Əpoş Vəliyev: “Şərurlu İsfəndiyardan nümunə götürüb digər tanınmış iş adamlarımız da universitetlərə gedərək tələbələrlə açıq dialoq qurmalıdırlar”
Azərbaycan Memarlıq və İnşaat Universiteti (AzMİU) tələbələri “Şərur” MTK-nın rəhbəri İsfəndiyar Axundovla görüşüb. Tələbələrin Şərurlu İsfəndiyarla keçirdikləri görüş nədənsə ölkə gündəmində birmənalı qarılanmayıb.
Hər zaman qəribə və məzəli fikirləri ilə yadda qalan şirkət rəhbərinin tələbələrlə müzakirə mövzusu xüsusilə diqqət çəkir. AzMİU-nun mətbuat idmətindən mətbuatın sorğusuna cavab olaraq deyilib ki, görüş tələbələrin təşəbbüsü ilə, dərsdənkənar vaxtda keçirilib. Bildirilib ki, görüşün təşəbbüskarı qrupdakı tələbələrdən biri olub və digər tələbələr də Şərurlu İsfəndiyarla söhbətə maraq göstəriblər. Universitetdən o da bildirilib ki, mediada yayılan məlumatlardan sonra daxili araşdırma aparılıb. Müəyyən edilib ki, görüş universitetin ərazisində, auditoriyalarında və ya akt zallarında keçirilməyib. Mətbuat xidməti İsfəndiyar Axundovun tikinti şirkətinin rəhbəri olduğunu əsas gətirərək tələbələrin onunla görüşmək istəyini başadüşülən hesab edir. Bununla belə, görüşdə hansı məsələlərin müzakirə olunduğu barədə universitetin məlumatı yoxdur. Şərurlu İsfəndiyarın tələbələrlə görüşündən niyə narahatlıq yaranmalıdır?
Şərurlu İsfəndiyarın universitet tələbələri ilə görüşü ətrafında yaranan müzakirələr, bəzilərinin bu məsələyə yanaşması müəyyən suallar doğurur. Görünən odur ki, tələbələrin tanınmış bir iş adamı ilə görüşməsi bəzilərində narahatlıq yaradıb. Bəs bu narahatlığın səbəbi nədir? Tələbələrin bir sahibkarla görüşməsində, onun həyat və biznes təcrübəsi ilə maraqlanmasında qeyri-adi nə var?
Şərurlu İsfəndiyar haqqında mətbuatda müxtəlif fikirlər, iddialar və mülahizələr səsləndirilə bilər. Ancaq ictimai müzakirələrdə səslənən fikirlərlə hüquqi məsuliyyəti bir-birindən fərqləndirmək lazımdır. O, məhkum olunmuş şəxs deyil. Deməli, haqqında dolaşan mülahizələri əsas götürərək onunla tələbələrin görüşünü əvvəlcədən mənfi qiymətləndirmək doğru yanaşma sayıla bilməz.
Əslində, bu görüşdə diqqət çəkən daha mühüm bir məqam var. Şərurlu İsfəndiyar ölkədəki bir çox iş adamlarından fərqli olaraq, gənclərlə canlı ünsiyyət qurmaqdan, onların suallarını cavablandırmaqdan və açıq dialoqa girməkdən çəkinmir. Bu, sahibkarın ictimaiyyət qarşısında özünü ifadə etmək, təcrübəsini bölüşmək və gənclərlə fikir mübadiləsi aparmaq istəyinin göstəricisidir.
Təəssüf ki, ölkəmizdə kifayət qədər imkanlı, tanınmış biznesmenlər olsa da, onların əksəriyyəti ictimaiyyətlə açıq ünsiyyətdən yayınır. Jurnalistlərin suallarını cavablandırmaq, cəmiyyət qarşısında mövqelərini açıqlamaq, fəaliyyətləri barədə danışmaq istəmirlər. Belə bir şəraitdə Şərurlu İsfəndiyarın universitetə gedərək tələbələrlə görüşməsi, onların suallarını dinləməsi və dialoqa qoşulması niyə təqdir edilməməlidir?
Axı cəmiyyətin, xüsusilə də gənc nəslin tanımağa ehtiyac duyduğu sahibkarlar var. Universitet tələbələri yalnız siyasətçilər, dövlət xadimləri və alimlərlə deyil, biznes nümayəndələri ilə də görüşməli, sahibkarlığın mahiyyətini, iqtisadi fəaliyyətin çətinliklərini, uğurun arxasında dayanan zəhməti və təcrübəni öyrənməlidirlər. Bunun üçün ölkədə nümunə ola biləcək, öz təcrübəsini gənclərlə bölüşməyə hazır olan iş adamlarının ictimai mühitdə daha fəal görünməsi vacibdir.
Əgər tələbələr Şərurlu İsfəndiyarla görüşmək istəyiblərsə, onun da bu görüşə razılıq verməsi müsbət haldır. Gənclərin maraq dairəsinə hörmətlə yanaşmaq, onların suallarından çəkinməmək və açıq söhbətə hazır olmaq hər bir ictimai fiqur üçün üstünlükdür.
Kaş ki, digər iş adamlarımız da bu cür açıq və cəsarətli olaydılar. Universitetlərə gedib tələbələrlə görüşəydilər, sualları cavablandıraydılar, öz biznes təcrübələrini bölüşəydilər. Belə görüşlər həm gənclərin dünyagörüşünün formalaşmasına, həm də sahibkarlıq mühitinin cəmiyyətdə daha yaxından tanınmasına töhfə verərdi.
Məsələ Şərurlu İsfəndiyarın ideal biznesmen obrazında təqdim olunması deyil. Məsələ ondadır ki, cəmiyyətlə ünsiyyətdən qaçmayan, suallara açıq olan, gənclərlə dialoqa hazır bir iş adamının təşəbbüsü niyə birmənalı qarşılanmalıdır? Əgər onun fəaliyyətinə dair tənqidlər və cavablandırılmalı suallar varsa, bunlar da açıq müzakirə oluna bilər. Lakin açıq dialoqun özünü problemə çevirmək doğru deyil.
Unutmayaq ki, gənclərə nümunə göstərmək üçün ilk növbədə onlarla ünsiyyət qurmağı bacarmaq lazımdır. Biznesmenlər cəmiyyətdən təcrid olunmamalı, öz təcrübələri, fəaliyyəti və mövqeləri ilə ictimai müzakirələrin iştirakçısına çevrilməlidirlər. Şərurlu İsfəndiyarın tələbələrlə görüşü də məhz bu baxımdan dəyərləndirilməlidir.
AMEA Folklor İnstitutunun aparıcı elmi işçisi, Filologiya üzrə fəlsəfə doktoru Əpoş İslam oğlu Vəliyev baki-xeber.com-a bildirdi ki, Şərurlu İsfəndiyarın universitet tələbələri ilə görüşünün ətrafında süni narahatlıq yaradılmasını doğru hesab etmir. “O, Bakı şəhərində ən çox bina inşa edən iş adamlarından biridir. Uzun illər tikinti sektorunda fəaliyyət göstərməsi və çoxsaylı layihələr həyata keçirməsi onun müəyyən təcrübəyə, təşkilatçılıq və idarəetmə bacarığına malik olduğunu göstərir. Dövlət tərəfindən ona müvafiq qaydada tikinti icazələrinin verilməsi də bu sahədə fəaliyyətinin qanuni əsaslarla həyata keçirildiyini göstərir.
Əlbəttə, hər bir iş adamının fəaliyyəti müzakirə və tənqid oluna bilər. Lakin bu, onun gənclərlə görüşməsinə maneə olmamalıdır. Əksinə, tələbələrin müxtəlif sahələrdə təcrübəsi olan insanlarla görüşməsi, onların fikirlərini dinləməsi və suallar verməsi faydalıdır.
Mən hesab edirəm ki, Şərurlu İsfəndiyardan nümunə götürüb digər tanınmış iş adamlarımız da universitetlərə gedərək tələbələrlə açıq dialoq qurmalıdırlar. Gənclər real sahibkarlıq təcrübəsini, uğurları və çətinlikləri birbaşa bu sahədə çalışan insanlardan öyrənməlidirlər. Şərurlu İsfəndiyarın belə bir görüşə getməsini narahatlıq deyil, müsbət təşəbbüs kimi qiymətləndirmək lazımdır”-deyə Ə.Vəliyev vurğuladı.
İradə SARIYEVA