Yeganə Hacıyeva: "AŞ PA rəsmiləri obyektiv qərarların qəbul edilməsinə maraq göstərməlidir"
Avropa Şurası Parlament Assambleyasının Türkiyənin monitorinq altına alınması haqqında qəbul etdiyi qərar ciddi narazılıq doğurub. Bildirilir ki, bu qərarın qəbulu zamanı obyektiv gerçəklik nəzərə alınmayıb. Qərar qərəzlidir və Avropa Şurasının qəbul etdiyi normalara ziddir.
AŞ PA-nın narazılıq doğuran qərarı yalnız Türkiyə ilə bağlı deyil. Qeyd edək ki, bir müddət əvvəl həmin qurumun Rusiya ilə bağlı qərarına da kəskin etirazlar bildirilib. Buna baxmayaraq, çox ciddi bir missiyanı üzərinə götürən qurum prosesi saxlamaq niyyətini ortaya qoymur. Gözlənir ki, yaxın zamanlarda Macarıstanla da bağlı analoji qərar verilə bilər. Təbii ki, bütün bunlar AŞ PA-nın daxilində haqlı etirazlara səbəb olur. Belə halların yaşanması qurum daxilində narazılıqları daha da artıra bilərmi?
Politoloq Yeganə Hacıyevanın sözlərinə görə, AŞ PA-nın funksiyalarına, əslində, başqa profilli fəaliyyətlə məşğul olmaq daxildir: "Proseslərin gedişi isə tərsini göstərir. Bəlli olur ki, bu qurum hansısa qüvvələrin əlində təzyiq mexanizminə çevrilib. Sanki bir dəyənək rolunu oynayır. Nəticədə itirən də elə AŞ PA-nın özü olur. Artıq qurum daxilində əsaslı narazılıqlar artmaqdadır. Rusiya ilə bağlı qəbul edilən qərar ciddi mübahisələrə səbəb oldu. Biz fikirləşdik ki, ondan sonra AŞ PA qəbul etdiyi qərarlarda daha korrekt və obyektiv olacaq. Ancaq tamamilə əksini müşahidə edirik. Bu yaxınlarda qurum Macarıstanı da monitorinq altına almağı düşünür. Narazılığın miqyası genişlənir. Hesab edirəm ki, proseslərin bu şəkildə davamı daha ciddi kataklizmlərə səbəb ola bilir. Məsələn, artan narazılığın fonunda həmin ölkələrin hər biri AŞ PA-nı tərk edə bilər. Özü də prosesə başqa ölkələrin də qoşulması mümkündür. Məsələn, Türkiyə ilə bağlı qəbul edilən qərardan sonra aydın oldu ki, Azərbaycan ictimai rəyində həmin qurumla bağlı böyük narazılıq mövcuddur. Başqa ölkələr də Macarıstanın müdafiəsinə bu şəkildə qalxa bilər ki, bu da qurumun tamamilə parçalanmasına gətirib çıxarar. AŞ PA ölkələrin birliyi nəticəsində möhtəşəm görünür. Qurumda az ölkə qalandan sonra onun təsir imkanları da sıfıra enəcək. Ona görə də AŞ PA rəsmiləri obyektiv qərarların qəbul edilməsinə maraq göstərməlidir".
Məhəmmədəli QƏRİBLİ