"Ermənistan şirkətləri buna əməl etməkdən məqsədyönlü şəkildə imtina edir"
Ötən həftə iqtisadiyyat naziri Şahin Mustafayev Azərbaycanda səfərdə olan Dünya Bankının (DB) Avropa və Mərkəzi Asiya regionu üzrə vitse-prezidenti Siril Müllerlə görüşüb.
Görüşdə Azərbaycan və DB arasında əlaqələrin mövcud vəziyyəti və əməkdaşlığın inkişaf perspektivləri müzakirə edilib, eləcə də dünya iqtisadiyyatındakı qeyri-sabitlik və neqativ tendensiyaların Azərbaycan iqtisadiyyatına mümkün təsirlərinin qarşısının alınması istiqamətində həyata keçirilən tədbirlər barədə fikir mübadiləsi aparılıb.
Nazir Ş.Mustafayev qeyd edib ki, DB ilə əməkdaşlıq çərçivəsində indiyədək 51 layihə həyata keçirilib. Bu layihələrdən 40-ı artıq başa çatıb.
Azərbaycanda qeyri-neft sektorunun inkişafı, biznes və investisiya mühitinin yaxşılaşdırılması və sahibkarlığa göstərilən dəstək tədbirləri, bu sahədə həyata keçirilən islahatlar barədə məlumat verən iqtisadiyyat naziri DB tərəfindən özəl sektora maliyyə dəstəyinin davam etdirilməsinin əhəmiyyətini diqqətə çatdırıb.
Vacib məqamlardan biri də ondan ibarətdir ki, görüşdə nazir Ş.Mustafayev Ermənistan-Azərbaycan, Dağlıq Qarabağ münaqişəsi ilə bağlı ölkəmizin ədalətli mövqeyini bir daha səsləndirib. O, Azərbaycanın işğal olunmuş ərazilərində qanunsuz fəaliyyətləri olan Ermənistan bankları və şirkətlərinin DB layihələri çərçivəsində hər hansı işlərə və xidmətlərə cəlb olunmasının yolverilməz olduğunu vurğulayıb.
Artıq neçə ildir Ermənistan şirkətləri işğal olunmuş ərazilərdə qanunsuz fəaliyyət göstərir. Bu fəaliyyət müxtəlif formalarda özünü göstərir. Bu baxımdan həmin şirkətləri DB layihələrindən necə kənarda saxlamaq olar? Məsələyə münasibət bildirən ekspert Zakir Əhmədovun sözlərinə görə, bu məsələdə Azərbaycan nə mümkündürsə, onu edir: "Yəni Azərbaycan işğal olunmuş ərazilərdə xarici şirkətlərin qanunsuz fəaliyyət göstərdiyini dəfələrlə gündəmə gətirib. Bunun nəticəsində bir sıra xarici şirkətlər həmin əraziləri tərk edb. Yəni Azərbaycanın qəti etirazı nəticəsində onlar öz fəaliyyətini dayandırıb. Yaxud da orada fəaliyyət göstərmək istəyən şirkətlər son nəticədə bundan vaz keçib. Ancaq Ermənistan şirkətlərinə gəldikdə isə, bunu demək çətindir. Bu da məlum məsələdir. Ona görə ki, işğalçı tərəf Ermənistan olduğu üçün, onlar buna əməl etməkdən məqsədyönlü şəkildə imtina edirlər. DB-nin həmin şərkətləri öz layihələrinə cəlb etməməsinə gəldikdə isə, bu daha çox siyasi iradə məsələsidir. Məsələ ondadır ki, böyük dövlətlər siyasi iradə ortaya qoysa, beynəlxalq maliyyə qurumları bu addımı ata bilər. Hesab edirəm ki, Azərbaycan bütün mümkün vasitələrlə bu istiqamətdə səy göstərməlidir".
Vidadi ORDAHALLI
