Qasım Hacıyev: “Prezident bu fikirləri söyləyərkən “demokratiya” donuna bürünüb müstəmləkəçilik və islamofob siyasət yürüdən Avropa ölkələrini nəzərdə tutur”
“Vaxtilə qul ticarəti ilə məşğul olan, işğalçılıq və müstəmləkəçilik siyasəti yürüdən, soyqırımıları törədən, indi isə özlərini insan hüquqlarının keşiyində duran demokratik ölkələr qismində təqdim edən bəzi ölkələrdə bu gün islamofobiya bir növ dövlət siyasətinə çevrilmişdir. Bu ölkələrdə dünyəvi dəyərlərin müdafiəsi adı altında müsəlmanların hüquqlarını və etiqad azadlığını məhdudlaşdıran qanunlar qəbul edilir, onların təhsil almaq, mənzilə sahib olmaq, işlə təmin olunmaq və digər hüquqları tapdalanır”.
Bu fikirlər Prezident İlham Əliyevin Bakıda “İslamofobiya: qərəzin ifşa olunması və stiqmaların dağıdılması” mövzusunda keçirilən beynəlxalq konfransın iştirakçılarına ünvanladığı müraciətdəndir.
Burda əsasən hansı ölkələr nəzərdə tutulur?
“Fransa bu gün nə müstəmləkəçilik siyasətindən, nə də islamofobiyadan əl çəkir, səlibçi təfəkkürü ilə öz bəd niyyətlərini icra edir”
Professor Qasım Hacıyev “Bakı-Xəbər”ə bildirdi ki, Fransa başda olmaqla, Avropa ölkələrinin çoxunda bu gün islamfob siyasət davam etdirilir: “Prezident bu fikirləri söyləməklə “demokratiya” donuna bürünüb müstəmləkəçilik və islamofob siyasət yürüdən Avropa ölkələrini nəzərdə tutur”. Q.Hacıyevin sözlərinə görə, odlu silah icad olunandan sonra bu silahları istehsal edən ölkələr daha çox ərazilər işğal etdilər, ayrı-ayrı xalqları əsarət altında saxladılar, yerli əhalini qula çevirdilər. “Belə ölkələrdən biri İngiltərə olub. Onun 50-dən artıq müstəmləkəsi vardı. Sonra İngiltərə müstəmləkələrinin çoxundan əl çəkdi. Amma çox yerləri işğal etdi, elə Amerika qitəsini də, Afrikanı da zəbt etdi. Fransa isə daimi olaraq işğalçılıq siyasəti ilə məşğul olub. Fransa ərəb ölkələrində, Afrikada işğalçılıq siyasəti həyata keçirdi.
1524-cu ildə müstəmləkəçilik siyasətinə başlayan Fransa Afrikanın şimalında və cənubunda 20-dən çox ölkədə hakimiyyət qurub. 300 il qitənin 35 faizini nəzarəti altında saxlayan Fransa yerli xalqlara qarşı qəddar davranıb, sistemli qətliamlar həyata keçirib.
Məlumdur ki, Fransa Seneqal, Fildişi Sahili və Benin kimi Afrika ölkələrində qul ticarəti həyata keçirib və bölgədə yerli xalqlara məxsus təbii sərvətləri mənimsəyib. Həmçinin Fransa Tunisdən Toqoya, Malidən Kameruna qədər bir çox Afrika ölkəsini uzun illər öz nəzarəti altında saxlayıb, sərvətlərini istismar edib.
Təəssüflər olsun ki, Fransa bu gün nə müstəmləkəçilik siyasətindən, nə də islamofobiyadan əl çəkir, səlİbçi təfəkkürü ilə öz bəd niyyətlərini icra edir.
Bu gün Fransada və digər Avropa ölkələrində müsəlmanların hüquqları tapdalanır, onlara qarşı ayrıseçkilik siyasəti həyata keçirilir. Özünü “demokratik” adlandıran bu ölkələrdə bu gün də islamofobiya davam etdirilir. Bu gün islam dini əleyhinə ən çox təbliğat aparan ölkələrdən biri Fransadır”.
Q.Hacıyev bildirdi ki, düzdür, başqa Avropa ölkələrində də islamofobiya mövcuddur, amma heç birində Fransadakı qədər diqqəti cəlb etmir: “Avropa ölkələrində dini kitabımız yandırılır, peyğəmbərimiz təhqir edilir, islam dini daşıyıcılarına qarşı kampaniya aparılır. Bu, Fransada özünü daha qabarıq şəkildə göstərir. Fransa heç nədən çəkinməyərək açıq-aşkar şəkildə islamofobiya siyasəti yürüdür. Bu ölkə həm islam, həm də türk dünyasına qarşı kampaniya aparır”.
İradə SARIYEVA
