Azər Allahverənov: “Bu da ondan xəbər verir ki, artıq praktiki işlərə Aİ imza atmaq niyyətindədir”
Avropa İttifaqı tərəfindən Naxçıvan dəmir yolu layihəsi üzrə qiymətləndirmə tezliklə yekunlaşdırılacaq. Bu barədə Prezident İlham Əliyevin Dublində Avropa İttifaqı Şurasının Prezidenti Antonio Koşta ilə görüşündə danışılıb.
Söhbət zamanı Azərbaycanla Avropa İttifaqı arasında enerji, o cümlədən bərpaolunan enerji sahəsində əməkdaşlığa toxunularaq, bu xüsusda Azərbaycan, Gürcüstan, Türkiyə və Bolqarıstan arasında bərpaolunan enerjinin Avropa bazarına ixracı üçün əldə olunmuş razılaşma vurğulanıb. Orta Dəhlizin əhəmiyyəti qeyd edilib, nəqliyyat və bağlantıların inkişafı məsələləri ətrafında fikir mübadiləsi aparılıb.
Bu, o qənaətə gəlməyə əsas verirmi ki, qiymətləndirmə başa çatandan sonra Avropa İttifaqı Naxçıvan dəmir yolunun maliyyələşdirilməsində fəal rol oynayacaq?
Sözügedən məsələyə aydınlıq gətirən millət vəkili Azər Allahverənov baki-xeber.com-a açıqlamasında bununla bağlı bir sıra məqamlara toxundu: “Əslində, Avropa İttifaqının, xüsusən də Avropa Komissiyasının bu prosesdə fəal və mümkün iştirakına dair fikir qurumun rəsmiləri tərəfindən, qəbul edilən sənədlərdə də bu və ya digər formada özünü göstərir. Xüsusən də Naxçıvanda dəmir yolunun inşasına dair fikirlər də yer almaqdadır. Ursula fon der Leyen də əslində Avropa Komissiyasının Cənubi Qafqazda, xüsusən də Azərbaycanda, o cümlədən Orta Dəhliz bağlantılarında əməkdaşlığın dərinləşdirilməsində maraqlıdır. Bundan başqa Avropa Komissiyasının Global Gateway (Qlobal Qapı) proqramı var. Həmin proqram çərçivəsində 10 milyard avro vəsaiti 8 il ərzində Orta Dəhliz üzrə keçən infrastruktura yatırımın edilməsi, bunun potensialının artırılması ilə bağlı olan bir proqramdır. Burada söhbət ondan gedir ki, Orta Dəhliz üzərində hansı marşrutlar varsa, onların bundan yararlanmaq imkanı yaranır. O cümlədən, Bununla belə, Zəngəzur dəhlizi Orta Dəhlizin əsas seqmentidir. Yəni birinci seqment Bakı-Tbilisi-Qarsdısa, ikinci seqment Zəngəzur dəhlizidir və Naxçıvanın dəmir yoldur. Burada Türkiyə tərəfi çox ciddi işlər həyata keçirməkdədir və burada dəmir yolunun potensialının artırılması ilə bağlı Qarsdan Dilucuya qədər çox böyük layihə icra edilməkdədir. Bu da Naxçıvan dəmir yolları ilə yeni bir bağlantının qurulması deməkdir”.
A.Allahverənov onu da qeyd etdi ki, istənilən halda bu məsələdə Avropa Komissiyası çox israrlıdır: “Azərbaycanla Naxçıvan dəmir yollarının yenidən qurulmasında əməkdaşlıq etsin. Aİ-nin qiymətləndirici qrupları zaman-zaman Naxçıvana səfər edir. Əvvəlki illərdə belə səfərlər daha çox mövcud vəziyyəti öyrənməklə bağlı olurdu. Ancaq son illərdə belə səfərlərə diqqət etdikdə daha çox konkret layihələrin irəli sürülməsi ilə bağlı bir fəallıq görürük. Bu da ondan xəbər verir ki, artıq praktiki işlərə Aİ imza atmaq niyyətindədir. Bu, çox yaxşı bir haldır. Əvvəllər hansısa ideya kimi dilə gətirilən fikirlər, bu gün praktiki olaraq həyata keçirilir. Bu, Naxçıvanın həm iqtisadi, həm də geosiyasi əhəmiyyətini artıracaq”.
Vidadi ORDAHALLI