Yüksək dövlət vəzifəsi tutan adamların övladlarının da vəzifələrə təyin edilməsi praktikası var. Bir sıra məmurların övladları da müxtəlif yüksək postlara təyinat alırlar.
Məsələn, ölkə başçısının sərəncamı ilə Naftalan Şəhər İcra Hakimiyyətinin başçısı vəzifəsindən azad edilərək digər bir sərəncamı ilə Göygöl Rayon İcra Hakimiyyətinin başçısı təyin olunan Vüqar Novruzovun atası Vahid Novruzov uzun illərdi ki, Azərbaycan Respublikası Auditorlar Palatasının sədri vəzifəsində çalışır. Bu yegənə nümunə deyil, belə nümunələr az deyil. Yüksək dövlət vəzifəsi tutan məmurların, keçmiş və indiki icra başçılarının, deputatların, generalların, ali məktəb rəhbərlərinin yaxın qohumlarının, övladlarının vəzifələrə irəli çəkildiyi sirr deyil.
Bu ilin oktyabrında Samux Rayon İcra Hakimiyyətinin başçısı Firdovsi Əliyevin oğlu Kənan Əliyev Azərbaycan Dövlət Turizm Agentliyinə yeni aparat rəhbəri təyin olunub.
Mətbuatda Ağstafanın keçmiş icra başçısı Nizaməddin Quliyevin oğlu Ramal Quliyevin Quba rayon prokurorunun köməkçisi vəzifəsinə təyinat aldığı barədə məlumat gedib.
Müdafiə Nazirliyinin (MN) Hərbi-Texniki Təchizat Baş İdarəsinin rəisi general-mayor Fərid Əliyev Sabunçu Rayon İcra Hakimiyyətinin keçmiş başçısı Əlibaba Əliyevin oğludur.
Əlibaba Əliyev 2012-ci ildə Prezident İlham Əliyevin Sərəncamı ilə tutduğu vəzifədən azad olunub. Daha sonra sabiq icra başçısı Prezident Administrasiyasında Ərazi-təşkilat məsələləri şöbəsində sektor müdiri vəzifəsində çalışıb.
Bir müddət əvvəl Dövlət Təhlükəsizliyi Xidməti (DTX) tərəfindən saxlanılan və 14 ildir Balakənin icra başçısı postunu tutan İslam Rzayevin qızı Fəridə Rzayeva 2023-cü ildən Suraxanı Rayon Məhkəməsinin hakimidir.
Yüksək vəzifəli məmurların övladlarının yüksək vəzifələrə təyin olunması praktikası faydalıdır? Əgər ziyanlıdırsa bu praktikaya son qoymaq olarmı?
Bununla bağlı birmənalı fikir yoxdur, bəziləri bunu ziyanlı tendensiya adlandırır, bəziləri isə hesab edir ki, qabiliyyəti olan adam kimliyindən aslı olmayaraq vəzifə tuta bilər.
Aydın Mirzəzadə: “Vəzifəyə təyinat insanın qabiliyyətinə görə olmalıdır, hansısa ailədən çıxdığına görə yox”
YAP-çı millət vəkili Aydın Mirzəzadə “Bakı-Xəbər”ə “Vəzifəyə təyinat insanın qabiliyyətinə görə olmalıdır, onun hansısa ailədən çıxdığına görə yox. Azərbaycanda bu praktikanın tətbiq edildiyini görürük. Əsas seçim prinsipi insanların qabiliyyətinə, bacarığına, təhsilinin prkatikada necə tətbiq edildiyinə, dövlətçiliyə bağlılığına, çalışdığı sahənin problemlərinin həllinə göstərdiyi bacarığa görə olmalıdır” - deyə bildirdi.
İlqar Hüseynli: “Biz bu mexanizmi ənənəyə çevirməməliyik”
Məsələ barədə mövqeyini “Bakı-Xəbər”lə paylaşan müstəqil ekspert İlqar Hüseynli hesab edir ki, bir insanın valideynlərinin, yaxınlarının yüksək vəzifələr tutmasına görə vəzifələrə irəli çəkilməsi təcrübəsi müsbət effekt vermir. İ.Hüseynliyə görə, bu yanaşma biliyi, bacarığı, idarəetmə qabilliyyəti, vətəndaşlarla işləmək təcrübəsi olan şəxslərə aid deyil. İ.Hüseynli qeyd etdi ki, vəzifə sahibləri sanki domino effekti ilə irəli çəkilir. “Arxada düzülən oliqarxlar, dövlət məmurları və yüksək vəzifə sahibləri, oyunun ortasına çəkilənlər isə onların övladları, yaxınlarıdır. Bu mexanizmin özü yaxşı deyil. Amma ümumi götürəndə, hər bir gəncin vəzifəyə getməsi ata-anasının, yaxın qohumlarının, əmi və dayısının hansı vəzifədə olmasından asılı olmamalıdır. İnsanın bacarığı, təcrübəsi, dünyagörüşü, bilik və idarəetmə imkanları hansısa vəzifəni icra etməyə yetərlidirsə, doğrudan da buna imkanı çatırsa, bu sahədə daha yaxşısını edə bilərsə onun hansısa vəzifə tutmasında mənfi heç nə yoxdur”. İ.Hüseynli bildirdi ki, hər bir insan yüksək vəzifəyə təyin edilərkən onunla bağlı araşdırmalar aparılır, əmək fəaliyyəti yoxlanılır, bütün bunlara istinadən o yeni vəzifəyə təyin edilir. Prezident komandasına, bilavasitə öz icra strukturuna təmsil olunduğu partiyadan daha çox kadr təyin etməyə üstünlük verilir. Konkret olaraq icra başçısı təyin olunan məmur oğluna gəlincə, İ.Hüseynli bildirdi ki, V.Novruzovun da bioqrafiyasında onun YAP-ın üzvü olduğu göstərilir. “Təbii ki, siyasi baxımdan da bu gəncin təyinatında hər hansı bir problem yoxdur. Onun əmək fəaliyyətinə, təhsil fəaəliyyətinə də fikir versək, deməzdik ki, çox uğurlu bir təhsil fəaliyyəti var. Mühəndislik Universitetini bitirib, Dövlət İqtisad Universitetində magstr təhsili alıb, növbəti mərhələdə isə idarəetmə üzrə ixtisas alıb. Yəni demək istəyirəm, onun dünyanın hansısa inkişaf etmiş universitetlərində təhsil alması, magistartura bitirməsi, top onluğa daxil olan dünya dövlətlərində oxuması məsələsi yoxdur. Amma bu o demək deyil ki, həmin ali məktəblərin məzunlarından idarəetmə baxımından zəifdir”.
İ.Hüseynli qeyd etdi ki, istənilən halda, bu mexanizmi ənənəyə çevirməməliyik - qohumluq, övladlıq, ata-analıq prinsipləri əsasında vəzifələrə təyinatlar müsbət effekt vermir.
“Mənim də təmsil olunduğum vətəndaş cəmiyyəti institutlarında kifayət qədər açıq, şəffaf, demokratik və idarəetmə baxımından bacarıqlı, fərasətli insanlar mövcuddur. Çox təəssüf ki, biz bu kadr bazasından istifadə olunmasının şahidi olmuruq. İstər qanunvericilik qurumlarının, tutalım, parlamentin formalaşmasında onların çox az faizdə təmsil olunduğu müşahidə olunur, istərsə də dövlətin idarə olunmasında. Yaxud da idarəetmə struktrunda təmsilçilikdə biz bunun şahidi olmuruq. Ümid edək ki, yaxın gələcəkdə bu hallar da baş verəcək”-deyə İ.Hüseynli qeyd etdi.
İradə SARIYEVA
