Fikrət Sadıqov: "Ruslar Azərbaycan cəmiyyətində bütün üstünlüklərdən istifadə edir"
Azərbaycanda səfərdə olan rusiyalı filosof və politoloq, Beynəlxalq Avrasiya Hərəkatının lideri Aleksandr Duqin Azərbaycanın Rus İcması nəzdində Rus Mədəniyyəti Mərkəzində olub. Azərbaycanın Rus İcmasının sədri Mixail Zabelin qonağa ölkəmizdə rusların vəziyyəti barədə məlumat verib.
O bildirib ki, Azərbaycanda müxtəlif xalqların nümayəndələrinin yaşaması, onların əmək fəaliyyəti üçün hər cür şərait yaradılıb. M.Zabelin vurğulayıb ki, multikulturalizm Azərbaycan xalqının həyat tərzidir. Onun sözlərinə görə, rus və Azərbaycan xalqlarını əzəldən mədəni və mənəvi bağlar birləşdirir. Məsələn, rus dilinin və rus mədəniyyətinin qorunub saxlanması və inkişafı ölkəmizdə hərtərəfli dəstəklənir, bütün ali təhsil ocaqlarında tədris rus dilində aparılan fakültələr var. Azərbaycanın 120 minlik rus icması Cənubi Qafqazda ən böyük rus icmasıdır. Azərbaycanın layiqli vətəndaşları olan ruslar ölkəmizin inkişafına sanballı töhfə verirlər.
Müxtəlif ölkələrdə rus diasporunun problemləri üzrə mütəxəssis olan A.Duqin bildirib ki, bir çox dövlətlərdə ruslar dağınıq halda yaşayır və həmrəy deyillər. Bu baxımdan Azərbaycanın istisna təşkil etdiyini vurğulayan rusiyalı qonaq deyib: "Başqa regionlarla müqayisədə Azərbaycanda rusların vəziyyəti xeyli yaxşıdır".
Bu bir daha onu sübut edir ki, həqiqətən də Azərbaycanda ruslara münasibət yaxşıdır. Eyni zamanda, ruslara münasibətdə bu özünü bütün sferalarda göstərir.
Maraqlıdır, siyasi ekspertlər bu məsələni necə şərh edir? Mövzu ilə bağlı fikrini öyrəndiyimiz keçmiş diplomat, politoloq Fikrət Sadıqovun sözlərinə görə, Azərbaycanda rus icmasına olan xoş münasibət danılmaz reallıqdır: "Azərbaycanda ruslar həmişə firəvan, komfort bir şəraitdə yaşayıb. Hətta müstəqillik əldə olunandan sonra da rusların maraqlarına toxunan olmayıb. Ruslar Azərbaycan cəmiyyətində bütün üstünlüklərdən istifadə edir. Azərbaycanda rusların dini abidələri qorunur, qəzetlər, kitablar nəşr olunur və s. Bir sözlə, Azərbaycanda rusların maraqlarına toxunan yoxdur. Çünki onlar Azərbaycanın maraqlarını, tələblərini qəbul edir. Bizə də elə əsas bu lazımdır. O üzdən, Duqin kimi bir politoloq gəlib öz gözü ilə bunu görüb və sözügedən məsələ ilə bağlı bəyanatlar verirsə, bu mühüm məqamdır. Bu həqiqətən bir reallıqdır. Rusiyanın tanınmış siyasətşünasları, ekspertləri tərəfindən qəbul olunan faktordur. Ona görə də, fikrimcə, bu məsələdə hansısa bir şübhə ola bilməz".
Vidadi ORDAHALLI