Əli Orucov: "Anti-Qərb ritorikası İrəvanda daha ucadan eşidilməkdədir, təbii ki, bu da “böyük bacı”nı qayğılandırmaya bilməz"
Fransanın xarici işlər naziri Jan-Noel Barronun Ermənistana rəsmi səfəri çərçivəsində üç sənəd imzalanıb. Bu barədə Ermənistan Xarici İşlər Nazirliyi məlumat yayıb.
Bu sənədlərdən biri də Fransa İnkişaf Agentliyi (AFD) ilə “İqtisadi Əməkdaşlıq üçün İctimai Yardım və İştirak” Şirkətinin (Proparco) yaradılması və fəaliyyəti haqqında Ermənistan və Fransa Hökumətləri arasında Sazişə dəyişikliklər edilməsi haqqında Protokoldur.
Sənəd agentliyin Ermənistan ərazisində yerli hakimiyyət orqanlarının, dövlət strukturlarının və nazirliklərin potensialının artırılmasına yönəlmiş fəaliyyətini nəzərdə tutur.
AFD, demək olar ki, Ermənistanda Trampın bütün dünyada fəaliyyətini dondurduğu USAID-in yerini doldurmaq istəyir. Belə çıxır ki, Fransa Ermənistanda ABŞ-ni əvəzləyəcək?
Baki-xeber.com saytının sualını cavablandıran politoloq Əli Orucov bildirdi ki, Fransanın Xarici işlər naziri J.Barronun Ermənistana səfəri regionda baş verən geopolitik dəyişiklər fonunda İrəvana dəstək və Parisin öz maraqlarını qoruyacağı ilə bağlı verilən mesaj kimi də xarakterizə oluna bilər: "Rusiyanın regionda fəallaşması, xüsusən də Ermənistanda öz tərəfdarlarını və əlatılarını hərəkətə gətirməsi Fransanın mövcudluğuna ciddi təhdidlər yaradır. Anti-Qərb ritorikası İrəvanda daha ucadan eşidilməkdədir, təbii ki, bu da “böyük bacı”nı qayğılandırmaya bilməz. Digər tərəfdən, ABŞ-Qərb ziddiyyətlərinin dərinləşməsi, Ağ Evin yeni administrasiya rəhbərinin Rusiyaya qarşı sərgilədiyi güzəştləri, həmçinin ticari-iqtisadi mənafelərin siyasi mənafeləri üstələməsi geostrateji bölgələrə də təsirini göstərməkdədir. Paris Avropada lider dövlət olmağa can atır və ümumilikdə qlobal siyasətdə söz sahibinə çevrilmək istəyir.
Fransa Ermənistanı sürətlə silahlandırır, onu yeni gərginlik ocağının yaradılmasına və konfliktə təhrik edir, bölgədə mürəkkəb situasiya yaratmağa çalışır.
İrəvanda səfərdə olan baş diplomat Barronun öz erməni həmkarı A.Mirzoyanla 3 sənəd imzalaması əslində mövcud olan müqavilələrin statusunu artırmaq və genişləndirmək məqsədi daşıyır. AFD (Fransa İnkişaf Agentliyi) Ermənistanda əvvəllər də mövcud idi və yerli hökümət oraqanları ilə də sıx əməkdaşlıq edirdi. Yeni imzalanan sənədlərdə iki ölkə xarici işlər nazirləri arasında illik məsləhətləşmələr, dezinformasiyaya qarşı birgə mübarizə, diplomatların kvalifikasiyalarının təkmilləşdirilməsi, yerli hakimiyyət orqanlarının, hakimiyyət strukturları və nazirliklərlə əlaqələrin daha da dərinləşməsi kimi məsələlər öz əksini tapıb. Bu isə o deməkdir ki, Paris Ermənistanda bütün sferalara, xüsusən də xarici siyasət sahəsinə nəzarəti əlinə alır.
Zatən belə bir nəzarət var idi. Ancaq imzalanan həmin sənədlərdən sonra Fransa Rusiyanı hüquqi baxımdan bir qədər də qabaqlamış oldu. Ancaq bu heç də o anlamı vermir ki, Kremlin diqtə imkanları məhdudlaşdırılır. Ermənistan Co Bayden dönəmində də Birləşmiş Ştatlar üçün cəlbedici dövlət deyildi. Baxmayaraq ki, hakimiyyətinin sonuna yaxın strateji əməkdaşlıq sazişi imzalandı. Lakin həmin saziş göründüyü kimi işlək mexanizmə çevrilmir. Odur ki, bu boşluğu da Parisin doldurması təşəbbüsləri var və bunun da praktik nəticələr verəcəyi inandırıcı deyil. Çünki ilk növbədə Rusiya faktoru Ermənistanda hegemon olaraq qalır".
Dəniz NƏSİRLİ
