Yeganə Hacıyeva: "Bu baxımdan da Svante Kornellin təklifi ciddi şəkildə nəzərdən keçirilməlidir"
Amerika Birləşmiş Ştatları Cənubi Qafqaz kimi Rusiya, Türkiyə və İran arasında yerləşmiş narahat regionda təsir və etimad rıçaqlarını bərpa etməlidir. Bunu Con Hopkins Universitetinin Mərkəzi Asiya və Cənubi Qafqaz İnstitutu və "İpək yolu" Tədqiqat Proqramının direktoru Svante Kornelli "The American Interest" jurnalında dərc olunan məqaləsində yazıb.
Müəllif qeyd edir ki, aralarındakı kəskin fikir ayrılıqlarına baxmayaraq, üç Cənubi Qafqaz ölkəsi ABŞ-la sıx əlaqələrin yaradılmasına çalışır: "Bu amil Vaşinqtonun diqqətini regiona cəlb etməli və bununla bağlı ardıcıl siyasət həyata keçirməyə vadar etməlidir. Amma son onillik ərzində bunun əksi baş verib. Hələ on il əvvəl ABŞ Cənubi Qafqaz ölkələrinə böyük təsir qüvvəsinə malik idisə, indi Vaşinqton bu regionla bağlı heç bir siyasətə malik deyil".
Məqalədə vurğulanır ki, ABŞ-ın yeni administrasiyası bu regionla, xüsusilə də Ermənistan-Azərbaycan, Dağlıq Qarabağ münaqişəsinin həlli ilə bağlı təşəbbüsü öz üzərinə götürmək üçün uzunmüddətli plan hazırlamalıdır.
ABŞ-ın yeni administrasiyası üçün təklif olunan bu plan hansı mənanı kəsb edir?
Politoloq Yeganə Hacıyevanın fikrincə, bu çox yerində verilən bir təklifdir: "ABŞ kimi böyük ölkələr üçün bir qədər başqa mövzular prioritet təşkil edir. Xüsusilə də yeni administrasiyanın başı başqa məsələlərə qarışan bir dönəmdə belə həyəcan təbilinin çalınması doğrudur. Bəli, Obama administrasiyası dönəmində ABŞ-ın bu regiondakı dayaqları çox zəiflədi. Çünki onlar məsələlərə münasibətdə çox vaxt qərəzli oldular. Bu da özünü nüfuz itirilməsi baxımından göstərmiş oldu. ABŞ-ın Cənubi Qafqazda böyük geopolitik maraqları var. Hesab edirəm ki, yeni administrasiya bununla bağlı daha ciddi işlər görməlidir. Bizim üçün bu əlverişlidir. Çünki regionun yalnız Rusiyanın təsiri altında olması birtərəfli güc balansı yaradır. ABŞ Dağlıq Qarabağ məsələsində məsuliyyəti Rusiya ilə bərabər paylaşır. Eyni səlahiyyətlər çərçivəsində Minsk Qrupuna həmsədrlik edirlər. Ancaq burada prosesə təsir etmək imkanları önə çıxır ki, bu məsələdə də ABŞ Rusiyaya uduzur. Bu baxımdan da Svante Kornellin təklifi ciddi şəkildə nəzərdən keçirilməlidir".
Məhəmmədəli QƏRİBLİ