Ceyhun Məmmədov: “Ermənistan bu öhdəlikdən yayına bilməz və bu çox ciddi məqamdır”
Prezident İlham Əliyev Kəlbəcər şəhər sakinləri ilə görüşdə deyib ki, Naxçıvanda dəmir yolunu tam müasirləşdirəcəyik:
“Bizim tarixi diyarımız olan Naxçıvanla quru bağlantısı da təmin edildi. 2020-ci ilin noyabrından son günlərə qədər biz təkidlə bu məsələni daim gündəlikdə saxlayırdıq və müxtəlif yollarla bu məqsədə çatmaq üçün səylər göstərirdik və nəhayət, biz buna da nail olduq. Artıq Ermənistan bu öhdəliyi də üzərinə götürmüşdür və ümid edirəm ki, yaxın bir neçə il ərzində biz qatarlarla və avtomobillərlə Azərbaycanın əsas hissəsindən Naxçıvana gedə biləcəyik. Eyni zamanda, bu, təkcə Azərbaycanın iki hissəsini bir-biri ilə birləşdirməyəcək. Bu, eyni zamanda, beynəlxalq nəqliyyat dəhlizinə çevriləcək. İndi Azərbaycan ərazisindən bir neçə nəqliyyat dəhlizi keçir və bu, əlbəttə ki, ölkəmizin önəmini artırır. Bir dəhliz də məhz bu istiqamət üzrə gedəcək. Artıq Zəngilana qədər dəmir yolunun inşası uğurla davam edir, yəqin ki, gələn il başa çatacaq. Biz indi Naxçıvan Muxtar Respublikasında dəmir yolunu tam müasirləşdirəcəyik. Ermənistan ərazisində də dəmir yolunun tikintisi nəzərdə tutulur. Yəni Ermənistan bu öhdəliyi də üzərinə götürüb və bu bizim növbəti tarixi uğurumuzdur”.
Burada xüsusilə diqqəti çəkən məqam odur ki, Ermənistanın ərazisindən keçən dəmir yolu bu ölkənin üzərinə qoyulan əsas öhdəlik kimi öz əksini tapıb. Yəni Ermənistan konkret olaraq öhdəlik götürüb ki, Zəngəzurdan keçən hissədən dəmir yolu çəkəcək.
“Biz bu nailiyyəti Prezident İlham Əliyevin ardıcıl, məqsədyönlü siyasəti nəticəsində əldə etmişik”
Sözügedən məsələni “Bakı-Xəbər”ə şərh edən millət vəkili Ceyhun Məmmədovun fikrincə, Ermənistanın üzərinə xüsusi öhdəliyin qoyulması çox önəmli məqamdır: “Naxçıvan dəmir yolunun müasirləşdirilməsi gündəmdədir. Artıq bununla bağlı ciddi işlər gedir. Görünən odur ki, bu prosesə ciddi formada başlanılıb. Bununla bağlı lazım olan bütün tədbirlər görülür. Eyni zamanda Azərbaycan Zəngilana qədər hissəni yüksək səviyyədə qurub. Məlum olduğu kimi, bu istiqamətdə işlərin böyük hissəsi görülüb. Özü də bütün norma və tələblər nəzərə alınmaqla həyata keçirilir. Burada ən uzun çəkən məsələ Ermənistan idi. Məsələ ondadır ki, həm müharibənin getdiyi dönəmdə, həm ondan sonra Ermənistan dəhlizlə bağlı üzərinə məlum öhdəlikləri götürmək istəmirdi. Hər vasitə ilə bundan yayınmağa çalışırdı. Rəsmi İrəvan prosesi uzatmağa, ləngitməyə səy göstərirdi. Ancaq Azərbaycanın ardıcıl mövqeyi, siyasi iradə ortaya qoyması Ermənistanı geri addım atmağa və şərtlərimizi qəbul etməyə məcbur etdi. Avqustun 8-də Vaşinqtonda dövlət başçılarının iştirakı ilə keçirilən məlum görüşdə dəhlizlə bağlı Ermənistan üzərinə öhdəlik götürdü. Öhdəlik götürdü ki, Zəngəzurdan keçən dəmir yolu bərpa ediləcək, Naxçıvana maneəsiz keçid təmin ediləcək, idarəçilik ABŞ şirkətinə həvalə ediləcək. Bu, artıq Ermənistan üzərində bir öhdəlikdir. Ermənistan bu öhdəlikdən yayına bilməz və bu çox ciddi məqamdır. Burada digər bir önəmli məqam ondan ibarətdir ki, bunu Ermənistan özü edəcək. Prezidentimizin dediyi kimi, bu bizim növbəti tarixi uğurumuzdur. Biz bu nailiyyəti Prezident İlham Əliyevin ardıcıl, məqsədyönlü siyasəti nəticəsində əldə etmişik”.
Vidadi ORDAHALLI
