Sədrəddin Soltan: "... bütün bunlar Tehran hakimiyyətinin Ermənistandan Cənubi Qafqazda alət kimi istifadə etməsinin göstəricisidir"
İran xarici işlər nazirinin müavini Səid Xətibzadə bildirib ki, İran tərəfi prezident Məsud Pezeşkianın İrəvana səfərini planlaşdırır.
“Hazırda biz dövlət başçısının İrəvana səfərini planlaşdırırıq: “İki paytaxt arasında siyasi məsləhətləşmələr var, iqtisadi sahədə münasibətlər çox yüksək səviyyədədir və yaxın gələcəkdə nəqliyyatda sıfır faiz dərəcəsi tətbiq olunanda iqtisadi əməkdaşlıq sürətlə inkişaf edəcək”, - deyə Xətibzadə qeyd edib.
O əlavə edib ki, yeni texnologiyalar sahəsində də yaxşı əməkdaşlıq qurulub.
Pezeşkianın Azərbaycandan sonra Ermənistana səfəri Bakı-İran münasibətləri baxımından nəyi hədəfləyir?
Baki-xeber.com saytına açıqlamasında Orta Doğu Araşdırmaları Mərkəzinin rəhbəri, siyasi sərhçi Sədrəddin Soltan bildirdu ki, Məsud Pezeşkianın İrəvana səfəri yeni bir məsələ deyil: "Bundan əvvəlki prezident, helikopter qəzasında ölən İbrahim Rəisi hələ ötən ilin yayında Ermənistana səfər etməyi planlaşdırmışdı. Bu baxımdan Məsud Pezeşkianın İbrahim Rəisinin, yəni 12-ci hökumət başçısının icra edilməyən proqramını bir il gecikmə ilə həyata keçırəcək. Səfərin dəqiq tarixi hələlik bəlli deyil. Ermənistanla İran arasında bu səviyyədə səfərlərin edilməsində qeyri-adi heç nə yoxdur.
İran hakimiyyətinin Ermənistana münasibəti, onlar arasında yaxın əlaqələr cəmiyyətə bəllidir. İran Ermənistandan Azərbaycana qarşı torpaqları işğal altinda olan dövrdə təzyiq vasitəsi kimi istifadə edib. Bu gün də Ermənistan İranın əlində Azərbaycana qarşı alət rolunu oynamaqdadır.
Son zamanlar Ermənistanla hərbi əməkdaşlığın inkişafı, onun cilalanması, Zəngəzur yolu ilə bağlı müzakirələrdə guya Ermənistanın ərazi bütövlüyünü müdafiə edirmiş kimi bu layihənin reallaşmasına süni əngəllər yaratması, bütün bunlar Tehran hakimiyyətinin Ermənistandan Cənubi Qafqazda alət kimi istifadə etməsinin göstəricisidir.
Hesab edirəm ki, Məsud Pezeşkianın səfəri baş tutarsa ikitərəfli iqtisadi-ticarət əlaqələrində, xüsusilə enerji təchizatında İranın rolunun artırılması əsas müzakirə mövzusu ola bilər. Çünki Ermənistan Rusiyanın energetika cətirinin altından çıxmağa səy göstərir. Əvvəllər də belə olmuşdu - Paşinyan hakimiyyətə gələndən sonra Rusiya qazını İran qazı ilə əvəz etmək, yaxud İraqdan Ermənistana qaz ötrülmək barədə danışıqlar aparılıb. Bütün hallarda Ermənistanın enerji təchizatında İranın rolunun artırılması məsələsi müzakirə edilə bilər. Odur ki, Məsud Pezeşkianın Ermənistan səfəri onun Tacikistana səfərindən heç nə ilə fərqlənməyəcək. Məsud Pezeskian Tacikistana səfər edəndə (bu onun prezident kimi ilk səfəri idi) də bildirilmişdi ki, bu ölkəni özünə doğma bilir, tacik dilinin fars dilinə yaxın olması, iki xalq arasında mədəni-milli yaxınlıqdan danışmışdı. Həmin səfər zamanı da bir neçə iqtisadi-ticarət və enerji təchizatına dair müqavilə imzalanmışdı. Oxşar hadisələr Ermənistanda da baş verəcək.
Hesab etmirəm ki, bu səfər Azərbaycan-İran münasibətlərinə elə də ciddi təhlükə yaradacaq. Çünki Azərbaycan İranın Ermənistana münasibətini - ondan bir alət kimi istifadə etdiyini çoxdan bilir".
Akif NƏSİRLİ
