Təbriz Musayev: “Paşinyanın Qarabağla bağlı çağırışı reallıqlara söykənir”
Avqustun 18-də Ermənistan baş naziri Nikol Paşinyan xalqa müraciətində Ermənistanla Azərbaycan arasında sülhün bərqərar olduğunu deyib.
Paşinyan bildirib ki, Qarabağ mövzusu qapadılmadan sülh mümkün deyil və Qarabağdan didərgin düşənlərin geri qaytarılması ilə bağlı ideyalar real deyil.
“Bu strategiya ilə razılaşmayanlar istəsələr də, istəməsələr də, münaqişənin yenidən canlandırılması məntiqinə düşürlər. Qarabağdan didərgin düşmüş həmvətənlərimiz Ermənistanda məskunlaşmalı, burada yaşamalı, yaradıcı fəaliyyətlə məşğul olmalı və Ermənistan Respublikasının tamhüquqlu vətəndaşı kimi cəmiyyətə inteqrasiya olunmalıdırlar”, - Ermənistanın baş naziri bildirib.
“Bu sülh – Real Ermənistan ideologiyasının qələbəsidir. Sülh bərqərar olunub və bizim vəzifəmiz bu sülhü qorumaq və zamanla daha da institusional etməkdir” deyə Paşinyan müraciətini yekunlaşdırıb.
“Əks təqdirdə Ermənistan düşdüyü təcrid vəziyyətindən çıxa bilməz”
Sözügedən məsələni “Bakı-Xəbər”ə şərh edən İrəvan Azadlıq Təşkilatının sədri Təbriz Musayev hesab edir ki, Paşinyanın Qarabağla bağlı çağırışı reallıqlara söykənir: “Ermənistan normal dövlət olmaq istəyirsə, mütləq Qarabağ məsələsindən birdəfəlik imtina etməlidilər. Əks təqdirdə Ermənistan düşdüyü təcrid vəziyyətindən çıxa bilməz. Azərbaycan və Türkiyə ilə normal münasibətlər qurmaq mümkün olmayacaq. Rusiyanın bilavasitə iştirakı ilə Qarabağı işğal edib 30 ilə yaxın nəzarətlərində saxladılar. Bununla nə qazandılar? Strateji baxımdan heç nə. Yalnız bir qrup quldur Azərbaycanın sərvətlərini talayaraq bundan milyonlar qazandı. Ermənistan daxil, dünyanın heç bir dövləti separatçı rejimi tanımadı. Yeri gəlmişkən, bu, işğal dövründə Azərbaycanın diplomatik müstəvidə əldə etdiyi uğurlardan biri idi. 2008-ci ildə Kosovonun müstəqilliyini elan etməsi, ondan sonra 4 dövlətin Abxaziya və Cənubi Osetiya separatçılarını “tanımaları” Qarabağ üçün də bənzər risqlər yaradırdı. Xüsusən də o vaxt Uruqvay bunu nəzərdən keçirib. Şükürlər olsun ki, bunların heç biri baş vermədi və illər sonra Azərbaycan hərb yolu ilə ərazi bütövlüyünü, suverenliyini tam bərpa etdi. Paşinyan bütün bunların fərqində olduğu üçün belə bir müraciət edib. Çünki Ermənistanın demoqrafik göstəriciləri getdikcə pisləşir. Ölkədə həm doğum səviyyəsi azalıb, həm də miqrasiya artıb. Ancaq 2023-cü ilin sentyabrında Qarabağdan ermənilərin könüllü olaraq Ermənistana köç etməsi bu ölkədə demoqrafik duruma müsbət təsir edib. Ermənistanda rəsmi səviyyədə belə yanaşma erməni separatizminin kökünü kəsmək baxımından müsbət haldır. Bu, həm də separatçıların xarici ölkələrdə Azərbaycana qarşı təxribatlarını neytrallaşdırmaq baxımından əhəmiyyətlidir. Ona görə də Azərbaycana siyasi baxımdan sərfəlidir ki, Paşinyan hakimiyyətdə qalsın. Gələn il keçiriləcək seçkilərdə qalib gəlsin. Düzdür, bu o demək deyil ki, Robert Köçəryan hakimiyyətə gəlsə ərazilərimiz yenidən işğal ediləcək. Əsla belə olmayacaq. Çünki Azərbaycan çox güclü dövlətdir. Sadəcə, Ermənistanla gərginliyin ortadan qaldırılması nöqteyi-nəzərdən indiki hakimiyyətin mövcudluğu bizə sərfəlidir”.
Vidadi ORDAHALLI
