Tramp Əliyevin sülh, enerji və təhlükəsizlik kursunu tam dəstəklədi... Ziyanlı Bayden mərhələsi bitdi...

Amerika Birləşmiş Ştatlarının prezidenti Donald Trampın 28 May - Müstəqillik Günü münasibətilə Azərbaycan prezidenti İlham Əliyevə ünvanladığı təbrik məktubu iki ölkə arasında münasibətlərin inkişafında yeni mərhələnin başlanmasının növbəti təsdiqi hesab edilə bilər.
Qeyd edək ki, əvvəlki Cozef Bayden administasiyası dönəmində ABŞ-ın mövqeyi səbəbindən münasibətlərdə gərginlik yaranmışdı. Amma Donald Tramp fərqli mövqe sərgiləyir.
Bölgədə siyasi və iqtisadi maraqlarını gizlətməyən ABŞ da regionda inkişafın perspektivini Azərbaycanla tərəfdaşlıqda görür. Bura ilk növbədə enerji sahəsi aiddir. Bu xüsusda Tramp bildirir: “Biz Azərbaycan Respublikası ilə əlaqələrimizi və terrorizmə qarşı mübarizədə, enerji təhlükəsizliyinin inkişafında, qonşunuzla sülhə nail olmaq istiqamətində ABŞ ilə tərəfdaşlığınızı yüksək qiymətləndiririk. 30 ildən artıq diplomatik münasibətlərimiz müddətində əlaqələrimiz əhəmiyyətli dərəcədə inkişaf edib. Biz ümidvarıq ki, ikitərəfli prioritetlərimiz, o cümlədən təhlükəsizlik sahəsində əməkdaşlığımız, iqtisadi münasibətlərimiz və enerji inkişafı üzrə tərəfdaşlığımız bundan sonra da davam edəcək”. Qeyd edək ki, ABŞ Azərbaycanın neft strategiyasının həyata keçirilməsini ilk gündən dəstəkləyib. Bu illər ərzində Azərbaycanın ərsəyə gətirdiyi neft və qaz ixrac marşurutları indi daha çox əhəmiyyətə malikdir. Qərbin sanksiyalarının tətbiqi nəticəsində Rusiyanın neftindən və qazından imtina edilməsi istiqamətində addımlar atıldığı bir zamanda Azərbaycanın neft və qaz ehtiyatları əvəzsiz rol alıb. Bunu ABŞ da qəbul edir. ABŞ regional və qlobal bazarların sabitləşdirilməsi baxımından Azərbaycanın rolunu qəbul edir. Azərbaycanın səmərəli enerji siyasəti yeni əməkdaşlıq platformaları müəyyənləşdirməklə yanaşı, Avrasiyanın enerji xəritəsinin zənginləşməsinə strateji töhfələr verir. Bundan başqa, Azərbaycan yerləşdiyi coğrafiyadan çox səmərəli istifadə edərək beynəlxalq daşımaların həyata keçirilməsi üçün tranzit nəqliyyat marşurutlarını istifadəyə verib. Rusiya-Ukrayna müharibəsi beynəlxalq daşımaları həyata keçirilən marşurutlar xəritəsinə yenidən baxılmasını vacib edir. İstifadəyə verilən Şimal-Cənub, Qərb-Şərq tranzit nəqliyyat marşurutlarının, Bakı-Tiflis-Qars dəmir yolunun, Bakı Beynəlxalq Ticarət Limanının və Cənub Qaz Dəhlizinin beynəlxalq daşımaların həyata keçirilməsində daha təhlükəsiz və rentabelli olması bu gün əhəmiyyətini daha da artırıb. Ümumiyyətlə, Azərbaycanın iştirak etdiyi bütün layihələr nəinki ölkəmiz üçün, həm də dünya iqtisadiyyatının sabitləşməsində böyük rol alır. ABŞ prezidenti bu fonda Azərbaycanın fəaliyyətini yüksək dəyərləndirir. ABŞ liderinin təbrik məktubları dövlətimizin siyasətini dəstəklədiyini göstərir və bu işdə ölkəmizin yanında olduğunu diqqətə çatdırır.
Məktubda diqqət mərkəzinə gətirilən daha bir məqam sülhlə bağlıdır. Bununla bağlı Tramp yazır: “ABŞ Azərbaycan və Ermənistan arasında möhkəm sülhü dəstəkləməkdə davam edir. Davamlı sülh Cənubi Qafqaz regionunun daha firavan olmasını təmin edəcək və ABŞ-la əməkdaşlıq üçün daha geniş imkanlar yaradacaq. İndi sülhə nail olmağın və Cənubi Qafqaz xalqları üçün yeni firavanlıq dövrünə qədəm qoymağın vaxtıdır”. Vaşintqon Cənubi Qafqazda sülh, sabitlik və bölgə ölkələri arasında əməkdaşlıqda, eyni zamanda bütün sahələrdə Azərbaycanla əməkdaşlığın inkişafında maraqlıdır. Ölkəmizin milli maraqlarına tamamilə uyğun olan yeni reallıqların dünya tərəfindən tanınması ABŞ-ın da regionla bağlı siyasətinə təsir edir. Azərbaycanın beynəlxalq siyasətdə ildən ilə artan rolu Cənubi Qafqaz bölgəsində sülhün və təhlükəsizliyin təmin olunmasında əsas faktorlardan biridir. Azərbaycan və Ermənistan arasında münasibətlərin tənzimlənməsi və sülh müqaviləsinin imzalanması Bakının təşəbbüsüdür. ABŞ hazırda Cənubi Qafqazda davamlı sülhə nail olmaq üçün mühüm imkanın olduğuna inanır və bu baxımdan Azərbaycan ilə Ermənistan arasında diplomatik təmasların intensivləşdirilməsinə və ölkəmizin iqtisadi, nəqliyyat və insanlararası əlaqələrinin qurulmasına kömək etməyə hazır olduğunu bildirir. Bununla ABŞ bütün Qafqaz və hətta transxəzər regionunun inkişafında, Cənubi Qafqazda sülhün əldə olunmasında Azərbaycanın müstəsna roluna və imkanlarına diqqət çəkir. Bu fonda məktubunda Tramp digər mühüm nüansa diqqət çəkir: “Biz qarşıdakı illərdə və onilliklər ərzində daha dərin tərəfdaşlığa ümid edirik”. Beləliklə, ABŞ Azərbaycanla daha sıx münasibətlərin qurulmasında maraqlı tərəf qismində çıxış edir. Bu fonda ABŞ qarşıdan gələn illər, hətta onilliklərdə Azərbaycanla münasibətləri daha da genişləndirmək arzusunda olduğunu vurğulayır. Yəni, burada sadəcə olaraq əməkdaşlığın inkişafı nəzərdən keçirilmir, qəti olaraq bildirilir ki, ABŞ Azərbaycanı bundan sonra, gələcək on illər ərzində özünün stateji tərəfdaşı kimi görür və əməkdaşlıq imkanlarını genişləndirməyi planlaşdırır. Bütün bunlar Azərbaycanın həyata keçirdiyi siyasətin nə qədər düzgün və uzaqgörən xarakter daşıdığını bir daha isbatlamış olur. Trampın məktubunda əksini tapan fikirlər də Azərbaycanın xarici siyasətinin milli maraqlar əsasında qurulduğunu və dünyanın aparıcı dövlətləri tərəfindən dəstəkləndiyini təsdiqləyir.
Ramil QULİYEV