"Bakı-Xəbər" qəzetinin baş redaktoru, politoloq Aydın Quliyev öz facebook səhifəsində ABŞ Prezidenti Donald Trampın son açıqlamaları barədə fikirlərini bölüşüb.
A.Quliyev yazır:
"Vaşinqtonda Trampla Almaniyanın kansleri Mertsin dialoqunda son dərəcə ilginc bir nüans diqqətdən yayınmadı. Merts Ukraynada atəşkəsin zəruriliyini qeyd edəndə Tramp ona "mən 6 müharibəni dayandlrmışam" deyərək bu sırada Azərbaycanla Ermənistanı da qeyd etdi. Yəni, bu müharibəni də dayandırdığını söylədi.
Cənab Tramp 6 müharibə deyəndə tam silahını açmasa da, güman ki, Hindistan- Pakistan, Ruanda- Konqo, Tailand -Kamboca ilə yanaşı, Azərbaycanla Ermənistanı da qeyd etdi. Bəlkə də Ukrayna və Qəzza müharibələrini də bu siyahıda gördü. Baxmayaraq ki, Qəzzada və Ukraynada hələ də müharibə gedir...
Ən azı tarixə obyektiv münasibət xatirinə demək lazımdır ki, Tramp Azərbaycan- Ermənistan normallmasına xüsusi diqqət yetirir və bu məsələni tam həll edən lider olmaq istəyir. Ancaq göstərilən münaqişə və müharibələri heç bir halda Azərbaycan - Ermənistan münasibətləri ilə eyniləşdirmək olmaz. Azərbaycan- Ermənistan müharibəsində atəşkəs indi yox, 1994- cü ildə əldə olunmuşdu, münaqişə indi yox, 2023- cü ildə heç bir vasitəçi olmadan Azərbaycanın özü tərəfindən həll edilmişdir, 2025- ci ilin martında saziş layihəsi Bakıda və Yerevanda rəsmi təsdiq edildikdən sonra isə hətta sərhədlərdə də atəş səslərinə son qoyuldu. Beləliklə, cənab Trampın Azərbaycan- Ermənistan müharibəsini dayandırması fikri həqiqət sayıla bilməz .
Lakin bu həqiqət Trampın Qafqazda sülh naminə etdiklərini və bundan sonra edəcəklərini nəzərdən qaçırmağa əsas ola bilməz.
Qafqazda dayanıqlı sülh naminə Trampın tarixi əhəmiyyətli missiyası hələ təzə başlanır. Təbii ki, cənab Trampın özünün bunu qəbul edəcəyi haldan danışırıq. Qafqazda davamlı sülhün hər iki tərəfin sazişə imza artmasından sonra bərqərar olacağını düşünmək səhv olardı. Əksinə, sülhün yolunda böyük çətinliklər məhz sazişə imzaların atılmasından sonra başlaya bilər.Trampın missiyası bu halda işə düşməlidir və Trampdan bölgəmizdə sülh naminə ən böyük dəstək gözləntisi də məhz buradan başlayacaq.
Beləliklə, cənab Trampdan gözlədiklərimiz:
1. Ermənistan rəhbərini mümkün qədər qısa müddətdə Azərbaycanla sülh sazişinə imza atmağa təşviq etmək.
2. İmzalanandan sonra beynəlxalq hüquq çərçivəsində hər iki ölkənin suverenliyini və təhlükəsizliyini qarantiya aıtına almaq.
3. Xüsusilə Ermənistanda revanşçı qüvvələrin həmlələri qarşısında sülhə imza atmış liderin hakimiyyətinin legitimliyini dəstəkləmək..
4. Normallaşma prosesini Rusiyanın pozucu təxribatlarından qorumaq...
5. Azərbaycanı bölgənin rifah və tərəqqisində
ən potensiallı və tranzit imkanları olan ölkə kimi təsdiqləmək...."
Mətləb
