Tural İrfan: “Avropa Parlamenti və AŞPA qərəzli mövqeyi ilə müsəlmanlara qarşı mübarizəni açıq fazaya keçirib”
Prezident İlham Əliyev Bakıda “İslamofobiya diqqət mərkəzində: Qərəzin ifşası, stiqmaların dağıdılması” mövzusunda keçirilən beynəlxalq elmi konfrans iştirakçılarına ünvanladığı müraciətində bildirib ki, Avropa Parlamenti və AŞPA qərəzli prinsiplə müsəlmanlara qarşı əhvali-ruhiyyəni qızışdırır:
“...İslam dinini və müsəlmanları Qərb kimliyinə və dəyərlərinə təhdid kimi göstərərək insanların hisslərini və düşüncələrini yönəltməyə çalışan radikal cərəyanların və ifrat sağçı partiyaların pərəstişkarlarının sayı getdikcə artır, onların nümayəndələri parlamentlərdə daha çox yer qazanmağa başlayırlar. Eyni zamanda Avropa Parlamenti və Avropa Şurası Parlament Assambleyası kimi təsisatlar qərəz və ikili standartlara üstünlük verərək anti-müsəlman əhvali-ruhiyyəsini təlqin edirlər”.
Avropanın iki böyük strukturunun antiislam, islamofob siyasət daşıyıcısına çevrilməsinin səbəbləri nədir? Bunun ziyanlı nəticələri nədir?
“Avropa Parlamenti və AŞPA buna son qoymasa, səlib yürüşünü dayandırmasa ciddi problemlər meydana gələcək”
Milli Cəbhə Partiyasının sədr müavini (MCP) Tural İrfan “Bakı-Xəbər”ə “Mütləq qeyd etməliyik ki, Avropada səlibçilik məfkurəsi inkişaf edir. Müxtəlif Avropa ölkələrində mütəmadi olaraq Quranın yandırılması aksiyalarının polis müşayiəti ilə təşkil olunması, İslam Peyğəmbərinin təhqir olunması ənənəsi və başqa faktlar sübut edir ki, artıq İslama qarşı konkret düşmənçilik, müsəlmanlara qarşı təziq davam edir”-deyə bildirdi.
T.İrfanın sözlərinə görə, İstanbulun "Konstantinopol" olmasını dilə gətirən, orta əsrlərdəki səlib yürüşlərinin bərpasını planlaşdıran Qərbin ideoloji institutları bunu çox zaman gizlətmirlər: “Əvvəlcə müsəlman ölkələrini işğal və istismar etdilər, Fransa Əlcəzairdə genosid törətdi. Sonra əlaltıları vasitəsi ilə əhali arasında terrorçu dəstələr yaradaraq əllərinə əsas keçirdilər yeni işğallar üçün. Əslində Avropa müsəlman dünyasına qarşı səlib yürüşünü davam etdirir. Adı başqa olsa da mahiyyəti eynidir. İslamofobiya məqsədli şəkildə inkişaf etdirilir, antiislam mövqedə duran təşkilatlar müsəlman ölkələrində proqramlar icra edirlər. Hətta uzun illər Ermənistanın Azərbaycana qarşı təcavüzünü də məhz bu cür səlibçilik ideyaları əsasında davam etdirirdilər. Fransa kimi dövlətlər bunu heç gizlətmirdi də. Məqsəd müsəlman Türkiyə və müsəlman Azərbaycana qarşı səlib yürüşü idi. Qərb müsəlman dünyasının birləşə bilmə ehtimalından narahatdır. Vaxtilə müsəlman ölkələrinə qarşı işğal, genosid, müharibələr törətdikləri üçün hazırda bu ölkələrin də birləşərək dirəniş göstərmə gücünə sahib olacaqlarından narahatdırlar. Avropada konkret olaraq İslama və müsəlmanlara qarşı ciddi təziq, təhdid var. Dinlər, məzhəblərarası münasibətlərin pozulması üçün iş aparılır. Avropada müsəlmanların təşkilatlanmasından, artmasından narahat olaraq əsassız bəhanələrlə milli, irqi, dini ayrıseçkiliyi körükləyirlər. Avropa Parlamenti və AŞPA qərəzli mövqeyi ilə müsəlmanlara qarşı mübarizəni açıq fazaya keçirib. Bu qurumların ideoloji hədəfləri müsəlman ölkələrini yalnız Avropanın istismar etməsinə nail olmaqdır. Müxtəlif yol və üsullarla, əsasən "demokratiya, insan haqları, qadın hüquqları" və sair şüarlarla bu ölkələrdə təşkilatlar yaradıb müsəlman əhalini parçalamaq, dinindən, milli-mənəvi dəyərlərindən uzaqlaşdırmaq, öz dövlətinə, xalqına qarşı ikrah yaratmaq üçün külli miqdarda vəsaitlər sərf olunur.
Avropa Parlamenti və AŞPA buna son qoymasa, səlib yürüşünü dayandırmasa ciddi problemlər meydana gələcək. Artıq Avropanın "azadlıq, demokratiya, haqq-hüquq" şüarlarının saxta və başqalarını istismar etmək üçün tələ olduğu üzə çıxacaq. Beləcə, İslam aləmi Avropaya qarşı yönələcək”.
İradə SARIYEVA
