Ramil Hüseynov: “Kreml təbliğatının irəli sürdüyü məqamlar reallıqla uzlaşmır”
Rusiya mediası, təbliğat ruporları belə bir fikir üzərində dayanırlar ki, avqustun 15-də Alyaskada Vladimir Putinlə Donald Trampın görüşündən sonra iki ölkə prezidentlərinin şəxsi münasibətləri xeyli dərəcədə yaxşılaşıb. Eyni zamanda, bu münasibətlərin yaxşı olmasını Putinin uğuru kimi qələmə verirlər.
Ancaq reallıqda bu heç də belə görünmür. Çünki reallıqda görsənir ki, bu, uzun müddət davam etməyəcək. Axı Tramp çox yaxşı başa düşür ki, Putinlə münasibətlərin düzəlməsi Avropa kimi müttəfiqi, böyük iqtisadi partnyoru itirmək deməkdir. Ona görə də bu, müvəqqəti bir haldır.
O baxımdan Rusiyada bu eyforiyanın nə qədər əsası var? Həqiqətənmi Alyaska görüşündə Putinlə Trampın münasibətləri düzəldi? Doğrudanmı Putin-Tramp münasibətlərinin yaxşılığı uzun müddət davam edəcək?
“Trampın Putinlə münasibətləri Rusiya mediasının iddia etdiyi kimi yüksək səviyyədə olsaydı...”
Sözügedən məsələ ilə bağlı fikirlərini “Bakı-Xəbər”lə bölüşən “Yeni Xətt” Siyasi Tədqiqatlar Mərkəzinin rəhbəri Ramil Hüseynov hesab edir ki, Rusiyanın demək olar bütün media resursları təbliğat üzərində qurulub: “Bu da təsadüfi deyil. Çünki Putin prezident olandan bir il sonra Rusiyada bütün aparıcı müstəqil media resurslarını sıradan çıxararaq dövlətin təbliğat ruporuna çevirdi. Bütün ölkə mediası Kremldən gələn tezislərlə işləyir. Bəli, 15 avqustda Alyaskada keçirilən Putin-Tramp görüşündə ilk baxışdan belə təəssürat yarandı. Həm də belə rəy yarandı ki, danışıqlar Putinin üstünlüyü və təşəbbüsü ələ alması ilə keçib. Reallıq isə bunun tam əksidir. Belə olmasaydı, avqustun 18-də Ağ Evdə Trampın Zelenski və Avropanın aparıcı 7 dövlət başçısı ilə görüşü yüksək səviyyədə keçməzdi. Trampın Putinlə münasibətləri Rusiya mediasının iddia etdiyi kimi yüksək səviyyədə olsaydı, o zaman ABŞ prezidenti Avropadan olan müttəfiqləri ilə sərt təzyiq dilində danışardı. Növbəti dəfə dünya mediasının gözü qarşısında Ukrayna prezidenti Zelenskini aşağılayardı, onu açıq formada təslim olmağa çağırardı. Amma bunların heç biri baş vermədi. Tam əksinə, Tramp Avropa dövlətlərinin narahatlıqlarını nəzərə alacağını bildirdi. Ukraynaya Birləşmiş Ştatlar tərəfindən təhlükəsizlik zəmanətinin veriləcəyini istisna etmədi. Digər tərəfdən, Tramp ABŞ-ın iqtisadi-ticarət maraqlarına xüsusi önəm verir. Təkcə 2024-cü ildə ABŞ və Avropa İttifaqı arasında iqtisadi əlaqələr rekord səviyyəyə çatıb: mallar və xidmətlər üzrə ticarət dövriyyəsi 2 trilyon dollar təşkil edib. Məgər Tramp bilmirmi ki, Avropa ilə münasibətlər pozulsa bunun Birləşmiş Ştatlar üçün zərəri həddən ziyadə böyük olacaq? Ona görə də Kreml təbliğatının irəli sürdüyü məqamlar reallıqla uzlaşmır. Ukrayna ilə bağlı danışıqlar bu dəfə də real nəticə verməsə, ABŞ-ın Rusiyaya qarşı sanksiyaları sərtləşdirmək ehtimalı böyükdür”.
Vidadi ORDAHALLI
