Abutalıb Səmədov: “...Bütün iqtisadiyyatı hərbi xəttə keçirmək Rusiyanın sonu deməkdir”
Rusiya Dövlət Dumasının Müdafiə Komitəsinin üzvü Andrey Kolesnik, Ukrayna Silahlı Qüvvələrinin Moskva bölgəsinə beş mülki şəxsin ölümünə səbəb olan pilotsuz təyyarə hücumundan sonra hakimiyyətə çağırış edərək bildirib ki, Rusiya "müharibə iqtisadiyyatı"na keçməlidir.
Kolesnik mövcud cavab strategiyasının yetərli olmadığını və daha sərt tədbirlərin görülməsinin vacibliyini vurğulayıb
Ukraynanın dron hücumlarının sayının artdığına diqqət çəkən Kolesnik bildirib ki, bu tip hücumlar daha tez-tez baş verir və "biz artıq yalnız cavab zərbələri ilə kifayətlənə bilmərik". Qanunverici Rusiyanın daha güclü və daha intensiv hücumlar etməli olduğunu bildirib və əlavə edib ki, "düşmən bu hərəkətlərin cəzasız qalmayacağını başa düşməlidir".
Kolesnik mülki şəxslər arasında itkilərin qarşısını almaq üçün qabaqlayıcı tədbirlərin artırılmasının vacibliyini vurğulayıb: "Dron təhlükəsini minimuma endirmək üçün bu hücumların qarşısını ala biləcək insanların sayını artırmalıyıq. Əks təqdirdə, bu hücumları almağa davam edəcəyik. Cavabımız qaçılmaz olacaq, amma əvvəlcə ciddi təhlükə altında olduğumuzu qəbul etməliyik. Sadəcə qisas ala bilmərik, normal hərbi əməliyyatlara hazırlaşmalıyıq".
Kolesnikin çağırışı Rusiyanın Ukraynadakı müharibə strategiyasının gələcəyi ilə bağlı əhəmiyyətli bir müzakirəyə səbəb olub və Moskvanın qarşıdakı dövrdə hərbi və iqtisadi siyasətində daha sərt addımlar atıb-atmayacağı ilə bağlı suallar doğurub.
Rusiyanın “müharibə iqtisadiyyatına” keçməsi nə deməkdir?Yaxınlarda Rusiyanın müharibə strategiyasında nə dəyişə bilər?
“Alyans”SAM-ın sədri Abutalıb Səmədov baki-xeber.com-a bildirdi ki, Rusiya Ukraynanın dron hücumları qarşısında aciz qaldığını deputat Kolesnikin dili etiraf edib.
“Ümumiyyətlə, bu təkcə Rusiyanın problemi deyil, elə Ukraynanın da, ABŞ-ın da problemidir. İndiyə qədər hava hücumundan müdafiə sistemləri təyyarələrə və raketlərə qarşı hesablanmışdı. İndi İran və Ukrayna, eləcə də Rusiyanın özü də ucuz dronlar istehsal edirlər, bu dronların sayı milyonlarladır. Bu dronlara qarşı bəzən hava hücumundan müdafiə sistemlərini işə salmaq məcburiyyətində qalırlar. Yəni 15-20 min dollara, hətta bəzən daha ucuz qiymətə olan dronları vurmaq üçün bəzən milyonlarla dəyəri olan raketlərdən istifadə olunur. Ümumiyyətlə, son müharibələr göstərdi ki, iri dövlətlər də hətta dronlar qarşısında acizdirlə və buna hazır deyillər. Deputat Kolesnik təklif edir ki, hərbi iqtisadiyyata keçilsin. Yəni “hər şey cəbhə üçün” şüarı ortaya atılsın, istirahətsiz iş rejimi təşkil olunsun, bütün müəssisələr ilk növbədə hərbi ehtiyaclara xidmət etsinlər və bu təklifə müəyyən şəxslər dərhal etiraz ediblər. Hətta Moskvanın meri Sabyanin bu təklifi boş və təhlükəli adlandırıb, “əgər iqtisadiyyat azad olmasa hərbi xərclər, hərbi sifarişlər üçün pul tapmaq mümkün olmayacaq” deyib. Onsuz da Rusiya hərbi müəssisələri 3 növbəli iş rejiminə keçilib və müharibənin əvvəli ilə müqayisədə daha çox silah-sursat istehsal olunur. Ondan artığına Rusiya iqtisadiyyatı dayana bilməz”.
A.Səmədovun sözlərinə görə, onsuz da problemlər var və Rusiya rəhbərliyi anlayır ki, bu cür uzun müddət dayanmaq mümkün olmayacaq. “Rusiya iqtisadiyyatı günən günə ağır vəziyyətə düşür, dövlət büdcəsinin kəsiri artmaqdadır. Burada deputat Kolesnik kimilərinin təklifini qəbul edib İkinci Dünya Müharibəsindəki kimi “hər şey cəbhə üçün, hər şey qələbə üçün” şüarını əsas götürüb bütün iqtisadiyyatı hərbi xəttə keçirmək Rusiyanın sonu deməkdir. Təbiidir ki, Rusiya buna getməyəcək. Üstəlik, nəzərə almaq lazımdır ki, cəbhədə üstünlük Rusiyadadır, Rusiya ağır-ağır irəliləyir. Xüsusilə Doneski vilayətində irəliləməkdə davam edir. Rusiya üçün həlledici əhəmiyyətə malik olan Doneskidir. Ukrayna da əks-hücumlarlarla müəyyən əraziləri azad edib. Ancaq bunlar Rusiya üçün o qədər də əhəmiyyəti olmayan ərazilərdir. Rusiya onsuz da o əraziləri verməyə, dəyişməyə hazır olduğunu Alyaskada bəyan etmişdi. Bu səbəbdən yəqin ki, heç nə dəyişməyəcək, Rusiya hücumlarını davam etdirərək mümkün qədər qısa müddətdə Doneski vilayətindəki qalan hissəni, yəni Ukraynanın əlində olan 15-17 faiz hissəsini azad etməyə çalışacaq. Ola bilsin hətta yaxın vaxtlarda ABŞ-ın vasitəçiliyi ilə sülh danışıqları daha da intensivləşəcək, bəlkə də ilin sonuna qədər, yaxud gələn ilin əvvəlində artıq sülh sazişini imzalamaq mümkün olacaq”-deyə A.Səmədov qeyd etdi.
İradə SARIYEVA
