Ermənistanın siyasi xadilmləri erməni icmasının rəyini manipulyasiya etmək üçün cəmiyyətə yalan informasiyalar ötürür
Bu gün Ermənistanda iki ölkə arasında bağlanması gözlənilən sülh müqaviləsi ilə manipulyasiya edən kifayət qədər siyasətçi, bloger, siyasi yazar var. Bunlar anlamır ki, saziş bir çərçivə sənədidir, orada bütün detalları əks etdirmək mümkün deyil. Sazişdə ümumi istiqamətlər göstərilir, detallar isə real təmaslarda açıqlanır.
Bundan sui-istifadə edən erməni rəsmiləri də daxili auditoriyaya yanlış informasiyalar ötürərək, sülh müqaviləsinin uzanmasının günahını Azərbaycan tərəfinin üstünə atmağa çalışırlar. Lakin bu uğursuz cəhdlərin hec biri nəticəyə təsir etmir. Bu gün onlar erməni icmasını aldadaraq onlarda rəy formalaşdıra bilərlər, amma gec-tez həqiqət üzə çıxanda özləri pis vəziyyətdə qalacaq. Cəmiyyət onlara cavabsız suallar ünvanlayacaq. Necə ki, 30 il rusun gücünü öz gücləri kimi göstərərək, etnik erməni zombilər yaradıblar, bundan sonrakı yalanlar da öz fəsadlarını zaman-zaman göstərəcək.
Belə yalançılardan biri olan Ermənistan Təhlükəsizlik Şurasının katibi Armen Qriqoryan fevralın 28-də jurnalistlərlə söhbətində deyib ki, sülh müqaviləsində müşahidə missiyasından bəhs edilmir, burada ümumi ifadə var, söhbət Avropa İttifaqının daxil ola biləcəyi üçüncü qüvvələrin olmasından gedir, lakin sülh sazişində Aİ-nin xüsusi müşahidə missiyasından bəhs edilmir.
O, sülh müqaviləsi layihəsi barədə danışaraq deyib: “Uzun illərin əməyi sayəsində biz 15 maddə üzrə razılığa gələ bilmişik. Son iki maddə hələ razılaşdırılmayıb, lakin Ermənistan bu iki maddənin də tamamlanması üzərində işləməyə davam edəcək. Hazırda müzakirələr gedir və hazır olanda cavabımızı göndərəcəyik.
Bu iki məsələyə bizim və Azərbaycanın yanaşmaları barədə hələ də razılıq əldə edilməyib. Məsələlərdən biri Ermənistan-Azərbaycan sərhədində üçüncü qüvvələrin olması, eləcə də qondarma diplomatik müharibənin başa çatması ilə bağlıdır”, - deyə Qriqoryan əlavə edib.
Armen Qriqoryan bu açıqlaması ilə Ermənistan vətəndaşlarını aldatmaqla, onların taleyi ilə oynadıqlarını ört-basdır etməyə çalışır. Əslində Azərbaycan tərəfi Ermənistanla Azərbaycan arasındakı şərti sərhəddə heç bir üçüncü qüvvənin olmasını istəmir. O cümlədən də Azərbaycan Ermənistandan tələb edir ki, Avropa İttifaqı mülkü müşahidə missiyasını sərhəddən geri çəksin. Bu məsələ sülh sazişinin məhz "Ermənistan-Azərbaycan sərhədində üçüncü qüvvələrin olmaması" maddəsində ifadə edilir. Avropa İttifaqı mülkü müşahidə missiyası əslində hərbiləşdirilmiş qrupdur və hərbi kəşfiyyatla məşğuldur. Çünki missiya kontingentinin böyük əksəriyyəti keçmiş hərbiçilərdən və xüsusi xidmət orqanlarının nümayəndələrindən ibarətdir. Bu missiyanın rəhbəri özü erməni mediasına müsabibəsində demişdi ki, onlar yalnız Ermənistan tərəfini deyil, həm də Azərbaycan tərəfini müşahidə edir və bununla bağlı Avropa İttifaqınin komissarına hər ay yazılı hesabat verir. Azərbaycan öz ərazisində Avropa İttifaqı mülki müşahidə missiyasının fəaliyyətinə icazə verməyibsə, belə bir müşahidə aparmaq və bu barədə kimlərəsə hesabat vermək beynəlxalq hüquqa ziddir.
Rəsmi Bakı dəfələrlə bildirib ki, artıq Avropa İttifaqının mülki müşahidə missiyasının Ermənistan tərəfdən Azərbaycan sərhədi yaxınlığında fəaliyyətinə ehtiyac yoxdur. 2022-ci ilin dekabrından başlayaraq formalaşdırılmasına start verilmiş bu missiya əslində regionda gərginlik yaradır. 2023-cü ilin yanvarından fəaliyyətə başlayan mülki missiya üzvlərinin sayı 40 nəfərdən artıq 209-a yüksəldilib. Onlar fəaliyyətə başlayanda Azərbaycan bu missiyanın cəmi iki ay fəaliyyətinə icazə vermişdi. Həmin vaxtdan missiyanın müddəti Azərbaycanın hökumətinin rəyi öyrənilmədən iki dəfə uzadılib. Onların fəaliyyəti Ermənistan hökumətinin birtərəfli qaydada icazəsinə əsasən hələ 2026-cı ilin fevralına qədər davam edəcək.
Daha maraqlısı odur ki, mülki missiyanın sonuncu dəfə mandatı uzadıldıqdan sonra onların yüngül silahlarla silahlandırıldığı deyilir.
Aİ rəsmiləri iddia edir ki, Avropa İttifaqı mülki müşahidə missiyası sülhü və təhlükəsizliyi möhkəmləndirməyə çalışır. Əgər münaqişə tərəflərindən biri olan Azərbaycan bu missiyanın sərhəddən çıxarılmasını sülh sazişinin bir maddəsi hesab edirsə, bu missiya sülhun möhkəmlənməsinə nesə yardım edə bilər. Missiyanın sülhün möhkəmlənməsinə töhfəsi yalnız sərhədləri tərk etməsindən ibarət ola bilər".
Akif NƏSİRLİ
