Azər Həsrət: “Azərbaycanlıların Avropaya gediş-gəlişi daha da asanlaşdırılmalıdır”
Litvanın prezidenti Gitanas Nauseda Aİ-nin Dublində keçirilən toplantısında İlham Əliyevlə görüşməsi barədə məlumat yayıb və Aİ ilə Azərbaycan arasında viza liberallaşdirilmasında maraqlı olduqlarını bildirdiyini bəyan edib.
Nauseda bu barədə X-də paylaşım edib: “Bu gün Dublində, Avropa Siyasi Birliyinin Zirvə toplantısı çərçivəsində Azərbaycan Prezidenti İlham Əliyevlə görüş keçirdim. Enerji sektorunda əməkdaşlığın genişləndirilməsi hər iki tərəf üçün qarşılıqlı maraq doğurur. Litva qarşılıqlı faydalı tərəfdaşlıqların qurulması istiqamətində əməkdaşlığa hazırdır. Prezident Əliyevi Aİ–Azərbaycan arasında viza liberallaşdırılması üzrə dialoq başlaması ideyasinı dəstəklədiyimizə əmin etdim”.
Əgər Aİ enerji təchizatında Azərbaycanın daha çox fayda verməsini istəyirsə, o zaman ölkəmizlə bağlı vizaların verilməsini sadələşdirməlidir.
Sözügedən məsələ ilə bağlı fikirlərini baki-xeber.com-la bölüşən siyasi şərhçi Azər Həsrət hesab edir ki, Avroittifaq Azərbaycanla münasibətlərdə daha səmimi və açıq olmalıdır: “Görünür Litvanın prezidentinin bu paylaşımı da ondan xəbər verir ki, Avropa kulislərində bu müzakirələr gedir. Yəqin ki, müxtəlif ölkələrin liderləri, söz sahibləri artıq Azərbaycanla münasibətləri daha yeni və daha üst mərhələyə daşımağın vacibliyini anlamaqdadır. Azərbaycan doğurdan da Avropa üçün bir xilas kəməri oldu. Faktiki olaraq Rusiyanın Ukraynaya qarşı başlatdığı müharibə nəticəsində Avropa ilə Rusiya arasında münasibətlər qırılma həddinə çatdı. Rusiyadan idxal edilən enerji daşıyıcıları bağlanmış oldu. Əlbəttə ciddi alternativə ehtiyac vardı və o alternativi də Azərbaycan oldu. O baxımdan hesab edirəm ki, Avropa artıq daha səmimi münasibətlər mərhələsinə qədəm qoymalıdır. Azərbaycana hücumlar, ölkəmizi bu və ya digər məsələlədə ittiham etmək doğru deyil. Xüsusən də Avropa Parlamentində aniAzərbaycan qətnamələrin qəbulu, bütün bunların hamısı dayandırılmalıdır. Azərbaycanla səmimi şəkildə masa arxasında oturub danışıqlar aparılmalıdır. Azərbaycanlıların Avropaya gediş-gəlişi dahada asanlaşdırılmalıdır. Xüsusən də nəzərə almaq lazımdır ki, Aİ ölkələrində ixtisaslı işçi qüvvəsinə çox ciddi ehtiyac yaranıb. Gənc nəsil Avropada getdikcə azalır. Yəni onların yerini yaşlı nəsil tutur, demoqrafik problemlər yaşanır. O cümlədən, əhali artımında problemlər var. Belə bir şəraitdə Azərbaycan sadəcə olaraq Avropa üçün enerji daşıyıcıları baxımından maraqlı olmamalıdır. Eyni zamanda, işçi qüvvəsi baxımından da maraqlı olmalıdır. O baxımdan bəli, qarşılıqlı şəkildə vizaların sadələşdirilməsinə gedilməlidir. Zatən Azərbaycan Avropa ölkələri üçün daha yumuşaq viza rejimi tətbiq edir. Avropada bunu qarşılıqlı şəkildə etməlidir”.
Vidadi ORDAHALLI