Mehman İsmayılov: "Sergey Şoyqunun Armen Qriqoryanla telefon danışığının əsl mahiyyəti Rusiyanın vassalı olan Ermənistandan ultimativ tələbləri idi"
Avqustun 21-də Ermənistan Təhlükəsizlik Şurasının katibi Armen Qriqoryanla Rusiya Təhlükəsizlik Şurasının katibi Sergey Şoyqu arasında baş tutan telefon danışığında avqustun 8-də Ermənistanla Azərbaycan arasında münasibətlərin nizamlanması prosesində Vaşinqtonda əldə edilmiş razılaşmalar, regional kommunikasiyaların açılması mövzusu müzakirə edilib.
Vaşinqtonda regional kommunikasiyaların açılması ilə bağlı əldə olunmuş razılaşmalardan Rusiya narazılıq edir. Qriqoriyanla Şoyqunun bu mövzuda müzakirəsi təxminən hansı formada olar? Təbii ki, heç bir məlumat verilmir. Kommunikasiyaların açılması ilə bağlı Vaşinqtonda bir qərar verilibsə, razılaşma varsa, həmin bəyannamədən də Rusiya narazı qalıbsa, onda Qriqoriyanla Şoyqu arasında müzakirə necə gedib?
"...Bu, Moskvanın ölü diriltmək xülyaları adlandırılmalıdır"
Politoloq Mehman İsmayılov baki-xeber.com-a bildirdi ki, Rusiyanın Təhlükəsizlik Şurasının katibi Sergey Şoyqunun ermənistanlı həmkarı Armen Qriqoryanla telefon danışığının əsl mahiyyəti, bəyan edildiyi kimi, 8 avqustda Ağ Evdə imzalanmış ikitərəfli və ya üçtərəfli bəyanatların və ya 17 maddə üzrə paraflanmış Çərçivə Sazişinin mətninin müzakirəsi deyildi: "Ona görə ki, Azərbaycan, ABŞ və Ermənistan arasında Vaşinqtonda imzalanmış bütün sənədlərin mətni və məzmunu açıq mənbələrdə vardır, üstəlik, fəlsəfəsi hər kəsə məlum olan bu informasiyaların və ya söyləndiyi kimi, ABŞ prezidenti Donald Trampla Rusiyanın prezidenti Putinin Alyaska görüşünün nəticələrinin incələnməsi məsələsi, heç deyildi. Çünki mətbuata məlum olan bu məsələlərin müzakirəsi iki dövlətin Təhlükəsizlik Şuralarının rəhbərləri arasında dartışma predmeti ola bilməz.
Sergey Şoyqunun Armen Qriqoryanla telefon danışığının əsl mahiyyəti Rusiyanın vassalı olan Ermənistandan ultimativ tələbləri idi:
- Nəyə görə Ermənistan Moskvanın izni olmadan Azərbaycanla sülhə gedir?
- Nə üçün Ermənistan Çərçivə Sazişinin paraflanmasının Vaşinqtonda baş tutmasına razılıq verib?
- Nəyə görə Ermənistan 10 Noyabr 2020-ci il tarixli Üçtərəfli Bəyanatdan kənara çıxıb, bu Bəyanata görə Rusiyanın nəzarətində olmalı olan Zəngəzur dəhlizinin ABŞ-nin nəzarətində olacaq “Tramp Marşrutu”na çevrilməsinə və Amerikanın özəl şirkətlərinin ixtiyarına verilməsinə razılıq verib?
- Nə üçün Ermənistan rəhbərliyi ABŞ–ın hərbi qüvvələri ilə Ermənistan Silahlı Qüvvələrinin birgə hərbi təlimlərinin keçirilməsinə rəvac verir və dəstək göstərir?
- Niyə Ermənistan rəhbərliyi Moskvanın planlarının xilafına olaraq, Türkiyə ilə münasibətlərin nizamlanmasına təkbaşına qərar verir?
- Niyə Ermənistanın Baş naziri Nikol Paşinyan Moskvanın rüsxəti olmadan Qarabağ məsələsinin qapandığını elan edir, Qarabağı tərk etmiş ermənilərin Azərbaycana qayıtmasını qeyr-real sayır və bu məsələnin səsləndirilməsinin təhlükəli oyun olduğunu bildirir?
- Niyə Ermənistan Azərbaycanla birləşib, Rusiyanın da həmsədr olduğu Minsk Qrupu Həmsədrlik İnstitutunun ləğvinə dair ATƏT-in Baş Katibinə müraciət ünvanlayır?
Moskvanın İrəvana ünvanladğı ultimativ tələblər tək bunlarla da bitmir:
- Rusiya Paşinyandan 102-ci hərbi baza ilə bağlı qəti zəmanət istəyir,
- Rusiya İrəvandan Türkiyə ilə sülhə getməməyi tələb edir,
- Rusiya Ermənistandan avrointeqrasiya yolunu tutmamağı istəyir və əks halda Avrasiya Birliyindən çıxarılacağı ilə hədələyir,
- Rusiya İrəvandan Azərbaycan ərazilərinin mübahisələndirilməsi oyunlarının davam etdirilməsini tələb edir,
- Moskva İrəvanı hərbi çevrilişlə hədələyir və iqtisadi cəhətdən şantaj edir.
Şoyqunun Qriqoryanla apardığı danışıqların əsl mahiyyəti bunlardır və bu, Moskvanın ölü diriltmək xülyaları adlandırılmalıdır. Rusiya Güney Qafqazı birdəfəlik və həmişəlik itirib. Güney Qafqazda Türkiyə-Azərbaycan hərbi–siyasi ittfaqınıa qarşı ola biləcək güc yoxdur. Çox yaxınlarda biz Rusiyasız Güney Qafqaz modelinin gerçək şahidləri olacağıq".
İradə SARIYEVA
