Bu həqiqətən böyük ədalətsizlik olub - erməni mediası İlham Əliyevdən sitatlar gətirir...
Mehman İsmayılov: “Azərbaycan Prezidenti bir daha təsiqlədi ki, Zəngəzur Azərbaycan torpağıdır, Zəngəzurun Şərqi də, Qərbi də Azərbaycanındır”
“...107 il bundan əvvəl müsəlman aləmində ilk demokratik respublika - Azərbaycan Xalq Cümhuriyyəti yaradılmışdır. Bu, böyük tarixi hadisə idi. Əfsuslar olsun ki, Azərbaycan Xalq Cümhuriyyətinin ömrü uzun olmadı. İki il sonra - 1920-ci ilin aprel ayında müstəqilliyimiz əlimizdən alınmışdır. Ondan bir neçə ay sonra - 1920-ci ilin noyabr ayında sovet Rusiyası tərəfindən Qərbi Zəngəzur bölgəsi Azərbaycandan ayrılıb Ermənistana birləşdirilmişdir. Bu, böyük ədalətsizlik idi və Azərbaycan xalqı buna oxşar ədalətsizliklərlə tarix boyu üz-üzə qalmışdır. Ancaq xalqımızın iradəsi və qardaş xalqların dəstəyi bizə güc verirdi, bizi ruhlandırırdı və iradəmizi gücləndirirdi...”
Bu fikirləri Prezident İlham Əliyev mayın 28-də Laçında 28 May - Müstəqillik Gününə həsr olunmuş tədbirdə bildirib.
Azərbaycan Prezidentinin “Qərbi Zəngəzur bölgəsi Azərbaycandan ayrılıb Ermənistana birləşdirilmişdir. Bu böyük ədalətsizlik idi...” fikrini Ermənistan mediasında xüsusilə qabardıblar və bu daha çox ajiotaj yaradıb. Prezident İlham Əliyevin səsləndirdiyi bu tarixi faktdan, gerçəklikdən erməni mediası, erməni siyasətçiləri çox narahat olublar.
Onlar bundan niyə narahat olublar, niyə qeyzləniblər? Qərbi Zəngəzurun Azərbaycandan alınıb Ermənistana verilməsinin ədalətsiz olması fikrinə onlar niyə belə aqressiv yanaşırlar? Azərbaycan Prezidenti gerçəyi dilə gətirib, faktla danışıb, burda qıcıqlandırıcı nə var ki?
“Bu ədalətsizliyin Azərbaycan Prezidenti səviyyəsində səsləndirilməsi, üstəlik də Türkiyənin və Pakistanın liderlərinin iştirak etdiyi bir zirvədə vurğulaması...”
Politoloq Mehman İsmayılov “Bakı-Xəbər”ə bildirdi ki, Azərbaycan Prezidentinin Qərbi Zəngəzur barədə söylədiyi fikirlər olduqca haqlıdır, ədalətlidir, arqumentlidir: “1920-ci ilin 30 noyabrında Orconikidzenin, Stalinin, ümumiyyətlə bolşevik hakimiyyətinin təzyiqi ilə Qərbi Zəngəzuru Azərbaycandan qoparanda onların iki arqumenti var idi. Bu, Orconikidzenin Stalinə vurduğu telqramda açıq-aydın yazılırdı: birincisi, Türkiyə ilə Azərbaycanı bir-birindən qoparmaq, Türkiyənin 1918-ci ildə olduğu kimi Zəngəzurun ərazisindən Azərbaycanın köməyinə gəlməsinin qarşısını almaq, ikincisi, daşnaklarla erməni kommunistlərinin savaşında kommunistlərə hədiyyə vermək üçün Azərbaycan torpağını qoparmaq məqsədi güdürdü. Digər tərəfdən, məqsəd Türkiyə ilə Azərbaycan arasında bir süni xristian zolağı yaradıb hər zaman bu bəhanə adı altında burda qoşun yerləşdirmək, ermənilərin müdafiəsi adı altında bu bölgəni öz işğalında saxlamaq idi. Azərbaycan Prezidenti haqlı olaraq bu fikri söylədi ki, bu, Azərbaycana qarşı Moskvanın həyata keçirdiyi çox böyük ədalətsizlik idi. Bu ədalətsizliyin Azərbaycan Prezidenti səviyyəsində səsləndirilməsi, üstəlik də Türkiyənin və Pakistanın liderlərinin iştirak etdiyi bir zirvədə vurğulaması, əlbəttə ki, dünya erməniliyini və onların havadarlarını çox narahat edir. Ermənilər anlayırlar ki, gec, ya da tez tarixi həqiqət qələbə çalacaq. Ermənilər anlayırlar ki, “Zəngəzur dəhlizindən” Azərbaycan imtina etməyəcək. Bu, türk dünyasını bir-birinə birləşdirmək və bu 100 ildən sonrakı Azərbaycana qarşı edilmiş ədalətsizliyin ortadan qaldırılması demək olacaq”.
M.İsmayılovun sözlərinə görə, bu səbəbdən İranın, Ermənistanın və erməniləri, Ermənistanı, dünya erməniliyini dəstəkləyən bütün xarici qüvvələrin “Zəngəzur dəhlizinə” göstərdiyi müqavimətin yersiz olduğunu Azərbaycan Prezidentinin bu nitqi bir daha təsdiqlədi. “Azərbaycan Prezidenti bir daha təsiqlədi ki, Zəngəzur Azərbaycan torpağıdır, Zəngəzurun Şərqi də, Qərbi də Azərbaycanındır. Bu, əlbəttə ki, erməniləri narahat edəcəkdi. Çünki onlar uzun müddət belə düşünürdülər ki, Azərbaycan nəinki Zəngəzuru, heç Qarabağı geri ala bilməyəcək. Amma Azərbaycan xalqı, Azərbaycan Prezidenti, Türkiyə-Pakistan-Azərbaycan qardaşlığı bir daha göstərdi ki, Azərbaycan çox güclüdür, Azərbaycanın tarixi iradəsi yerindədir, Azərbaycan öz torpaqlarından vaz keçməyib, vaz keçməyəcəkdir. Gələcəkdə Azərbaycanın Ermənistana qarşı açacağı 809 milyard dollarlıq təzminat davasının sonunda Azərbaycan öz torpaqlarını geri tələb edə biləcək. Bütün bu fikirlər və bu fikirlərdən çıxan nəticələr, əlbəttə ki, erməniləri narahat edir və etməlidir də” - deyə M.İsmayılov qeyd etdi.
İradə SARIYEVA
