Tural İsmayılov: "Paşinyan artıq hərbi balansı dəyişməyin mümkün olmadığını anlayır və real güc müstəvisində yox, siyasi mesajlarla oynamağa çalışır"
Ermənistanın baş naziri Nikol Paşinyan avqustun 21-də jurnalistlərə müsahibəsində bildirib ki, 2026-cı ilin dövlət büdcəsində müdafiə xərclərinin əhəmiyyətli dərəcədə artırılması nəzərdə tutulmaya bilər.
Bu, Paşinyan iqtidarının seçki xərclərinin artması ilə bağlıdır, yoxsa Ermənistanı silahlandırmaqda maraqlı olan dövlətlərə yumşaq təzyiqdir ki, silahlanmaya yardımları artırsınlar?
Baki-xeber com-a məsələ barədə açıqlama verən siyasi şərhçi Tural İsmayılov bildirdi ki, Paşinyanın bu açıqlaması, əslində, bir neçə qatı olan siyasi mesajdır: "Onu sadəcə “büdcə ixtisarı” kimi oxumaq sadəlövhlük olar. Əvvəla, Ermənistanın iqtisadi vəziyyəti kifayət qədər gərgindir: büdcənin əsas hissəsi sosial xərclərə və dövlət idarəetməsinə gedir, amma paralel olaraq Paşinyan 2026-cı ildə keçiriləcək parlament seçkilərinə də hazırlaşır. Seçki ərəfəsində o, daha çox sosial proqramlara, infrastruktur işlərinə və əhalini sakitləşdirəcək layihələrə pul ayırmaq istəyəcək. Müdafiə xərcinin azaldılması, bir tərəfdən, populist addım kimi görünür: “Biz daha çox silaha yox, xalqa pul ayırırıq”.
Amma ikinci qat budur ki, Ermənistanın hərbi imkanlarının zəif olması Paşinyana yaxşı məlumdur. O, silah alınmasını dayandırmaq istəmir, sadəcə bu məsələni beynəlxalq müstəviyə çıxarmağa çalışır. Yəni açıq-aşkar “biz öz büdcəmizdən ayıra bilmirik” deyərək, əslində Fransa, Hindistan və ya digər ölkələrə mesaj verir: “Əgər istəyirsiniz Ermənistan ayaqda qalsın, o zaman daha çox dəstək verin”. Bu, “yumşaq təzyiq” mexanizmidir – silahlanmaya maraqlı olan dövlətlər üçün bir siqnaldır ki, onların yardımı olmadan Ermənistan özünü təmin edə bilməyəcək.
Üçüncü məqam isə daxili siyasətlə bağlıdır. Paşinyan ordunun zəifliyini bilə-bilə, açıq şəkildə “xərcləri artırmayacağıq” deyirsə, bu həm də Ermənistan cəmiyyətinə mesajdır: “Müharibə yolunu bağladıq, biz sülh yolunu seçirik”. Bununla o, həm Azərbaycanla sülh prosesini dəstəkləyən Qərbə, həm də müharibə risqindən qorxan erməni əhalisinə jest edir.
Yəni yekunda, bu açıqlama həm seçki öncəsi sosial populizm, həm də silahlandırmaq istəyən dövlətlərə ünvanlanmış bir təzyiq siqnalıdır. Amma ən mühüm məqam odur ki, Paşinyan artıq hərbi balansı dəyişməyin mümkün olmadığını anlayır və real güc müstəvisində yox, siyasi mesajlarla oynamağa çalışır".
Dəniz NƏSİRLİ
