Səyyar Əliyev: "Bu araşdırmadan sonra AŞ PA mədəni irsimizin məhvinin qarşısının alınması ilə bağlı konkret addımlar atmalıdır"
Avropa Şurası Parlament Assambleyasının Monitorinq komitəsinin həmməruzəçisi Stefan Şennak Azərbaycanın mədəni irsinin məhv edilməsi ilə bağlı materialları tədqiq edəcək. Bunu S.Şennak AŞ PA-nın yaz sessiyasındakı çıxışında deyib.
Onun sözlərinə görə, Azərbaycan tərəfi bu məsələ ilə bağlı çoxlu sənədlər təqdim edib. Həmməruzəçi bu materialları tədqiq etməyə hazır olduğunu bildirib.
Azərbaycan ərazilərinin Ermənistan tərəfindən işğal olunduğu ötən müddətdə ölkəmizə dəyən ziyan 819,15 milyard dollar həcmində dəyərləndirilir.
Belə bir araşdırmanın Azərbaycan üçün hansı əhəmiyyəti ola bilər?
Tarixçi alim Səyyar Əliyevin sözlərinə görə, Azərbaycanın mədəni irsinin məhv edilməsi ilə bağlı materialların AŞ PA-da tədqiq edilməsi çox vacibdir: "Bununla bağlı dəfələrlə məsələ qaldırılsa da, ortada heç bir nəticə olmayıb.
Bu hal bütün dünyanı narahat etməlidir. Çünki biz ölkə olaraq erməni vandallığı ilə üz-üzəyik.
AŞ PA ona üzv olan Avropa ölkələrində bu sahədəki vəziyyəti düşünməlidir. Məsələn, Avropada ən qədim insan-yaşayış məskəni Azıx mağarasıdır, bu təsdiqlənmiş faktdır. Ancaq bu gün həmin mağara işğal altındadır, erməni təcavüzünə məruz qalıb, dağıdılıb. Bu gün Azərbaycandakı 200 muzeyin 22-si işğal altındadır. Onların eksponatları oğurlanıb, məhv edilib, satışa çıxarılıb. Bu faktlar araşdırılma obyektinə düşməlidir.
Zəbt olunmuş torpaqların boşaldılması ilə bağlı beynəlxalq qərarlara məhəl qoymayan işğalçı dövlət sülh istəmir, yaranan vəziyyəti imkan çərçivəsində uzatmaq istəyir və təəssüflər olsun ki, bu hərəkətinə görə beynəlxalq strukturlar tərəfindən heç bir təzyiqlə qarşılaşmır. Hesab edirəm ki, bu araşdırmadan sonra AŞ PA mədəni irsimizin məhvinin qarşısının alınması ilə bağlı konkret addımlar atmalıdır".
Məhəmmədəli QƏRİBLİ