Elşən Həsənov: "Hətta qərar qəbul edəcəyi təqdirdə belə, adıçəkilən təşkilat beynəlxalq qurumların qınağına, böyük təzyiqinə məruz qala bilər"
Kollektiv Təhlükəsizlik Müqaviləsi Təşkilatının (KTMT) baş katibi vəzifəsinə erməni generalı Yuri Xaçaturovun təyin olunması erməniləri çox sevindirdi. Lakin bir qədər keçəndən sonra məhz erməni KİV-i yeni baş katibi tənqid atəşinə tutmağa başlayıb. Hətta iddia edirlər ki, həmin adamın milli mənsubiyyəti heç erməni deyil.
Erməni mediasının KTMT baş katibinin üzərinə bu şəkildə hücuma keçməsi nə ilə bağlıdır?
Ekspert Elşən Həsənovun sözlərinə görə, erməni generalın həmin vəzifəyə təyin edilməsində qeyri-adi nəsə yox idi: "Adi prosedur qaydası bunu tələb edirdi. Doğrudur, Qazaxıstan və Belarus prezidentləri bu təyinatı 7-8 ay uzatdılar, ancaq bu məsələ nə zamansa Ermənistanın xeyrinə həll olunmalı idi. Çünki rotasiya prinsipinə görə, baş katib vəzifəsində Rusiya təmsilçisi Nikolay Bordyujanı Ermənistan təmsilçisi əvəz etməli idi. Sadəcə, bu təyinat 5-6 ay əvvəl olsaydı, KTMT-yə Ermənistanın keçmiş müdafiə naziri Seyran Ohanyan seçilməli idi. Çünki Ermənistan prezidenti aprel döyüşlərindən sonra Ohanyanı istefaya hazırlayırdı və ona yeni yer axtarırdı. Təşkilata baş katibin seçilməsi uzandıqda isə Ohanyan istefaya göndərildi və o, yeni təyinatını gözləmək əvəzinə müxalifətə keçdi. Ermənistanda istəyirlər ki, həmin general daim Azərbaycana pisliklər etməyə, təşkilat çərçivəsində əleyhimizə hansısa sənədlər qəbul etməyə çalışsın.
İlk baxışdan Y.Xaçaturov Ermənistana xoş gəlmək üçün hər hansı fikir səsləndirə bilər. Bu təşkilat Dağlıq Qarabağ məsələsinə heç bir halda müdaxilə edə bilməz. Etmək gücündə də deyil. Xaçaturov bu vəzifəyə təyin olunarkən müəyyən təlimatlar alıb və həmin çərçivədən çıxa bilməz. Bu baş verərsə, qurum müəyyən təzyiqlərlə üz-üzə qala bilər. Kollektiv Təhlükəsizlik Müqaviləsi Təşkilatının Dağlıq Qarabağla bağlı hər hansı bir hərəkətinin olacağı mümkün deyil.
Onun hər hansı bir qərar qəbul etmək səlahiyyəti yoxdur. Hətta qərar qəbul edəcəyi təqdirdə belə, adıçəkilən təşkilat beynəlxalq qurumların qınağına, böyük təzyiqinə məruz qala bilər. Çünki KTMT-nin funksiyaları tamamilə başqadır. Ermənilər fikirləşir ki, Azərbaycan öz torpaqlarını işğaldan azad etməyə başlasa, guya KTMT onlara köməyə gələcək. Onlar kökündən yanılır. Belə bir şey mümkün olmayacaq. Birinci olaraq, qurumun daxilindəki Belarus və Qazaxıstan bu təşkilat haqqında mövqelərini bildirib. KTMT-ni hər hansı siyasi alətə çevirmək olmaz".
Məhəmmədəli QƏRİBLİ
e:AZ-LATIN'>Məhəmmədəli QƏRİBLİ