Fuad İbrahimov: “Ermənistan Zod qızıl yatağını qanunsuz istismar etməklə yanaşı, digər təbii sərvətlərimizi də talan edib”
Azərbaycan əraziləri Ermənistanın işğalı altında olduğu dövrdə Ermənistan yalnız tarixi abidələrimizə, mədəni irs nümunələrimizə sahib çıxmaqla kifayətlənməyib, həm də təbii sərvətlərimizi talan edib. Kəlbəcərin Zod qızıl yatağı da daxil olmaqla bütün digər təbii sərvətlərimizi 30 il müddətində talayıb, qanunsuz olaraq istismar edib. Nəticədə Azərbaycana böyük maddi və mənəvi ziyan dəyib. O da məlumdur ki, Kəlbəcərin Zod yatağından 100 tonlarla qızıl meneral daşınaraq Ermənistana aparılıb.
Qeyd edək ki, torpaqlarımız işğaldan azad olunandan sonra Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət qrup Qarabağ iqtisadi rayonunda monitorinq həyata keçirdi. Ortaya çox ciddi faktlar çıxdı, bir daha təsdiqləndi ki, işğalın mövcud olduğu 30 il ərzində Ermənistan Qarabağ və Şərqi Zəngəzur iqtisadi rayonlarının yeraltı-yerüstü sərvətlərini barbarcasına talayıb, xarici şirkətləri qanunsuz şəkildə bölgəyə cəlb edib.
Bu şirkətlərin həm Ermənistana, həm də digər ölkələrə məxsus olduğu təsdiqləndi.
Qeyd edək ki, Azərbaycanın Baş Prokurorluğunun 2018-ci ildə apardığı araşdırmalara görə, Ermənistanda və digər ölkələrdə hüquqi qeydiyyatdan keçən "Vallex Group", "Base Metals", ACP, "Lerna Metalurgiayi İnstitute", "Teghout" və digər şirkətlər, o cümlədən, Ermənistandan olan fiziki şəxslər qızıl hasilatı biznesinin təşkilində iştirak edib.
Rusiyanın “Gold Star” qapalı səhmdar cəmiyyəti isə Zəngilan rayonunun Vejnəli kəndində qızıl yataqlarının qanunsuz istismarını həyata keçirib. “Vejnəli” yatağı ilə yanaşı, Kəlbəcər rayonunun “Söyüdlü” (zod-qızıl-sulfid), “Qızılbulaq” (qızıl-mis-kolçedan), “Heydərə” (qızıl), “Qərbi Qızılitən” və “Ağzıbir” (qızıl) yataqları da işğal dövründə talanıb. İşğal dövründə erməni mənbələr Qarabağ və ətraf ərazilərdəki “qızıl mafiyası” haqda zaman-zaman məlumatlar dərc edib. Hələ o zaman Qarabağdakı separatçı-terrorçu rejimin keçmiş “rəhbəri” Bako Saakyan və Ermənistanın keçmiş prezidenti Serj Sarkisyan Azərbaycanın işğal altındakı ərazilərində istismar edilən qızılın xaricə daşınmasına görə ittiham edilirdi və sair.
İqtisadçı ekspert Fuad İbrahimov baki-xeber.com-a bildirdi ki, Ermənistan torpaqlarımızı işğalda saxladığı dövrdə təbii sərvətlərimizə qarşı talama, qanunsuz istismar cinayətləri həyata keçirib. “Ermənistan Zod qızıl yatağını qanunsuz istismar etməklə yanaşı, digər təbii sərvətlərimizi də talan edib. Buna beynəlxalq hüquq müstəvisində yanaşılsa, sənədlər hazırlanıb beynəlxalq instansiyalara təqdim edilsə və Azərbaycanın səsi eşidilsə, bizə ikili standatlarla yanaşılmasa Ermənistanın məsuliyyəti müəyyən edilər. Bəlkə başqa bir xalq, başqa bir dövlət belə bir hadisə ilə qarşılaşsaydı və onu dünya ictimaiyyətinə çatdırsaydı buna yanaşma tamam başqa cür olardı. Ermənistan BMT Təhlükəsizlik Şurasının 4 qətnaməsinə əməl etmədi, ATƏT-in Minsk qrupunun fəaliyyəti yarıtmaz oldu, illərlə gözlədik, axırda torpaqlarımızı işğaldan özümüz öz gücümüzə azad etdik...
Beynəlxalq ictimaiyyətin Ermənistanın talançılıq davranışlarına necə yanaşdığı məlum məsələdir.
Amma fakt budur ki, təbii sərvətlərimiz dağıdılıb, istismar edilib. Onlar o qədər barbar, vandal toplumdurlar ki, sərvətlərimizi həm talan ediblər, həm də dağıdıblar. Kəlbəcərdəki Zod qızıl yatağını hansı şəkildə talan edildiklərini bilirik. Talamaların hansı həcmdə olduğunu müəyyən dövrdə mütəxəssislər işləyib üzə çıxaracaq. Hər bir halda bu varlıq bizdədir. Biz qısa zaman ərzində bu təbii sərvətlərin iqtisadi dövriyyəyə cəlb olunmasında mühüm addımlar atmalıyıq. Bu prosesi həyata keçirib öz iqtisadi dövriyyəmizə bu sərvətləri cəlb etməliyik”-deyə F.İbrahimov qeyd etdi.
İradə SARIYEVA
