Arzuxan Əlizadə: “Bu qərarların ən mühüm tərəfi Zəngəzur dəhlizinin açılmasını yalnız siyasi razılaşmalar müstəvisindən çıxararaq konkret iqtisadi və infrastruktur layihələri ilə əlaqələndirməsidir”
Amerika Birləşmiş Ştatları (ABŞ), Azərbaycan və Ermənistan Ağ Evdə təşkil olunmuş Sülh Sammitinin birinci ildönümü ilə bağlı Birgə Bəyanat yayıb.
Azərbaycan Xarici İşlər Nazirliyinin (XİN) yaydığı Birgə Bəyanatda qeyd olunur ki, multimodal tranzit marşrutu olacaq Beynəlxalq Sülh və Rifah naminə Tramp Marşrutu (TRIPP), infrastrukturun inkişafına rəhbərlik edəcək TRIPP İnkişaf Şirkətinin yaradılmasına dair ABŞ-Ermənistan razılaşması da daxil olmaqla, konkret irəliləyişlər sayəsində ideyadan reallığa çevrilməkdədir. Ermənistanda mühəndis-tədqiqat işləri artıq həyata keçirilməkdədir. Azərbaycan öz ərazisində Ermənistanda TRIPP-ə birləşəcək avtomobil yolu və dəmir yolunun tikintisini demək olar ki, başa çatdırıb. Üç ölkə həmçinin TRIPP marşrutu boyunca elektrik enerjisinin ötürülməsi xəttinin inşasını dəstəkləyir.
Amerika Birləşmiş Ştatları Cənubi Qafqaz və Mərkəzi Asiyada Transxəzər Ticarət Marşrutuna (Orta Dəhliz) özəl sektor investisiyalarının cəlb edilməsinə dəstək göstərmək məqsədilə Transxəzər Sahibkarlıq Fonduna 201 milyon ABŞ dolları məbləğində vəsait ayırıb.
Bu üçtərəfli bəyanatda Zəngəzur dəhlizində avtomobil və dəmiryolu ilə bərabər elektrik enerji xəttinin çəkilməsini, habelə Transxəzər Sahibkarlıq fondunun yaradılmasını dəstəkləyiblər.
Bu qərarlar Zəngəzur dəhlizinin açılması yolunda maneələri aradan qaldırmaqda nə rol oynayacaq?
Millət vəkili Arzuxan Əlizadə b aki-xeber.com-a bildirdi ki, ABŞ, Azərbaycan və Ermənistan arasında Sülh Sammitinin birinci ildönümü ilə bağlı yayılan Birgə Bəyanatda Zəngəzur dəhlizində avtomobil və dəmir yolu ilə yanaşı elektrik enerjisi xəttinin çəkilməsi, eləcə də Transxəzər Sahibkarlıq Fondunun yaradılmasının dəstəklənməsi xüsusi əhəmiyyət daşıyır. “Bu məqam göstərir ki, Zəngəzur dəhlizi artıq yalnız nəqliyyat layihəsi kimi deyil, bütövlükdə regionun iqtisadi və enerji bağlantılarını dəyişdirə biləcək çoxşaxəli strateji layihə kimi nəzərdən keçirilir. Elektrik xəttinin dəhlizin infrastrukturu ilə paralel şəkildə gündəmə gətirilməsi onun iqtisadi dayanıqlığını və gələcəkdə regional enerji sistemlərinə inteqrasiyasını gücləndirə bilər. Digər tərəfdən, Transxəzər Sahibkarlıq Fondunun yaradılması dəhliz boyunca biznes və investisiya imkanlarının genişlənməsinə, özəl sektorun prosesə cəlb olunmasına və marşrutun iqtisadi cəhətdən daha cəlbedici olmasına xidmət edəcək.
Hesab edirəm ki, bu qərarların ən mühüm tərəfi Zəngəzur dəhlizinin açılmasını yalnız siyasi razılaşmalar müstəvisindən çıxararaq konkret iqtisadi və infrastruktur layihələri ilə əlaqələndirməsidir. Çünki belə layihələr həyata keçirildikcə dəhlizin fəaliyyət göstərməsində maraqlı olan tərəflərin sayı artacaq və onun qarşısında yarana biləcək siyasi və texniki maneələrin aradan qaldırılması üçün əlavə motivasiya formalaşacaq”.
A.Əlizadə vurğuladı ki, Azərbaycan baxımından isə bu, ölkəmizin Şərq-Qərb nəqliyyat və enerji bağlantılarında rolunu daha da gücləndirir. “Eyni zamanda, Zəngəzur dəhlizinin reallaşması Türk dünyası ilə Avropa arasında əlaqələrin möhkəmlənməsinə, Orta Dəhlizin imkanlarının genişlənməsinə və Azərbaycanın regionda əsas logistika və enerji qovşaqlarından birinə çevrilməsinə ciddi töhfə verə bilər.
Bu baxımdan, Birgə Bəyanatda qeyd olunan məsələləri sadəcə niyyət ifadəsi kimi deyil, sülh prosesinin iqtisadi dividendlər yaratmasının və regionda qarşılıqlı asılılığı artırmaqla davamlı sabitliyə xidmət etməsinin mühüm göstəricisi kimi qiymətləndirmək olar. Nəqliyyat, enerji və sahibkarlıq komponentlərinin bir-birini tamamlaması Zəngəzur dəhlizinin açılmasını sürətləndirə və onun uzunmüddətli perspektivdə regional əməkdaşlığın əsas platformalarından birinə çevrilməsinə şərait yarada bilər”-deyə millət vəkili bildirdi.
İradə SARIYEVA
