“Bu, beynəlxalq birliyi aldatmaq üçün səsləndirilən fikirdir”
“Ermənistan və Azərbaycan arasında davamlı sülh nəinki mümkündür, həm də əldə edilə bilər”. Bu fikri Ermənistanın baş naziri Nikol Paşinyan II İrəvan Dialoqu beynəlxalq forumunda çıxışı zamanı səsləndirib. “Biz sülh gündəliyinə qətiyyətlə və məsuliyyətlə yanaşırıq. Həmçinin vəziyyəti və region xalqlarının taleyini tamamilə dəyişdirəcək sülh müqaviləsi və digər sənədlərin imzalanmasına nail olmaq üzrə Azərbaycanla məsləhətləşmələri davam etdirməyə hazırıq”.
Paşinyanın sözlərinə görə, bunun üçün Ermənistan əlindən gələni edəcək. “Bütün təxribatlara baxmayaraq, Ermənistanla Azərbaycan arasında müharibə olmayacaq, sülh olacaq və bu, mənə çox aydındır”, - deyə Paşinyan bildirib.
Paşinyan bu mesajları kimə verir?
“Paşinyan əgər sülh tərəfdarıdırsa, reallıqdan uzaq fikirlər səsləndirməsin, Azərbaycanın tələblərini yerinə yetirsin”
Azad Vətən Partiyasının sədri Akif Nağı “Bakı-Xəbər”ə bildirdi ki, Ermənistanın baş nazirinin bu fikirləri reallıqdan uzaqdır, onlar sülh prosesində maraqlı deyillər. “Ermənistan sülh müqaviləsinin imzalanmasını istəmir və mümkün olduğu qədər vaxtın uzanmasını istəyirlər ki, vaxt uzandıqca da vəziyyət dəyişsin, onlar da nəyəsə nail olsunlar. Onların məqsədləri bundan ibarətdir. Ona görə də, biz onların sözlərini başa düşürük, bu qətiyyən hədəfə yönəlik bir iş deyil. Bir tərəfdən silahlanırlar, bir tərəfdən bütün təşəbbüsləri pozurlar, bir tərəfdən Azərbaycana qarşı iddialarla çıxış edirlər, bir tərəfdən Qərbi Zəngəzurda Rusiyanın, Fransanın, İranın konsulluqlarını açırlar, Azərbaycanla şərti sərhədə hərbi texnika yığırlar, qoşun topalayırlar. Bütün bunlardan sonra da sülhdən danışıb “hökmən sülh olacaq” demələri siyasi oyunbazlıqdan başqa bir şey deyil. Bu, beynəlxalq birliyi aldatmaq üçün səsləndirilən fikirdir. Eyni zamanda da beynəlxalq birliyin özünün ssenarisidir. Reallığa baxsalar görərlər ki, Azərbaycan sülh istəyir, yoxsa Ermənistan. Bu zaman düzgün qərar verə bilərlər. Amma onlar qərar verib ortaya düzgün nəticə qoymaqda maraqlı deyillər”.
Prosesi real qiymətləndirmək istəməyən qüvvələrin Ermənistana manevr imkanı verdiyini deyən A.Nağı hesab edir ki, Ermənistan bir tərəfdən Rusiya ilə oynayır, bu ölkə ilə müəyyən yaxınlaşma var, o biri tərəfdən Qərblə, Avropa İttifaqı ilə yaxınlıq edirlər. İndi də Avropa İttifaqının Avropa və Mərkəzi Asiya ölkələrinin səfirlərinin iştirakı ilə elmi konfransın keçirilməsini Ermənistana saldığını deyən A.Nağı vurğuladı ki, Avropa Birliyinin siyasi toplantısının İrəvanda keçirilməsi planlaşdırılır, onlar Ermənistana dəstək verirlər, guya Ermənistan “demokratik prinsiplərə” əməl edir. “Ermənistanın bu cür qələmə verilməsi süni bir işdir. Əslində onlar burda özlərinin Ermənistan adlı bir meydançasını yaradırlar. Ermənistanın vasitəsilə burda öz mövqelərini gücləndirməyə, təsir imkanlarını artırmağa çalışırlar. Paşinyanın deməsi ki, onsuz da sülh müqaviləsi imzalanacaq, mən müharibə istəmirəm sülh istəyirəm, yalan fikirdir. Müharibə istəməyən ölkə silahlanmaz. Azərbaycan Ermənistandan qat-qat güclüdür və müharibə olarsa Ermənistan ordusunu darmadağın edər. Əgər sülh istəyirlərsə bunu əməldə də göstərsinlər. Sözdə sülh istədiklərini deməklə özlərini sülhpərvər göstərmək istəyirlər. İkinci fikirləri də “Orta Dəhliz” layihəsi ilə bağlıdır. Bilirsiz ki, “Orta Dəhliz” Azərbaycandan keçərək Gürcüstana, ordan da Türkiyəyə və Avropaya getməlidir. Onlar da süni şəkildə gah ona “sülh qovşağı” deyirlər, gah “yol ayrıcı” deyirlər və istəyirlər ki, yollar gəlib Ermənistandan keçsin, onlar ordan gəlir götürsün. Sülh oyunlarını ortaya atmaları Paşinyanın “sülh qovşağı” layihəsi ilə bağlıdır, onu reallaşdırmağa çalışırlar.
Hesab edirəm ki, Paşinyanın bu mesajı boş və mənasızdır, reallığı ifadə etmir. Azərbaycan tərəfindən sülh müqaviləsi üçün aydın şərtlər, tələblər var ki, onlar Ermənistanın konstitusiyası, Minsk qrupunun buraxılması ilə bağlıdır. Azərbaycan tərəfin ortaya qoyduğu bu və digər məsələlər düzgün məsələlərdir. Onların həlli regionda daimi sülhü təmin edəcək. Paşinyan əgər sülh tərəfdarıdırsa, reallıqdan uzaq fikirlər səsləndirməsin, Azərbaycanın tələblərini yerinə yetirsin. Əgər Azərbaycan tərəfin tələblərini yerinə yetirmirlərsə, onda dedikləri boş və mənasız sözlərdir, yalnız təbliğat xarakteri daşıyır, real addımlardan xəbər vermir.
Azərbaycan da bunu çox yaxşı bilir və hesab edirəm ki, sona qədər öz mövqeyini ortaya qoymalıdır. Doğrudan da Ermənistan yanlış yol gedib təxribat yolunu tutacaqsa Azərbaycan onun cavabını verməli, onları cəzalandırmalıdır, yarımçıq məsələlər var, onlar öz həllini tapmalıdır”.
Qərbi Azərbaycanın Azərbaycanın tarixi torpaqları olduğunu və 1920-ci ildə qanunsuz olaraq Ermənistana verildiyini vurğulayan A.Nağının sözlərinə görə, Azərbaycanın haqqı var ki, beynəlxalq hüquq çərçivəsində o torpaqları geri qaytarmağı beynəlxalq məhkəmələrdən tələb etsin. O qeyd etdi ki, əgər doğrudan da bu gün dünya hüquqla yaşayırsa onda bizim tələblərimizi yerinə yetirməlidir. A.Nağı bildirdi ki, digər tərəfdən də təhlükələr yaranır və Qərbi Zəngəzuru ayrı-ayrı dövlətlər bir hərb meydanına çevirirlər. O hesab edir ki, Qərbi Zəngəzurda konsulluqların açılması ənənəvi konsulluqlar anlamı daşımır, bunun arxasında başqa niyyətlər dayanır və həmin ölkələr o konsulluqları hərbi bazaya çevirəcəklər. Bunu təhlükə adlandıran A.Nağı dedi ki, əgər ora ayrı-ayrı ölkələrin hərbi bazasına çevirilirsə Azərbaycan buna imkan verməməli və Qərbi Zəngəzur Azərbaycana qaytarılmalıdır, ədalət bərpa olunmalıdır. “Həm beynəlxalq hüquqa görə, həm də həmin regionun hərbi təhlükə mənbəyinə çevrilməsi ilə bağlı məsələni nəzərə alıb o ərazilər geri qaytarılmalıdır. Birinci və İkinci Dünya müharibələri Balkanlardan, Şərqi Avropadan başlamışdı, deyəsən üçüncü dünya müharibəsi Qərbi Zəngəzurdan başlayacaq. Həmin ərazi də Azərbaycanın yaxınlığındadır. Ona görə də Azərbaycan bu təhlükəni nəzərə alaraq Qərbi Zəngəzur məsələsinin həllinə çalışmalıdır ki, Paşinyanın və onun komandasının belə boş-boş sülh bəyanatlarına yer qalmasın”-deyə A.Nağı bildirdi.
İradə SARIYEVA
