Məhəmməd Əsədullazadə: “Hesab edirəm, Azərbaycan Ukraynaya silah yardımında bir o qədər tələsməməlidir”
Məlum olduğu kimi, avqustun 18-nə keçən gecə Odessa vilayətində SOCAR-a məxsus neft bazası Rusiyanın zərbə dronlarının kütləvi hücumuna məruz qalıb. Hücumdan sonra şəhərdə güclü partlayış qeydə alınıb.
Dağıntıların miqyası və itkilər barədə dəqiq məlumat açıqlanmayıb. Qeyd edək ki, bu, Rusiyanın SOCAR-ın Ukraynada yerləşən obyektlərinə ilk zərbəsi deyil. Bundan öncə də həm Odessadakı digər yanacaqdoldurma məntəqələri, həm də Azərbaycanın Ukraynaya qaz nəql edən infrastrukturu Rusiya raket hücumlarının hədəfinə çevrilmişdi. Beləliklə, Moskvanın ardıcıl olaraq Azərbaycan şirkətinə aid obyektləri vurması diqqət çəkir.
Birinci zərbədən sonra belə məlumatlar yayıldı ki, Azərbaycan Ukraynaya qarşı silah embarqosunu götürə bilər. Artıq Rusiya ikinci dəfə Azərbaycanın Ukraynadakı neft məntəqəsini hədəf aldı və bu, təsadüfi deyil. Məlum olur ki, Rusiya SOCAR-ın obyektlərini qəsdən vurur. O baxımdan Azərbaycan Ukraynaya silah yardımını qadağan edən embarqonu ləğv edə bilərmi?
“Biz yaratdığımız yeni reallıqlara köklənməliyik və bundan çıxış edərək siyasətimizi qurmalıyıq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Rusiyanın Azərbaycanın Ukraynadakı neft anbarlarına hücumunda məqsəd ölkəmizin iqtisadiyyatını hədəf almaqdır: “Çünki SOCAR obyektlərinə ikinci belə zərbənin endirilməsi bunun məqsədyönlü şəkildə həyata keçirilməsindən xəbər verir. Eyni zamanda bu, Rusiyanın Azərbaycana qarşı hibrid müharibəsinin tərkib hissəsidir və bu prosesi davam etdirir. Hesab edirəm ki, Azərbaycan Ukraynaya silah yardımında bir o qədər tələsməməlidir. Bu, Rusiyanın açıq şəkildə Azərbaycana qarşı aqressiv siyasət yeritməsinə, yeni təxribatlar törətməsinə bəhanə verə bilər. Çünki Azərbaycanın Ukraynaya silah verməsi praktiki baxımdan ciddi dəyişikliklərə səbəb olmayacaq. Ona görə ki, Azərbaycan ABŞ kimi böyük və vəziyyəti dəyişə biləcək imkanlara malik deyil. Fakt odur ki, Azərbaycan Cənubi Qafqazda yeni reallıqlar yaradıb. Azərbaycan müstəqil siyasət həyata keçirir və Rusiya da bunu qəbul etmir. Ona görə də Azərbaycana qarşı bu təzyiqləri davam etdirməkdədir. Güman edirəm ki, Azərbaycan rəhbərliyi bu konteksdə adil qərarlar qəbul edəcək və Rusiyanın təxribatlarına uymayacaq. Beynəlxalq geosiyasi rəqabətin subyekti olmayacaq. Sülh prosesinə töhfə vermək çərçivəsində Ukraynaya humanitar yardımlarını davam etdirəcək. Hesab edirəm ki, proses bu istiqamətdə olacaq. Biz yaratdığımız yeni reallıqlara köklənməliyik və bundan çıxış edərək siyasətimizi qurmalıyıq. Çünki Rusiya ilə Azərbaycan quru və dəniz sərhədinə malikdir. Gərginlik sonsuza qədər davam etməyəcək. Artıq Rusiyanın Ukraynada mövqeləri kifayət qədər zəifləyib və bunu nəzərə almaq lazımdır. Qərb ciddi şəkildə bu məsələdə yekdil mövqe ortaya qoyur. Rusiya Ukraynada zəiflədikcə, Azərbaycanla münasibətləri yoluna qoyacaq”.
Vidadi ORDAHALLI
