Azərbaycan-Fransa münasibətləri Emmanuel Makronun prezidentliyi dövründə onun yeritdiyi səhv siyasət nəticəsində korlanıb. Makron hökuməti Azərbaycan dövlətinə qarşı daim düşmən münasibəti sərgiləyir və antiazərbaycan mövqeyindən çəkinmir.
Baxmayaraq ki, Azərbaycan Fransa ilə münasibətlərin pisləşməsində maraqlı deyil, amma Fransa özünü bunda maraqlı tərəf kimi göstərir.
Bildiyimiz kimi, Fransa Azərbaycana yeni səfir təyin edib, Sofi Laqut Fransanın Azərbaycandakı yeni səfiridir.
Yeni təyinat son günlər çox müzakirə olunur və ekspertlər bununla bağlı müxtəlif fikirlər irəli sürürlər. Belə rəylər var ki, Makron yeni səfiri xüsusi olaraq təlimatlandıraraq ölkəmizə göndərib.
Qeyd edək ki, bundan əvvəl Fransanın Azərbaycandakı səfiri Ann Buayon idi. İndi isə Fransa Buayonu Laquta ilə əvəzləyib.
Fransa Azərbaycandakı səfirini dəyişdi. Fransanın Azərbaycan siyasətində nə kimi dəyişikliklər ola bilər? Yeni səfirin yeni missiyası ola bilərmi?
Politoloq İlyas Hüseynov “Bakı-Xəbər”ə bildirdi ki, Fransa ilə Azərbaycan arasındakı münasibətlərdə son illər ərzində gərginlik hökm sürür. “Baxmayaraq ki, bundan əvvəl Fransa-Azərbaycan münasibətlərində nisbi sabitlik vardı. Xüsusilə əvvəlki prezidentlərin dövründə bu cür açıq-aşkar şəkildə düşmənçilik meylləri yoxdur. Emmanuel Makronun prezidentliyi dövründə qatı ermənipərəst mövqe ortaya qoyuldu və dövlət siyasətində dəyişikliyə uyğun olaraq Azərbaycanda fəaliyyət göstərən səfirlər də addımlar atırdılar. Bu da Fransa-Azərbaycan münasibətlərini kölgədə qoyurdu və açıq-aşkar şəkildə müxtəlif müstəvilərdə ölkəmizə qarşı hücumlar təşkil olunurdu. Bu, eləcə də səfirlərin fəaliyyətinə təsir göstərirdi.
Hesab edirəm ki, Fransanın Azərbaycana yeni təyin olunan səfiri Sofi Laqut Azərbaycan-Fransa münasibətlərinin inkişafında təsirli addımlar atmalıdır. Ondan əvvəlki səfir Ann Buayon baxmayaraq ki, Fransanın maraqlarını təmin etməyə çalışırdı, eyni zamanda işğaldan azad olunmuş ərazilərə səfərlərdə də iştirak edirdi. Bu da çox mühüm göstərici hesab oluna bilər. Lakin bir çox hallarda onun yazıları və sosial şəbəkə hesablarında tvitləri Azərbaycanda müzakirələrə səbəb olurdu. Hesab edirəm ki, yeni səfir bu səhvləri buraxmamalıdır, reallıqları qəbul etməlidir”.
İ.Hüseynovun sözlərinə görə, zatən Vaşinqtonda qəbul olunan razılaşma bundan ibarətdir ki, ATƏT-in Minsk qrupu artıq buraxılsın və Prezident İlham Əliyev də Kəlbəcərdəki çıxışında ATƏT-in Minsk qrupunun artıq son günlərini yaşadığını bildirib. “Beləliklə, Fransanın Minsk qrupu çərçivəsində regiona müdaxilə imkanları sıfıra enir. Yenidən münasibətlərin qurulmasına cəhd göstərilməlidir, başqa formatlar tapılmalıdır ki, siyasi-iqtisadi, humanitar sahədə əlaqələr geniş olsun. Bizim Fransaya qarşı heç bir düşmənçiliyimiz, münasibətləri pozmaq niyyətimiz yoxdur. Fransanın qədim tarixinə, mədəniyyətinə, fəlsəfəsinə, ədəbiyyatına da böyük hörmətlə yanaşırıq. Elə bu kontekstdə münasibətlərin inkişafı üçün yaxşı potensial, ideyalar var. Yetər ki, yeni səfir regionda missiyasına uyğun fəaliyyət göstərsin və Azərbaycanın daxili işlərinə qarışmasın, geopolitik problemlər yaşanmasın. Səfirin üzərinə düşən öhdəliklər kontekstində münasibətlərin inkişafında maraqlı olsun”-deyə İ.Hüseynov qeyd etdi.
İradə SARIYEVA
