Əli Mustafa: “Overçuk bununla demək istəyir ki, Ermənistanın maraqları onlar üçün daha prioritetdir”
Rusiya baş nazirinin müavini Aleksey Overçuk İrəvanda erməni həmkarı Mher Qriqoryanla görüşüb. Təkbətək söhbətdən sonra nümayəndə heyətləri arasında görüş keçirilib.
Nazirlər Kabinetinin mətbuat xidmətindən verilən məlumata görə, tərəflər Ermənistan-Rusiya gündəliyinə dair məsələləri müzakirə ediblər. Qriqoryan Rusiya baş nazirinin müavininə operativ reaksiyaya və Rusiya buğdasının Yuxarı Lars keçid məntəqəsi vasitəsilə Ermənistana idxalına köməyə görə təşəkkür edib. Dövlətlərarası əlaqələrin möhkəmləndirilməsi baxımından Qriqoryan və Overçuk ticarət, nəqliyyat, energetika və gömrük kimi sahələrin əhəmiyyətini qeyd ediblər. Onlar ərazi bütövlüyü, suverenlik və qarşılıqlılıq prinsipi çərçivəsində regionda kommunikasiyaların açılmasının zəruriliyini vurğulayıblar.
Burada maraqlı məqam odur ki, Overçuk Azərbaycan nümayəndə heyəti ilə görüşdən və Rusiyada hökumətlərarası komissiyanın iclasından öncə qəfil İrəvana səfər edib. Halbuki, belə bir səfərin olacağı ilə bağlı məlumat yox idi.
Maraqlıdır, bunda Rusiyanın məqsədi nə ola bilər?
“Bütün hallarda, Cənubi Qafqazda proseslər, xüsusən siyasi və geopolitik məsələlər Rusiyanın istədiyi kimi getmir”
Sözügedən məsələyə aydınlıq gətirən siyasi şərhçi Əli Mustafa “Bakı-Xəbər”ə açıqlamasında bildirdi ki, burada Rusiyanın bir sıra məqsədi ola bilər: “Əvvəla, bu, Azərbaycana bir psixoloji təzyiqdir. Məlum olduğu kimi, Moskvanın yanlış siyasəti üzündən Rusiya-Azərbaycan münasibətləri gərgindir. Overçuk bununla demək istəyir ki, Ermənistanın maraqları onlar üçün daha prioritetdir. Əslində bu, bizim üçün təəccüblü deyil. Rusiya hər zaman Ermənistandan yana olub. İndi də bu, başqa formada davam edir. Rusiya-Ermənistan münasibətləri bəzən gərgin olsa da, rəngarənglik daha çoxdur. Hərbi-siyasi sahədə problemlər olsa da, iqtisadi-ticari əlaqələr artan xətt üzrə inkişaf edirdi. Ola bilsin ki, Overçuk Vaşinqton razılaşmasında bəzi məqamlara aydınlıq gətirilməsindən ötrü İrəvana gedib. Bütün hallarda, Cənubi Qafqazda proseslər, xüsusən siyasi və geopolitik məsələlər Rusiyanın istədiyi kimi getmir. Ancaq o da var ki, Ukraynada gedən müharibə fonunda Ermənistan-Rusiya ticarət dövriyyəsi bir neçə dəfə artıb. Bunun sayəsində Ermənistan milyardlar qazanıb. Rusiyanın Azərbaycanla müqayisədə hər zaman Ermənistana daha yaxın olduğunu nəzərə alsaq, ola bilsin, bizə məlum olmayan mesajlar İrəvana çatdırılıb. Görünür nələrisə aydınlaşdırırlar. O da ola bilər ki, Azərbaycanla planlaşdırılan görüş baş tutmayacaq. Çünki Azərbaycan haqlı olaraq bundan əvvəl bir neçə görüşə qatılmayıb. Bu da ola bilər. Hər halda belə bir qəfil səfər təsadüfə oxşamır və bunun arxasında nələrsə gizlənir. Elə məsələlər var ki, Rusiya daha çox Ermənistana önəm verir. Nəzərə almalıyıq ki, Rusiyanın Ermənistanda hərbi bazaları mövcuddur”.
Vidadi ORDAHALLI
