha qeyri-rəsmi bir formatın tərəfdarı olub. Rusiya, ABŞ və Çin liderləri arasında üçtərəfli görüş keçirməyi təklif edən məhz Putin idi. "WSJ" qəzetinin məlumatına görə, Rusiya prezidenti bu sammitdən istifadə edərək, Ukraynadakı müharibəyə öz şərtləri ilə son qoyacaq bir razılaşmaya nail olmağa ümid edirdi. ABŞ isə bildirdi ki, nüvə tərksilahı və İranın iştirak etdiyi hərbi münaqişəni müzakirə etmək niyyətindədir, lakin Rusiyanın Ukraynadakı müharibəsini müzakirə etmək fikrində deyil. Bundan sonra Kreml Şençjendəki danışıqların "yeni Yalta" kimi qəbul edilməməsi barədə xəbərdarlıq etdi.
SAMİRƏ