Elşən Mustafayev: "İƏT-in ölkəmizi qane edən mövqeyində qalması isə bizi yalnız sevindirə bilər"
Xarici işlər naziri Elmar Məmmədyarov Azərbaycanda rəsmi səfərdə olan İƏT-in baş katibi Yusif Əl-Useymini qəbul edib. Görüşdə Azərbaycan və İƏT arasında yüksək səviyyəli əməkdaşlığın inkişafından məmnunluq ifadə olunub.
E.Məmmədyarov Azərbaycanın İƏT-lə əlaqələrin hərtərəfli inkişafına xüsusi önəm verdiyini qeyd edərək, İslam dünyası ölkələri ilə ikitərəfli və çoxtərəfli əməkdaşlığın genişlənməsində İƏT-in əvəzsiz platforma olduğunu diqqətə çatdırıb. Azərbaycan Prezidenti İlham Əliyevin sərəncamı ilə ölkəmizdə 2017-ci ilin İslam Həmrəyliyi İli elan edildiyini xatırladan nazir ölkəmizin ev sahibliyi ilə 12 may tarixində IV İslam Həmrəyliyi Oyunlarının açılış mərasiminin keçiriləcəyini deyib.
Baş katib isə Azərbaycanın dinlərarası dözümlülük və mədəniyyətlərarası dialoq üçün nümunəvi bir məkana çevrildiyini və bu sahədə keçirilən tədbirlərə yüksək səviyyədə ev sahibliyi etdiyini bildirərək, ölkəmizin islam dininin sülh, əməkdaşlıq və dostluq dini kimi təşviqi və islamın əsl dəyərlərinin təqdimatı istiqamətində fəaliyyətinin təqdirəlayiq hal olduğunu vurğulayıb. E.Məmmədyarov Ermənistanın Azərbaycanın işğal olunmuş ərazilərində Azərbaycan xalqına məxsus islam mədəniyyəti abidələrinin və dini ibadət ocaqlarının dağıdılması və məhv edilməsi siyasətini həyata keçirdiyini və bununla əlaqədar İƏT-in müvafiq qətnamələr qəbul etdiyini xatırladaraq, bütün üzv dövlətlərin Ermənistanın bu vandalizm əməllərinə son qoyması üçün səylərini artırdığını qeyd edib.
Yusif Əl-Useymi İƏT-in Azərbaycanın ərazi bütövlüyü və suverenliyinə qəti və dəyişməz dəstəyini bir daha diqqətə çatdırıb.
Görüşdə İƏT çərçivəsində sahəvi əməkdaşlığın inkişafı, təşkilatın struktur islahatı, digər beynəlxalq təşkilatlarla əməkdaşlığı kimi məsələlər ətrafında geniş fikir mübadiləsi aparılıb.
İƏT-in Qarabağ məsələsində Azərbaycana qəti və dəyişməz dəstək verəcəyini yenidən bəyan etməsi Azərbaycan üçün nə deməkdir?
Ekspert Elşən Mustafayev qəzetimizə açıqlamasında bildirdi ki, İƏT münaqişə mövcud olandan bəri ən obyektiv mövqe tutan qurumdur: "İƏT-in təşkilatın fəaliyyətinin 10 illik proqramı (İƏT-2025), nizamnaməsi kimi əsas sənədlərində, müvafiq qətnamə və qərarlarında qeyd olunduğu kimi, İslam Əməkdaşlıq Təşkilatının bütün üzv dövlətləri özün mübahisəli məsələlərini dinc yolla nizamlamalı və güc tətbiqinin istifadəsi və təhdidindən çəkinməlidir. Belə dinc yanaşma Ermənistan-Azərbaycan, Dağlıq Qarabağ münaqişəsinin nizamlanması üçün də təsdiq edilib. İƏT Azərbaycan Respublikasına qarşı erməni təcavüzünü qəti şəkildə pisləyir və mövqeyi bundan ibarətdir ki, Ermənistan qoşunları Azərbaycanın bütün işğal olunmuş ərazilərindən dərhal, qeyd-şərtsiz çıxmalıdır.
Dağlıq Qarabağ münaqişəsi 1992-ci ildən İƏT-in gündəliyindədir. Hətta bu yaxınlarda Dağlıq Qarabağ münaqişəsinin nizama salınması ilə bağlı xüsusi Təmas Qrupu yaradılıb.
İƏT-in tərkibində böyük nüfuza malik olan ölkələr var. Niyə onlar vasitəçilik edə bilməz? Təşkilatın özü də belə bir təşəbbüsü dəstəkləyirsə, çox yaxşıdır. Necə olur ki, uzun illərdir biz bəzi xristian ölkələrinin vasitəçiliyini qəbul edirik, onlar isə müsəlmanlardan yan qaçır. Mən bu məsələni dini müstəviyə gətirməyin tərəfdarı deyiləm, ancaq balans gözlənilsə, pis olmaz. İƏT-in ölkəmizi qane edən mövqeyində qalması isə bizi yalnız sevindirə bilər".
Məhəmmədəli QƏRİBLİ