Əli Orucov: “Rusiya ilə aparılan danışıqlarda PURL proqramında dövlətlərin iştirakı həlledici rol oynamır”
Polşa NATO-nun Ukrayna üçün ABŞ istehsalı silahların alınmasını nəzərdə tutan PURL proqramına hələlik maliyyə vəsaiti ayırmayacaq. Bunu Polşanın Baş naziri Donald Tusk mətbuat konfransında bildirib.
“Mən NATO-nun Baş katibi Mark Rütteyə bildirdim ki, biz hazırda PURL proqramına – Ukrayna üçün Avropa vəsaiti hesabına Amerika silahlarının alınmasına maliyyə töhfəsi verməyəcəyik”, – Tusk deyib.
Qeyd edək ki, PURL proqramı NATO çərçivəsində Avropa ölkələrinin maliyyə vəsaiti hesabına ABŞ-dan silah alınaraq Ukraynaya göndərilməsini nəzərdə tutur.
Polşa Ukraynaya yardım edən əsas ölkələrdən biri idi. Bundan əvvəl Almaniya müdafiə naziri Pisterius bəyan etdi ki, ölkəsi daha Ukraynaya öz hərbi invertarında olan “Patriot” raketlərini verməyəcək. Nə baş verir? Digər tərəfdən, Avropa ölkələri Ukraynadakı münaqişənin həlli ilə bağlı sülh danışıqlarında “E5 + Aİ” formatında iştirak edəcəklər. Danışıqlarda Aİ qurumları ilə yanaşı, Böyük Britaniya, Almaniya, İtaliya, Polşa və Fransa da təmsil olunacaq. Polşa PURL proqramından həm də ona görə imtina edib ki, danışıqlarda iştirak etsin. Nəzərə alsaq ki, Polşa danışıqlarda iştirak edir, o zaman bundan sonra PURL proqramında iştirakını yenidən bərpa edə bilərmi?
Sözügedən məsələni baki-xeber.com-a şərh edən AMİP funksioneri Əli Orucovun fikrincə, PURL proqramında iştirak etmək o demək deyil ki, həmin ölkə danışıqlarda vasitəçi ola bilməz: “Ukrayna PURL proqramına ümumilikdə 29 ölkə qoşulub. NATO və ABŞ tərəfindən yaradılan bu mexanizmdə 26 NATO üzvü və 3 tərəfdaş ölkə iştirak edərək Ukrayna üçün Amerika istehsalı olan silahların alınmasını maliyyələşdirir. Proqram çərçivəsində ən çox vəsait ayıran beş ölkə bunlardır – Norveç, Niderland, Almaniya, Kanada və İsveç. Proqramda Böyük Britaniya, Polşa, Danimarka, Finlandiya, Estoniya, Latviya, Litva, Belçika, Lüksemburq, İslandiya, İspaniya, Portuqaliya, Rumıniya, Yunanıstan, Xorvatiya, Sloveniya, Monteneqro və Şimali Makedoniya da iştirak edir. Polşa bu çərçivədə maliyyələşdirməni müvəqqəti dayandırıb. Yəni bundan rəsmən çıxmayıb. Bu, o deməkdir ki, haçansa bunu bərpa edə bilər. Tusk bu qərarı Polşanın yüksək büdcə kəsiri və ölkənin müdafiəsinə çəkilən xərclərlə izah edib. Macarıstan, Slovakiya, Türkiyə, Fransa və İtaliya isə PURL proqramında iştirak etmirlər. Hesab edirəm ki, Rusiya ilə aparılan danışıqlarda PURL proqramında dövlətlərin iştirakı həlledici rol oynamır. Moskva istəmir ki, Aİ danışıqlarda ABŞ qədər rola malik olsun. Bax əsas məsələ bununla bağlıdır”.
Vidadi ORDAHALLI