Məhərrəm Zülfüqarlı: “Görünən odur ki, Rusiya yenidən erməni separatizmi kartını işə salmaq istəyir”
Ermənistanda məskunlaşan separatçılar ATƏT-ə üzv dövlətlərə müraciət edərək, Minsk Qrupunun dağılmasının qarşısını almaq üçün veto hüququndan istifadə etməyə çağırıblar. Separatçılar bunu “əsaslandırmaq” üçün müxtəlif uydurmalarla çıxış ediblər.
O da məlumdur ki, 2023-cü ildə Qarabağdan köç edən ermənilərin əksəriyyəti Ermənistana gəlib. Rəsmi açıqlamalara görə, bu ilin avqustuna qədər 10 mindən çox Qarabağ ermənisinə Ermənistan pasportu verilib. Onların bir hissəsi isə müxtəlif xarici ölkələrə köç edib. Bunlar fonunda Ermənistan artıq başa düşür ki, Azərbaycanla razılaşmadan heç bir gələcəyi yoxdur. Qarabağ ermənilərinin əksəriyyəti Paşinyanın geri qayıtmağın perspektivi olmadığı ilə bağlı fikirlərini dəstəkləyib. Yəni böyük bir hissə Paşinyanı dəstəkləyir, amma Qarabağı tərk edən ermənilərin kiçik hissəsi buna qarşı çıxaraq ATƏT-ə müraciət edir.
Bütün bunların arxasında Kreml dayana bilərmi? Ola bilərmi, separatçıları belə bir müraciətlə çıxış etməyə Moskva təhrik etsin, qızışdırsın?
“İndi nə 90-cı illərin əvvəlləridir, nə də Azərbaycan əvvəlki Azərbaycandır”
Sözügedən məsələyə aydınlıq gətirən tarix elmləri doktoru Məhərrəm Zülfüqarlı “Bakı-Xəbər”ə açıqlamasında bildirdi ki, Qarabağ probleminin yaradıcısı, memarı Rusiyadır: “Biz bunu heç vaxt diqqətdən qaçırmamalıyıq. Çar Rusiyasından başlayaraq, SSRİ dövründə bu davam edib. İndi də Putin dövründə sözügedən proses tam açıqlığı ilə davam etdirilir. Artıq Ermənistan rəhbərliyi konstruktiv mövqe tutaraq Azərbaycanla Türkiyə arasında münasibətlərin yaxşılaşdırılmasının tərəfdarıdır. ATƏT-in bilavasitə yaradıcısı olan ABŞ Minsk Qrupunun artıq lazımsız qurum olduğunu elan edir. Ancaq buna baxmayaraq, Rusiya yenə sözügedən problemin qalması üçün son cəhdlərini edir. Ona görə son cəhdlərini edir ki, bunların heç bir nəticəsi olmayacaq. Niyə? Birincisi, könüllü şəkildə və bunlara qarşı heç bir təzyiq olmadan ermənilər Qarabağı tərk ediblər. Halbuki, azərbaycanlılar 1988-ci ildən başlayaraq döyülə-döyülə, öldürülərək dədə-baba yurdlarından qovuldular. Əgər qayıtmaqdan söhbət gedirsə, birincisi, azərbaycanlılar Ermənistanda öz yurdlarına qayıtmalıdır. İkincisi, Azərbaycan Qarabağ ermənilərinin qayıtmasına qarşı deyil. Onlar Azərbaycanın şərtləri çərçivəsində qayıda bilərlər. Yəni azərbaycanlılar öz yurdlarına geri qayıtmalı, Qarabağa qayıdan ermənilər də Azərbaycanın qanunlarını qəbul etməlidir. Görünən odur ki, Rusiya yenidən erməni separatizmi kartını işə salmaq istəyir. Ancaq bunlar anlamaq istəmir ki, heç vaxt bu işləməyəcək. Çünki indi nə 90-cı illərin əvvəlləridir, nə də Azərbaycan əvvəlki Azərbaycandır. Rusiya bütün qonşu ölkələr üçün bir təhlükə mənbəyidir. Ona görə də əksər ölkələr bu dövlətdən məsafə saxlamağa çalışır. Rusiya Ukraynada qalib gəlsəydi, bütün postsovet ölkələri üçün qaçılmaz təhdid yarana bilərdi. Çünki bu ölkədən nə desən gözləmək olar. Rusiya beynəlxalq hüquqa hörmət etməyən dövlətdir. Ancaq Putinin apardığı imperiya siyasəti ən çox rus xalqının özünə ziyandır. Hər gün Rusiya Ukraynada böyük insan və maddi resurslar itirir. Bütün bunlar bir müddət sonra Rusiyada ciddi fəsadlara gətirib çıxaracaq. Artıq rusların özləri Rusiyadan qaçır. Mənasız müharibə Rusiyaya fəlakət vəd edir”.
Vidadi ORDAHALLI
